LUKA 18

1Cuticun lungdong loin thla an cam nâkhnga tahchunhnâk in a cawnpiak hna, 2“Khua pakhat ah biaceihtu, Pathian zong a ṭih lo i minung zong a hmaizah lotu a um. 3Cu khua ah nuhmei pakhat a um i anih nih, “Ka ral sinah phu ka hlam piak ko,” tiah a va panh lengmang. 4Cân zeimawzat cu a ceihpiak duh lo. Asinain a hnu ah a lungchung in, Pathian ṭih loin minung hmaizah lo hmanh ning law, 5hi nuhmei nu nih hin hna a ka hnawh lengmang caah a bia cu ka ceihpiak ko lai, zeicatiah ngol lo in a ratmi hi ka neng tuk cang’ a ti,” tiah a ti. 6Bawipa nih, “A dinglomi biaceihtu chimmi cu ngai tuah u. 7An cungah lungsau rih hmanhsehlaw, a thimmi hna, chun zan hlan i amah autu hna cu Pathian nih let lo in maw a um hna hnga? 8Kan chimh hna, ‘An phu cu khulrangin a hlampiak hna lai. Asinain Mi Fapa hi a rat tik ah vawlei ah hin zumhnâk a hmu hnga maw?” tiah a ti. 9Mifel ah â ruat i midang vialte a zomhtaihtu cheukhat hna sinah hi tahchunhnâk bia zong hi a chimh hna. 10Mi pahnih ṭempal ah thlacam dingin an kal. Pakhat cu farasih a si i adang pakhat cu ngunkhuai khawltu a si. 11Farasih cu a dir i amah kongah hitihin thla a cam. ‘Pathian, midang bangin ningcang lo i lakhmang le, a diklo le, ṭangdang kaimi ka si lo caah le, hi ngunkhuai khawltu bantuk zong ka si lo caah lawmhnâk bia kan chimh. 12Zarhkhat ah rawl voihnih ka ulh i ka ngeihmi pauh cheuhra cheukhat ka pêk tawn,’ tiah a ti. 13Cun ngunkhuai khawltu cu hla pi ah a dir i van lei zong a zoh ngam lo, ‘Pathian, kei misual hi ka zângfah ko,’ tiah a ṭâng â cum leng mang. 14Kan chimh hna, a hmasa deuh nâkin hi pa hi thiamco in inah a tlung. Mah le mah â santermi pauh ṭhumh an si lai i mah le mah â ṭhummi pauh santer an si lai,” tiah a ti. 15Cuticun a rak tongh awkah ngakchia kha an ratpi i lamkaltu nih an hmuh tikah an rak sik hna. 16Sihmanhsehlaw Jesuh nih annih cu a kawh hna i, “Ngakchia kha ka sinah ratter ulaw, dawn hna hlah u; Pathian pennâk cu hibantuk hna caah a si,” tiah a ti. 17Biataktein kan chimh hna, “Ngakchia te nih a lawmh bantuk i a lawm lomi pauh cu Pathian Pennâk chungah an lut lai lo,” tiah a ti. 18Hotu pakhat nih a sinah, “Cawnpiaktu ṭha, zungzal nunnâk co awkah zeidah ka tuah lai,” tiah a hal. 19Cuticun Jesuh nih a sinah, zeiruangahdah ṭha naka ti? Mi pakhat dah tilo cu ṭha pakhat hmanh an um lo, cucu Pathian a si. 20Nawlpek cu na theih ko cu ta.‘Ṭangdang kai hlah, lainawng hlah, fir hlah, lihin sualphaw hlah, nanu le napa upat hna, timi hna hi,’ tiah a ti. 21Anih nih cu bia hna cu ka no lio tein ka zulh dih hna, tiah a ti. 22Jesuh nih cucu a theih i a sinah, “Lamkhat na bau. Na ngeih vialte zuar law, mi sifak phaw hna, cuticun vanah ro na ngei lai, cun ra law, ka zul,” tiah a ti. 23Anih nih cu bia cu a theih tikah, a ngaih a chia ngaingai, chawva tampi ngeimi a si. 24A ngaih a chia ngaingai ti kha Jesuh nih a hmuh i, “Mirum Pathian Pennâk luh cu zeitlukindah a har lai! 25Zeitintiah mirum Pathian Pennâk i luh nâk in ṭhim hna i kalauk luhter a fawi deuh lai,” tiah a ti. 26Cu bia a theitu hna nih, “Cuti a si ahcun, ahodah khamh a si kho kun lai?” tiah an ti. 27Sihmanhsehlaw anih nih, “Mi nung caah a si kho lomi hi, Pathian caah a si kho ko,” tiah a ti. 28Peter nih, “Zohhmanh, kannih nih zeizong vialte kaltâk in kan in zulh,” tiah a ti. 29Anih nih, “Biataktein kan chimh hna, “Pathian Pennâk ruangah inn siseh, nu le pa siseh, unau siseh, nupi siseh, fa le siseh a kaltâkmi pauh cu, 30atu nun chung lila ah a mahnâk tamdeuh a hmu lo dingmi ahohmanh an um lo, a ra laimi cân i zungzal nunnâk he,” tiah a ti. 31Cuticun hleihnih hna cu a dangte in a hruai hna i an sinah, “Ngaihmanh u, Jerusalem ah kan kal lai, Mi fapa kong i profet hna ṭialmi vialte kha a tling dih lai. 32Zeitintiah Gentel mi hna sinah an pek lai i nichuak saihnâk ah hmangin, mualpho ngaiin an tuah lai i cil an chak lai. 33An tuk lai i an thah lai. A nithum niah a tho ṭhân lai,” tiah a ti. 34Asinain cu bia cu pakhat te hmanh an thei thiam lo. A chimmi cu an sinah thuh in a um i zei thildah a chim ti hmanh an hngal lo. 35Jeriko khua a phak lai ah mitcaw pakhat lamkamah kutdawh in a ṭhu; 36Mizapi kal thawng a theih tikah, zeithildah a tlung tiah a hal hna. 37Annih nih, “Nazaret Jesuh a lan lio,” tiah an ti. 38Anih nih, ‘Jesuh, David Fapa, ka zângfah tuah, tiah a au. 39A kal hmasa mi hna nih daite i um dingin ralrin an pek, asinain anih nih, “David Fapa, ka zângfah ko,” tiah thang chinchin in a au. 40Jesuh cu a dir i a sin i ratpi dingin nawl a pêk hna. A sin a phâk tikah, 41“Zeidah in tuah piak ninglaw na duh?” tiah a hal. Anih nih, “Bawipa, hmuh khawh ka duh,” tiah a ti. 42Jesuh nih, “Khua cu hmu ko cang, na zumhnâk nih an damter,” tiah a ti. 43Chikkhatteah khua a hmu cawlh i Pathian ṭhangthat buin Amah kha a zulh. Mi vialte nih cu thil an hmuh tikah Pathian kha an thangṭhat.

Currently Selected:

LUKA 18: HAKABSI

Highlight

Copy