LUKA 3

1Tiberius Sizar a si kum hleinga nâkah, Pontius Pailat cu Judia ram Mangki a si. Herod cu Galili ram uktu a si i a nau Filip cu Ituria le Trakhonitis peng uktu a si. Lisanias cu Abilen ram uktu a si. 2Annas le Kaifas cu tlângbawi ngan an si lio ah, ramcar i Zakariah fapa Johan sinah Pathian bia a phân. 3Jordan tiva kam ram vialte a ṭol i sual ngaihthiamnâk caah ngaihchihnâk Baptisma kong kha a chimh hna. 4Profet Isaiah cauk chungah, “Ramcar chung i aunâk aw nih, Bawipa lam remh ulaw, a lam kha dinter u. 5Horkuang vialte chilh dih ulaw, mual le tlang kip niamter u, lamkawi mi dinter ulaw, lam bingboh mi ruanter u. 6Cun mi vialte nih Pathian khamhnâk cu an hmuh lai,” a ti, tiah â ṭial bangin. 7Anih nih, a sin i baptisma in awkah a rami mizapi sinah, “Rul fale hna, a ra laimi thinhunnâk zâmtâk dingin, ahonihdah ralrinnâk an pêk hna? 8Cucaah theitlai chuah lakin i ngaihchih u. Abraham tefa kan si, tiah ruat hlah u. Duh sehlaw, Pathian nih hi lung hna hmanh hi Abraham tefa ah a canter khawh, tiah kan ti hna. 9Atu thawkin thingkung hramkip ah hreitlung an chiah cang. Cucaah theitlai ṭha a tlai lomi thingkung pauh cu an hau i mei ah an hlawnh,” tiah a ti. 10Mizapi nih, “Zeidah kan tuah kun lai?” tiah an ti. 11Anih nih an sinah, “Angki pahnih a ngeimi pauh nih, a ngei lomi pe seh, ei awk a ngeimi pauh nih cubangin tuah ve seh,” tiah a leh hna. 12Ngunkhuai khawltu hna zong an ra i, “Cawnpiaktu, zeidah kan tuah lai?” tiah an ti. 13Anih nih, “Ri khiahmi nâk tamin khawl hrimhrim hna hlah u,” tiah a ti. 14Cubantuk ṭhiamṭhiam in ralkap zong nih, “Kannih ta zeidah kan tuah lai?” tiah an hal. Anih nih, “Ahohmanh va tlerh hna hlah u law, lih in va nam hna hlah u. Nan hlawh ah nan lung tling seh,” tiah a ti hna. 15Cuticun Johan kongah mipi ruahchannâk a sang chin. Krih a si ko lo maw, tiah an ruah lio ah, 16Johan nih a leh hna i an dihlak sinah, “Kei nih ti ah baptisma kan pêk hna; asinain keimahnâk i a ngan deuhmi a ra lio, a kedan hri phoih awk hmanh ah kâ tlâk lo. Amah nih mei le Thiang thlarau in baptisma an pêk hna lai. 17A kut in sisiap â ken i a hrih ah a zah lai, cun a fang kha bukah a khumh lai i a hi tu cu a mit lomi mei in a khangh lai,” tiah a ti. 18Cun mizapi sinah thapêknâk bia kha a chimh hna. 19Asinain siangpahrang Herod cu a nau nupi Herodi he an umṭinâk kongah le sualnâk dangdang a tuahmi kongah Johan nih a chimhhrin; 20cubantuk sualnâk a tuahmi vialte hlei ah Johan kha thong ah a thlak. 21Mi vialte nih baptisma an in lio ah, Jesuh zong nih baptisma a in ve, thla a cam lio ah van kha â ong. 22Cun Thiang thlarau cu ṭhuro pum bantukin a rung zuang i a cungah â fu, van in aw a rung chuak i, “Nangmah cu ka dawtmi Fapa na si; Na cungah ka lawm tak tak,” tiah a ti. 23Jesuh nih rianṭuan â thawk lio ah kum 30 a si i (mi ruahnâk ah) Josef fapa a si. 24cucu Mathat fa a si, cucu Levi fa a si, cucu Melki fa a si, cucu Janna fa a si, cucu Josef fa a si, 25cucu Mattathiah fa a si, cucu Amos fa a si, cucu Nahum fa a si, cucu Asli fa a si, cucu Naggai fa a si, 26cucu Maath fa a si, cucu Mattathias fa a si, cucu Simei fa a si, cucu Josef fa a si, cucu Judah fa a si. 27cucu Joanas fa a si, cucu Rhesa fa a si, cucu Zerubbabel fa a si, cucu Sheatiel fa a si, cucu Neri fa a si, 28cucu Melchi fa a si, cucu Addi fa a si, cucu Losam fa a si, cucu Elmodam fa a si, cucu Er fa a si. 29cucu Josea fa a si, cucu Eliezar fa a si, cucu Jorim fa a si, cucu Matthat fa a si, cucu Levi fa a si. 30cucu Simeon fa a si, cucu Judah fa a si, cucu Joseph fa a si, cucu Jonan fa a si, cucu Eliakim fa a si, 31cucu Melea fa a si, cucu Menan fa a si, cucu Mattathah fa a si, cucu Nathan fa a si, cucu David fa a si. 32cucu Jesse fa a si, cucu Obed fa a si, cucu Boas fa a si, cucu Salmon fa a si, cucu Nahshon fa a si, 33cucu Amminadab fa a si, cucu Ram fa a si, cucu Hezron fa a si, cucu Perez fa a si, cucu Judah fa a si. 34cucu Jakob fa a si, cucu Isac fa a si, cucu Abraham fa a si, cucu Terah fa a si, cucu Nahor fa a si. 35cucu Serug fa a si, cucu Reu fa a si, cucu Peleg fa a si, cucu Eber fa a si, cucu Shelah fa a si, 36cucu Cainan fa a si, cucu Arphaxad fa a si, cucu Shem fa a si, cucu Noah fa a si, cucu Lamech fa a si. 37cucu Methuselah fa si, cucu Enoch fa a si, cucu Jared fa a si, cucu Mahalalet fa a si, cucu Cainan fa a si, 38cucu Enosh fa a si, cucu Seth fa a si, cucu Adam fa a si, cucu Pathian fa a si.

Currently Selected:

LUKA 3: HAKABSI

Highlight

Copy