ACT 1
1
1Aw Theofilus, hmasa deuh ka ca ah, Jesuh cawnpiakmi le tuahmi vialte kha ka ṭial hna, 2Thiang Thlarau thawngin lamkaltu i a thimmi hna sinah nawl a pêk hna hnu ah, van i lâk a si ni tiangin, 3an sinah a palh kho lomi hngalhpinâk tampi he, a temtuar hnuah a nung ṭhân tiah â langhter, ni sawmli chung an hmuh khawh dingin â lang i Pathian Pennâk kong kha a chimh hna. 4Cun hmunkhat i an i pumhnâk ah a umpi hna i Jerusalem chuahtâk lo ding le Pa biakammi hngak dingin nawl a pêk hna, “Cucu” A rak chimmi, “Ka sinin nan theih cangmi kha a si; 5zeitintiah Johan nih ti in Baptisma a pêk tak tak, asinain a rauh hlanah Thiang Thlarau in Baptisma nan co lai,” tiah a ti. 6Cucaah hmunkhat i an i pumh lioah, “Bawipa, atu ah maw Israel caah Pennâk cu na dirh lai?” tiah an hal. 7Anih nih, “A ni le cân Pa nih Amah nawlngeihnâk i a chiahmi cu nannih hngalh awk a si lo. 8Asinain nan cungahThiang Thlarau a phâk tikah thiltikhawhnâk nan ngei lai, Jerusalem le Judah ram vialte, Samaria ramkip le vanhram deng tiangin ka bia hngalhpitu nan si lai,” tiah a ti. 9Cu thil a chim dih in, an hmuh hngan teah vanah cawi in a um i khuadawm nih an hmuh khawh lonâk ah a lâk. 10Cunglei ah a kai i cat loin vanlei zoh in an dir ko lioah, zohhmanh puanrang â aihmi pahnih an pawngah an dir i 11an sinah, “Galili mi hna, zeiruangahdah vanlei zohin nan dir ko? Hi Jesuh nan sin i vanah a kaimi hi, van i a kai nan hmuh bantuk te hin a ra ṭhân lai,” tiah an ti. 12Olivet an timi tlângin Jerusalem ah an kir, cu tlâng cu Jerusalem pawng, Sabbath ni i kal khawhnâk a si. 13Cun khua an luh tikah, an um tawnnâk dot cungnung ah an kai, Peter le, Jeim, Johan le Andria, Filip le Thomas; Bartholomi le Matthai, Alfai fapa Jeim le Simon Zelot chungmi le Jeim fa Judas hna an si. 14Cu vialte cu nu hna le Jesuh nu Mary, Jesuh nau le hna he ruahnâk hmunkhat i thlacam le nawlnâk tuah in an um peng. 15Cun lamkaltu hna an i pumh lio ah, Peter a dir i (an dihlak in za le kul hrawng an si) 16unau hna, “Thiang Thlarau nih David kâ in Jesuh a tlaitu hna hruaitu pa Judas kong Cathiang ah a rak chimchungmi hi a tlin awk a si ko, 17zeitintiah amah kha kan lakah relchih a si ve i hi rian ah hin ṭuanvo zong a ngei ve.” 18(Hi pa nih hin a sualman in hmun pakhat a cawk i a bettaling in a tla, a paw a kuai i a ril vialte a chuak dih). 19Cu kong cu Jerusalem i a ummi nih an hngalh dih; cucaah cu hmun cu anmah holh in, “Akel Dama,” tiah an ti; cucu thisen hmun tinâk a si. 20Zeitintiah Sam cauk ah hi kong hi ṭial a si. ‘A umnâk in rauhtâk si sehlaw, a chungah ahohmanh um hna hlah seh,’ ti le ‘hotu a sinâk cu midang nih co hna seh,’ tiin. 21Cucaah Bawi Jesuh, kan sin i a luh a chuah chung vialte, 22Johan nih Baptisma a pêk ri in kan sinin Jesuh vanah lakchoh i a um tiang a kan kom zungzaltu lakah mi pakhat a thawhṭhannâk a kan hngalhpitu pakhat a um awk a si,” tiah a ti. 23Cun mi pahnih an ruah i Josef, Barsabas timi, Judas zong an ti ṭhanmi le Matthias kha an si. 24Cun thla an cam i “Maw, Bawipa, lungthin vialte a hngaltu, hi hna pahnih lakah aho deuh dah na thim kan hngalter ko. 25Judas nih a umnâk i kal dingin sual i a tluktâkmi, hi rianṭuannâk le lamkaltusinâk hmun lawng hi cotu an um a herh fawn,” tiah an ti. 26Camcawh fung an zuh i Matthias cungah a tla. Cuticun amah cu lamkaltu hleikhat hna sinah relchih a si.
Currently Selected:
ACT 1: HAKABSI
Highlight
Share
Copy
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
