LUKA 19

1Jesuh cu Jeriko khua ah a lut i a lan thluahmah; 2Cun zohhmanh, mi pakhat a min Zakia a um, ngunkhuai khawltu bawi a si i a rum ngaingai. 3Jesuh cu mizeidah a si hnga, tiah hmuh a timh i mizapi ruangah a hmu kho lo, zeitintiah amah cu miniam te a si. 4Cuticun cu lam i a kal hngami Jesuh hmuh duh ah hmaiah a tli i Saikamor kungah a kai. 5Jesuh nih cuhmun a phâk tikah, cunglei a hun zoh i, “Zakia, khulrangin rung ṭum, nihin ah na innah ka tlung hrimhrim lai,” tiah a ti. 6Cuticun khuarangin a ṭum i lunglawm ngaiin a cohlan. 7Cucu an hmuh tikah an dih lakin, “Misual innah tlung dingin a lut ai,” tiah an zai. 8Zakia cu a dir i Bawipa sinah, “Ngaihhmanh, Bawipa, ka chaw hnarcheu misifak ka pêk hna lai, ningcang lo in kalâkmi a um ahcun, a let li in ka cham hna lai,” tiah a ti. 9Jesuh nih, “Nihin ah hi innah khamhnâk a phân, zeicatiah amah zong Abraham fapa a si ve; 10zeitintiah Mi Fapa hi a tlaumi kawl i khamh dingah a ra,” tiah a ti. 11Cubia cu an ngaih lio ah, Jerusalem khua a naih cang caah le Pathian Pennâk kha tlung cawlh ding i an ruah ruangah tahchunhnâk dang a chimh hna. 12Hitihin a chim, “Hmaizah mi pakhat hi pennâk ngeitu sinâk va la i rak kir ṭhân dingah ram hla pi ah a kal. 13Cuticun sinum hna lakah mi pahra a kawh hna i an sinah sui phaisa pahra a pêk hna i an sinah, “Ka rak kir hlan lo, chaw rak lehnâk u,” tiah a ti hna. 14Asinain a khuami hna nih an huat, hipa hi a kan uktu caah kan duh ti lo, tiah va chimh awkah lamkal an thlah hna. 15Uktu sinâk he a rak kir ṭhân tikah, sui phaisa a pêkmi sinum kha zeizatdah an karhter ti hngalh duhah a auh hna. 16A hmaisa bik cu a ra i, “Kapu, na sui phaisa kha pahra in a karh,” tiah a ti. 17Anih nih, “Sal ṭha, natuah mi a ṭha, tlawmte cungah zumhawk na tlâk caah khua pahra uktu na si lai,” tiah a ti. 18A changtu a ra i, “Kapu, na sui phaisa kha panga in a karh,” tiah a ti. 19A sinah, “Nang zong khua panga uktu na si lai,” tiah a ti. 20Midang a ra ve i, “Kapu, zohhmanh, na sui phaisa kha, puan in ka fun i ka chiah ko. 21Zeitintiah mi khepkha tuk na si caah kan ṭih. Na khawn lonâk zongah na lâk i na tuh lomi zong na zûn tawn,” tiah a ti. 22Anih nih, ‘Sinum thathu pa, na chimmi bia lila in thiam lo kan coter. Mi khepkha ka si i ka chiah lo zongah ka lâk i ka tuh lo zongah ka zûn na hngalh maw? 23Cutiasiah ka phaisa cu zeiruangah dah Bân ah na chiah lo? cuticun ka rak kir tikah a karh he hmu ding ka si,’ tiah a ti. 24“Cun a pawng i a dirmi hna sinah, ‘A sui phaisa kha lakpiak ulaw, sui phaisa pahra a ngeimi sinah pe u,’ tiah a ti. 25(Sihmanhsehlaw annih nih, ‘Ka pu, anih cu sui phaisa pahra a ngeih cang lo maw?” tiah an ti) 26Zeitintiah a ngeimi pauh an chapchih lai i a ngei lomi cu a ngeihchun zong an lâk piak lai. 27Asinain hi a ka dohtu hna le, an bawi ca zongah a ka duh lotu hna hi ratpi hna ulaw, ka hmai ah that hna u,’ a ti hna,” tiah a ti. 28Cubia a chim dih in Jerusalem panh in hmaiah a kal. 29Bethfeih le Bethani khaupawng, Oliv tlâng an timi an phâk tikah lamkaltu lakah mi pahnih a thlah hna, 30nan hmai khua ah khin va kal u law, nan phâkka ah, hrenmi lâ fa ahohmanh an i cit bal lomi nan hmuh lai. Phoih ulaw, ratpi u. 31Mi nih, “Zeiruangahdah nan pholh? tiah an ti ahcun, Bawipa nih a herh, tiah nan ti lai,” tiah a ti. 32Cuticun a thlahmi hna cu an kal i an sinah a chim bantuk tein an va hmuh. 33Cubangin lâ fa an phoih lio ah a ngeitu hna nih, “Lâ fa kha zeiruangahdah nan phoih?” tiah an ti. 34Annih nih, “Bawipa nih a herh,” tiah an ti. 35Cuticun Jesuh sinah an ratpi. Lâ fa cungah cun an puan an danh i a cungah Jesuh an citter. 36Cun a kalnâk ding lamah an puan kha an phah. 37Cuhnuah Oliv tlâng lonh chukzuan an phanh lai ah a hnu zultu mizapi nih a tuahmi khuaruahharnâk vialte an hmuh i an i lomh caah aw ṭhang ngai in Pathian an thangṭhat. 38“BAWIPA min i a rami Siangpahrang cu thangṭhat in um seh! vanah daihnâk umseh law, cungnungbik ah thangṭhat siseh,” tiah an ti. 39Zapi lakah Farasih cheukhat nih a sinah, “Cawnpiaktu, na zultuhna hi sî hna,” tiah an ti. 40Anih nih, “Kan chimh hna, hi hna hi an daih ahcun lungte hi hmakhatte ah an au ko lai,” tiah a leh hna. 41An phâk lai te ah khuapi cu a hei cuan i a ṭah. 42“Naca i tuahmi daihnâk hi, a hlei in ni hin ni ah hin hei hngal law mu! Asinain atu cu na hmuh lonâk dingah â thup cang. 43Zeitintiah naral hna nih na vêlchûm in lei hau an tuah lai, kulh na sidih lai i chuak kho lo in hrenchih na si lai. 44Na chung i a ummi, na fa hna le nangmah he an in hlawnh hna lai, na chung i lungrual vialte an chimh dih lai. An in ngiatmi nâ hngalh lo caah cubantuk cân cu na cungah a tlung lai. 45Cun ṭempal ah a lut i thil zuartu hna le cawtu kha a ṭhawl hna, 46an sinah, “Ka inn cu thlacamnâk inn a si lai, tiah ṭial a si, nannih nih damiah hna kua ah nan canter,” tiah a ti. 47Cun ṭempal pawngah nichiarte a cawnpiak hna. Tlângbawi hna le nawlbia cawnpiaktu hna le zatlâng uktu hna nih Amah hloh khawhnâk lam an kawl lên; 48asinain zeihmanh an tuah kho lo, zeicatiah zapi nih a bia ngaih an cim kho lo.

Currently Selected:

LUKA 19: HAKABSI

Highlight

Copy