JOHN 16

1Nan tluk sual nâkhnga lo hi thil hi kan chimh cia hna. 2Sinagog in ṭhawl nan si lai, asi, an thattu hna nih Pathian caah thilṭha ngai tuah ah an i ruah cân a phân lai. 3Pa le kei an kan hngalh lo ruangah cuthil cu an tuah te lai. 4Sihmanhsehlaw hi thil hi kan chimh hna; cuticun a cân a phâk tikah kan chimh cang hna ti kha nan hngalh ṭhan nâkhnga. Hi thil hi tuanah kan rak chim hna lo, a chan cu nan sin i ka um ruangah a si. 5Asinain atu cu aka thlahtu sinah ka kal lai; nan lakah ahohmanh nih, khuazeiahdah na kal lai? tiah nanka hal fawn lo. 6Hibantuk bia kan chimh hna ruangah nan lungthin cu ngaihchiatnâk in a khat. 7Asinain biatak kan chim hna. Ka kal nan caah a ṭha; zeitintiah ka kal lo ahcun, Bawmtu nan sinah a ra lai lo, ka kal ahcun nan sinah ka rak thlah lai. 8Amah a phâk tik, sual kongah siseh, dinnâk kongah siseh, biaceihnâk kongah siseh vawlei hi thiamlo co a si zia a hngalhter lai. 9Sual cu anka zumhlo caah a si. 10dinnâk cu Pa sin i ka kal i anka hmuh ti lai lo caah a si. 11biaceihnâk cu hi vawlei bawi hi thiamlo a co cang caah a si. 12“Nan sinah chimawk bia tampi ka ngei ko rih, asinain atu ah cun nan tlinh rih lai lo. 13Asinain Amah, biatak Thlarau, a rak phâk tikah, biatak vialte chungah an kalpi hna lai; Amah nawl in zeihmanh a chim lai lo, a theihmi vialte a chim deuh lai, ara laimi thil tiangin an hngalhter hna lai. 14Anih nih aka thangṭhat lai; ka sinin a lâk lai i nan sinah a phuan lai. 15Pa nih a ngeihmi vialte cu kata a si. Cucaah keimah sinin thil vialte a lâk lai i nan sinah a phuan lai, tiah kan chimh hna. 16“Cân tlawm te hnuah nannih nih nanka hmu ti lai lo, cân tlawmte hnu ah nanka hmuh ṭhân lai, Pa sin i ka kal lai caah.” 17A zultuhna lakah cheukhat nih, “Kan sin i a chimmi hi zeidah a si? Cân tlawm pal ah nanka hmu ti lai lo, cân tlawmpal ah nanka hmuh ṭhân lai, Pa sinah ka kal lai caah, a timi hi,” tiah an i ceih len. 18Annih nih, “Cân tlawmpal” a timi hi zeidah a si hnga? A chimmi hi a ruah awk kan hngalh lo,” tiah an ti. 19Amah hal an duh ti kha Jesuh nih a hngalh, “Cân tawite ah nanka hmu ti lai lo, cân tawite ah nanka hmuh ṭhan lai ka timi hi, nan i hal maw? 20Biataktein, biataktein, kan chimh hna, nannih ngaihchia in nan ṭap lai, vawlei tu cu â nuam lai, nannih nan ngaih a chia lai, asinain nan ngaihchiatnâk cu lunglomhnâk ah a cang lai. 21Nu nih, nau a hrinlai ah a ngaih a chia tawn, a cân a phâk cang caah; asinain nau a hrin le cângkâ a ngaihchiat le thinphân kha a hngal ṭhân ti lo, zeitintiah vawlei i minung a chuakmi ah â lawmh caah. 22Cucaah atu ah nan ngaih a chia, asinain kan hmuh ṭhân hna lai i nan lungthin â lawm lai, cun nan i lawmhnâk cu ahohmanh nih an in lâkpiak hna lai lo. 23Cuniah cun nannih nih zeihmanh nanka hal lai lo. Biataktein, biataktein, kan chimh hna, Pa sinah zei pauh nan hal ahcun keimah min in an pêk hna lai. 24Atu tiangin ka min in zeihmanh nanhal rih lo. Hal u, nan hmuh lai, nan i lomhnâk a tlin nâkhnga. 25“Cu bia hna cu nan sin ah bianabia in ka chim tawn, asinain fang hlang tein ka chim cân a phân lai. Cu cân ah cun fiang tein Pa kong kan chimh cang hna lai. 26Cuniah cun keimah minin thil nan hal lai; Pa sinah kan halpiak hna lai tiah ka chim lo hih, 27nannih nih nanka dawt i Pa sin in a chuakmi ka si nan zumh caah, Pa hrimhrim nih an dawt hna. 28Keimah hi Pa sin in a chuak i vawlei i a rami ka si. Vawlei hi chuahtak in Pa sin i a tlung`hân ding ka si,” tiah a ti. 29A Lamkaltu hna nih, “Ngaihmanh, atu ah cun fiang tein bia na chim i bianabia zong na hmang ti lo. 30Nangmah nih zeizong vialte na hngalh i hal len zong na herh lo, tiah kan hngalh cang. Hi ruang zongah Pa sin in a chuakmi na si kha kan zumh cang,” tiah an ti. 31Jesuh nih, “Atu ah cun nan zumh cang maw? 32Mah long cio in nan kal i keimah lawng nanka chiah cân a phân cang ai, asi, a phân cang. Asinain keimah lawng ka si lo, ka sinah Pa a um peng ko. 33Keimah ah hnangam tein nan i dinh khawh nâkhnga hi bia hi nan sinah ka chimmi a si. Vawlei ah hin harnâk nan ton tawn, asinain hnangam tein um u, vawlei cu ka tei cang.”

Currently Selected:

JOHN 16: HAKABSI

Highlight

Copy