LUKA 2
2
1Cun hitihin a si, Sizar Augustus nih mi vialte min ṭial awkah nawl a pêk. 2Cu minṭial cân cu Siria ram i Khuirinias Mangki a ṭuan lio ah a si. 3Cuticun minṭial awkah, mikip anmah le an khua cio ah an kal. 4Josef zong David hrinthlak le chungkhar a si caah Galili ram Nazaret khua in Judia ram Bethlehem, David khua ah 5nupi caah a hammi Mary, nau a pawimi he an kal. 6Cu hmun an um lio ah, nau hrin cân kha a phân. 7Cun a fater ah pa a hrin i puan in a zual, khualbuk ah an i tlum ti lo caah saṭil rawlpêknâk kuangah a ihter. 8Cu ramah tuukhâl an um i an tuu kha khâl in zanah an riahpi hna. 9Cun ngaihmanh, Bawipa vancungmi pakhat an hmaiah a dir, Bawipa sunparnâk nih an vêlchûm kha a run ceuh i an ṭih ngaingai. 10Vanmi nih, “ṭih hlah u law, ngaihmanh u, mi vialte caah lunglawmhnâk Thawngṭha ka ratpi. 11Ni hin ah hin David khua ah nan caah Khamhtu a chuak cang, Bawi Krih cu. 12Hihi nan caah hmenchunhnâk a si lai; puan in zualmi Ngakchia, siṭil rawlpêknâk kuang i ih termi nan hmuh lai,” tiah a ti. 13Chikkhatteah vanmi sinah van mirun an i pum i Pathian an thangṭhat. 14“Cungnung bikah Pathian thangṭhat in um ko seh. Lei cungah a lawmhmi minung sinah daihnâk um ko seh,” tiah an ti. 15Cuticun vanmi nih van i an kaltâk hna hnu ah, tuukhal hna nih, “Atu ah hin Bethlehem khua ah kal usih law, Bawipa nih a kan chimhmi kha va zoh u sih,” tiah pakhat le pakhat an ti. 16Khulrangin an kal i Mary le Josef, saṭil rawlpêknâk kuang i ihtermi Ngakchia he an hmuh hna. 17Cubangin Ngakchia kong i an theihmi vialte kha kau piin an thanh. 18A theitu vialte nih tuukhal hna chimmi cu mak an ti ngaingai. 19Asinain Mary nih cu thil vialte cu a lung chungin â cinken. 20Cuticun tuukhal hna nih chimh an rak si bantuk tein zeizong vialte an va hmuh i an va hngalhmi ruangah Pathian thangṭhat pahin an kir ṭhân. 21Cun Ngakchia cu cuarpar tannâk dingah niriat a tlin tikah, a min ah JESUH tiah an sak, cucu nau-in i a um hlan hmanh ah vanmi nih an rak bunh cangmi a si. 22Moses nawlbia bangin Mary thenhnâk ni a dih tikah, Bawipa sin i pêkchanh awkah Jerusalem khua ah an kalpi 23(Bawipa nawlbia ah ṭial a rak si bangin, “Nau in a ong hmasa bik fapa cu Bawipa caah a thiangmi a si”) 24Bawipa nawlbia ah ṭialmi bangin thawinâk pêkchanh awkah, parva fa pahnih kha pêkchanh ding a si. 25Cun ngaihmanh, Jerusalem khua ah mi pakhat, a min Simeon a um, cupa cu mi dik le Pathian a tlaihchanmi a si i Israel Hnangamtertu ding kha a rak hngak pengtu a si, a cungah Thiang Thlarau a um, 26Bawipa Krih a hmuh hlan pauh cu a thi lai lo tiah Thiang Thlarau nih a hngalhter cang. 27Cuticun Thlarau hruainâk in Ngakchia Jesuh cu nawlbia nih a fial bang i tuah awkah anu le apa nih an rak luhpi lio ah ṭempal chungah a lut, 28anih nih a rak pom i Pathian a thangṭhat; 29“Bawipa atu cu na bia bantukin nasalpa hi hnangam tein na kalter cang lai. 30Zeitintiah mi vialte hmai i na timhlamhmi 31Khamhnâk cu ka mit in ka hmuh cang. 32Nami Israel hna sunparnâk ding le, Gentel mi hna sin i phuan ding ceunâk cu a si,” tiah a ti. 33Amah kong i a chimmi hna cu Josef le anu nih mak an ti ngai ngai. 34Simeon nih annih cu thluachuah a pêk hna i anu Mary sinah, “Ngaihmanh, hi Ngakchia hi Isarel mi lakah mitampi tlukrilhnâk ding le mi tampi dirtertu dingah ruahmi a si. Mi nih an ralchanh te lainâk hmelchunhnâk he, 35mitampi nih lungthin i an ruahmi langhternâk caah, (nang zong na nunnâk cu feiin tleng lakin a chunhh te lai) tiah a ti. 36Profet nu pakhat, Anna, Asher phun chung i Fanuel fanu kha a um. A tar ngai ngai cang, Ngaknu thiang a si lio i a hmuhmi va he kum sarih an rak umṭi, 37hi nu hi kum 84 chung nuhmei a si, ṭempal kaltâk loin, chun zan hlan in thlacam le rawl ul in Pathian a biak tawn. 38Cu cân ah a ra i Pathian sinah lomhnâk bia a chim i Jerusalem khamh a si lai nâk â ruahchanmi vialte sinah a kong kha a chim tawn. 39Cubangin Bawipa nawlbia bang i thil vialte an tuah dih hnu ah Galili ram i an khua Nazarel ah an tlung ṭhân. 40Cun ngakchia cu a ṭhang lengmang i thlarau ah a ṭhawng chin lengmang, fimnâk in a khat i Pathian vêl kha a cungah a um. 41Kum chiar tein Lanhtâk Thô ah anu le pa cu Jerusalem ah an kal tawn. 42Cun kum 12 a si tikah, thô phung bantukin Jerusalem ah an kal. 43Thô a dih i an tlun tikah, pa Ngakchia Jesuh cu Jerusalem khua ah a câm. Josef le anu nih an hngal lo; 44anbu chungah â tel ve ko rua tiah an ruah, nikhat an kal hnu ah chungkhat le rualchan hna sinah an kawl. 45Cuticun an hmuh lo caah kawl pah in Jerusalem ah an kir. 46Nithum hnu ah ṭempal i cawnpiaktu hna sinah ṭhu in, an bia a ngaih i bia a rak hal len hna lio ah an va hmuh. 47A fimning le biahalnâk leh a thiamning kha an khuaruah a har dih. 48Amah an hmuh tikah mak an ti ngai ngai i anu nih, “Pa te, zeiruangahdah hibangin na kan tuah? Napa le keimah nih lungrethei in kan in kawl hi,” tiah a ti. 49Anih nih, “Zeiruangahdah nanka kawl? Ka Pa rianah ka um lai hi nan hngal lo maw?” tiah a ti. 50Asinain an sin i a chimmi bia cu a sullam an hngal lo. 51Cuticun an sinah a kal ve i Nazaret an phâk tikah an nawl tangah a um, asinain anu nih cuthil hna cu a lungchungin â cinken. 52Jesuh cu pum le fimnâkin a ṭhang i Pathian le minung mithmai ṭha a hmuh.
Currently Selected:
LUKA 2: HAKABSI
Highlight
Share
Copy
Want to have your highlights saved across all your devices? Sign up or sign in
Haka Chin NT with PSA and PRO - Laibaibal Thiang
Copyright © Bible Society of India, 2015.
Used by permission. All rights reserved worldwide.
