JOHN 21

1Cuhnu ah Jesuh cu a lamkaltu hna sinah, Tiberia tidîl kamah â lang ṭhân. Â langhning cu hitihin a si. 2Simon Peter le, Thomas, faphir timi le, Galili ram Kana khua mi Nathanael le, Zebedi fapa pahnih hna le a lamkaltu dang pahnih kha an umṭi. 3Simon Peter nih, “Nga tlaih ah ka kal lai,” tiah a ti. Annih nih, “Kannih zong na sinah kan kal ve lai,” tiah an ti. Cun an kal i tilawngah an i cit; cu zan cu zeihmanh an tlai lo. 4Asinain khua a dei tikah, Jesuh cu tikam ah a dir; lamkaltu hna nih Jesuh a si kha an hngal lo. 5Jesuh nih, “Naule hna, eiawk nan ngei maw?” tiah a ti hna. Annih nih, “Ngei lo,” tiah an leh. 6Anih nih, “Tilawng orhlei ah khan nan sur kha vorh ulaw, nan tlaih lai,” tiah a ti. Cun an hun vorh i an tlaihmi nga a tamtuk ah an hnuk kho lo. 7Cucaah lamkaltu, Jesuh nih a dawtmi nih khan, Peter sinah, “Bawipa a si,” tiah a ti. Simon Peter nih Bawipa a si kha a hngalh le cângka a angki leng â aih (taklawng in a rak um) i ti ah a zuang cawlh. 8Lamkaltu dang nih tilawng fa deuhmi he anzuan hnawh hna i au sur cu nga he chuak lakin an hun hnuh. Tikam in kaih sawm kua hrawng lawng a si. 9Tikam an phâk tikah meihol i meichem cia le a cung i nga le changreu a ummi kha an va hmuh. 10Jesuh nih, “Nan nga tlaihmi cu tlawmpal hun la hnik u,” tiah a ti. 11Simon Peter cu tilawng ah a va kai i nga ngan pipi umnâk sur cu tikam ah a hun hnuh, a diklak in 153 a si. Cutluk tam a si nain sur cu a tlek lo. 12Jesuh nih, “Thaithawh ei u,” tiah a ti. Lamkaltu lakah ahohmanh nih, “Ahodah na si?” tiah an hal ngam lo, Bawipa a si kha an hngalh ko. 13Jesuh cu ara i changreu kha a lâk i an sinah a pêk, cubantukin nga zong a pêk hna. 14Cucu Jesuh nih thihnâk in a thawhṭan hnu i a lamkaltu hna sin i a langh voi thumnâk a si. 15Thaithawh ei dih ah, Jesuh nih Simon Peter sinah, “Simon, Jonah fapa, hi hna nâk in naka daw deuh maw? tiah a ti. Anih nih,” A si, Bawipa, kan tlaihchan kha na hngalh,” tiah a ti. Anih nih, “Ka tuu fale kha cawm hna” tiah a ti. 16A voihnihnâk ah, “Simon, Jonah fapa,’ naka daw maw?” tiah a ti ṭhân. Anih nih, “A si, Bawipa, kan tlaihchan kha na hngalh,” tiah a ti ṭhân. Anih nih, “Ka tuu kha zohkhenh hna,” tiah a ti. 17A voi thumnâk ah, “Simon, Jonah fapa, naka tlaihchan maw?” tiah a ti. Cun a voithumnâk ah, ‘Naka tlaihchan maw,’ tiah a sin i a ti ruangah Peter cu a ngaih a chia i a sinah, “Bawipa, zeizong vialte na hngalh, kan tlaihchan kha na hngalh ko,” tiah a ti. Jesuh nih, “Ka tuu kha cawm hna. 18Biataktein biataktein, kan chimh, na ngakchiat lio ah na taiah nâ sawm i na duhnâk pauh ah na kal tawn, asinain na upat hnu ah cun, na kut na thlir lai i midang nih an in somh lai, cun na duh lonâk ah an in kalpi lai,” tiah a ti. 19Cubiacu zeibantuk thihnâk in dah Pathian a thangṭhat te lai ti hngalhnâk caah a chimmi a si. Cucu a chim dih in a sinah, “Ka zul,” tiah a ti. 20Peter cu â mer i Jesuh nih a dawtmi zultu, zanriah an ei lio i a ṭang hngauh in a va sawnmi, “Bawipa aho cem nih dah an rawi lai? tiah, a titu nih a rak zulh kha a hmuh. 21Peter nih a hmuh tikah Jesuh sinah, “Bawipa, hipa hi teh zeitindah a um lai?” tiah a ti. 22Jesuh nih, “Duh ning law, ka rat ṭhân hlan tiang a nung ko lai, cucu zeiahdah nâ hman lai? ka zul ko,” tiah a ti. 23Cuticun cu bia ruangah hi lamkaltu hi a thi lai lo tiah unau hna sinah a thang. Asinain Jesuh nih a thi lai lo timi a chim lo. “Duh ning law, ka rat ṭhân tiang zong in a nung ko hnga, cucu zeiahdah nâ hman lai?” tiah a timi tu a si. 24Cu lamkaltu cu hi bia hngalhtertu le ṭialtu hi a si i a hngalhtermi bia hi a dikmi a si tiah kan hngalh. 25Cun hi hleiah Jesuh tuahmi dang tampi a um, cu hna cu pakhat hnu pakhat ṭial dih ding siseh law, ṭialnâk cauk vialte cu vawlei hmanh nih a tlum lai ka zum lo. A men.

Currently Selected:

JOHN 21: HAKABSI

Highlight

Copy