LUKA 20

1Cu cân ah nikhat cu ṭempal ah a cawnpiak hna i thawngṭha a chim lio ah tlângbawi le nawlbiacawnpiaktu le upa hna he an ra i hmaitonh in 2A sinah, “Kan chim tuah, zei nawlngeihnâk in dah hi thil hna hi na tuah? asiloah, ahonihdah hi nawlngeihnâk hi an in pêk?” tiah an ti. 3Anih nih, “Kei zong nih thil pakhat kan hal ve hna lai i nan ka chimh lai. 4Baptisma petu Johan kha van lei in maw a si, minunglei in dah?” tiah a ti. 5An i ruat i, “Vanlei in kan ti ahcun, ‘a si ah zeiruangahdah nan zumh kun lo,’ a kan ti lai. 6‘Minung lei in,’ kan ti ahcun, mi vialte nih lungin an kan cheh lai. Zeicatiah Johan cu Profet a si tiah an zumh dih fawn,’ an ti. 7Annih nih khawzei lei in dah a si, kan hngal lo, tiah an leh. 8Jesuh nih, “Keizong nih hi thil hna hi aho nawlngeihnâk in dah ka tuah kan chim hna lai lo,” tiah a ti. 9Cuticun mizapi sinah hi tahchunhnâk bia hi a chimh hna. “Mi pakhat nih misur dûm a tuah, dûm congtu hna sinah ṭuanman hmu dingin a pêk hna i saupi rau dingin lamhlat ngai ah khual a tlawng. 10A thei lawh cân a zat tikah a covo co awkah dûm congtu hna sinah sinum pakhat a hei thlah. Sihmanhsehlaw dûm congtu nih an rak velh i kut lawngin an kirter. 11Sinum dang a thlah ṭhân i cu zong cu an rak velh ṭhân i ningzak ngai in an rak tuah hnuah kut lawngin an kirter ṭhân. 12Pathumnâk a thlah ṭhân i cuhna cu hma an rak putter hnu ah dûm lengah an rak hlawnh. 13Cuticun misur dûm ngeitu pa nih, zeitindah ka tuah kun lai? ka fapa ngeih chun hi thlah ko ning. Anih hi an hmuh tikah anrak hmaizah deuh lai, tiah a ti. 14Asinain dûm congtu nih an hmuh tikah, ‘Hi pa hi ro cotu ding a si lo mei. Ra uh, that u sih, cuticun a co hngami ro kanmah ta a si ko lai,’ tiah an ti. 15Misur dûm chungin an chuah i an thah. Misur dûm ngeitu nih zeitindah a tuah hna lai? 16Ara lai i dûm congtu hna cu a hrawh dih lai i dûm congtu dang sinah a pêk lai, tiah a ti. Cu bia an theih tikah, biangaitu hna nih, cucu phân sawh hlah seh, tiah an ti. 17Annih cu a zoh hna i, “Hihi zeibiadah â rak ṭial. Inn satu nih an duh lomi lung kha a kil i san a tlai bikmi lung hi? 18Culung cung i a tlumi pauh an kuai dih lai i a nenh i a nenhmi hna cu dipte in a rial hna lai,” tiah a ti. 19Cun tlângbawi le nawlbia cawnpiaktu hna nih cu cân i tlaihcawlh kha an timh. Asinain mizapi ral an veng, zeitintiah cu tahchunhnâk cu anmah dohdalnâk i a chimmi a si kha an hngalh. 20Cuticun Mangki nawlngeihnâk le thiltikhawhnâk i an tlaih khawh nâkhnga, miding ngai bantuk i â tuahmi mingiatu an thlah i a chim sualmi bia bawh in ṭha tein an ngiat. 21Annih nih, “Cawnpiaktu, dik ngaiin na cawnpiak i ahohmanh thleidang loin Pathian kong na cawnpiak tawn tiah kan hngalh. 22“Sizar sin i ngunkhuai kan pêkmi hi phungning a si maw, si lo dah,” tiah an hal. 23Anih nih an zerning kha a rak hngalh i, “Zeiruangahdah nanka hneksak? 24Ngamu rakka hmuhter tuah u, “Hihi, aho lem le min dah a si? tiah a ti. Annih nih, “Sizar” tiah an ti. 25Anih nih, “Cutiasiah, Sizar ta a simi cu Sizar pe ulaw, Pathian ta cu Pathian pe u,” tiah a ti. 26Cuticun mizapi hmai ah a chim sualmi tlaih awk an hmu lo, a lehnâk cu an khuaruah a har i dai tein an um. 27Cun mithi thawhṭhannâk a um lo, titu Sadusih kha biahal awkah a sinah an ra. 28“Cawnpiaktu, mizei pauh nih nupi a ngei i fa ngei lo in thi sehlaw a u nau nih a roco in a thimi caah fa a ngeih piak lai, tiah Moses nih a kan ṭialpiak. 29Cuticun unau pasarih an um. A upa bik nih nupi a ngei i fa ngei lo in a thi. 30Pahnihnâk pa nih nupi ah a ngeih ve i anih zong fa ngei lo in a thi. 31Cuticun pathumnâk pa zong nih a ngeih ṭhân i a pasarihnâk tiangin fa ngei lo in a thi. 32Hmanung bik ah nu zong a thi ve. 33Cuticun thawhṭhân ni ah aho nupi cem dah a si kun lai? Zeitintiah an dihlak in nupi ah an rak ngeih dih fawn?” tiah an hal. 34Jesuh nih an sinah, tuchan minung hna cu nupi pasal an i ngei, 35asinain a ra laimi cân i tel awkah â tlâkmi le thihnâk in thawhter hngami hna cu nupi pasal an i ngei ti lai lo, 36thih zong an thi ti lai lo, vanmi hna he an i tluk lai i thoṭhân fale an si caah Pathian fa le an si cang. 37Sihmanhsehlaw mithi hna thawhter an si lainâk kong Moses nih burbûk a alhmi kongah arak hmuhsak cang, khaka ah khan, Bawipa cu, “Abraham Pathian, Isak Pathian, Jakob Pathian, tiah a ti. 38Zeitintiah a nih cu mithi Pathian a si lo i minung Pathian a si, zeitintiah mi vialte hi Amah ca i a nungmi an si dih,” tiah a ti. 39Nawlbia cawnpiaktu cheu khat nih, “Cawnpiaktu, na chimmi a ṭha tuk,” tiah an ti. 40Cuhnuah bia an hal ngam ti lo. 41Cun an sinah, “Zeiruangah dah Krih cu David fapa tiah an ti tawn?” 42Thangṭhatnâk Hla ca-uk ah David hrimhrim nih, “BAWIPA nih ka Bawipa sinah, 43Na ral hna na ke tang i ka chiah dih tiangin, ka orhlei ah ṭhu, tiah a ti. 44Cucaah David nih, ‘Bawipa’ tiah a timi kha zeitindah a fapa cu a si khawh lai?” tiah a ti. 45Cuhnuah mi vialte theihkhawh dingin a lamkaltu hna sinah, 46“Nawlbiacawnpiaktu hna chungin i ralring u, annih nih angki fual he i chawhleh an tlaihchan i market hmun i kuttlaih le sinagog i hmaichuang i ṭhut le rawl danghnâk i hmun`ha bik i ṭhut an tlaihchan. 47Nuhmei chawva an ei piak i zatlâng hlennâk ah saupi thla an cam tawn. Cuhna nih thiam lo an co chinchin lai,” tiah a ti.

Currently Selected:

LUKA 20: HAKABSI

Highlight

Copy