EKSODOS 10
10
Ki puit
1Nangta U Trai u ong ha u Moses, “Khie leit sha u Pharaoh. Nga la pynmutlop ïa u bad ki rangbah synshar jong u, khnang ba nga lah ban leh ïa kine ki kambah hapdeng jong ki, 2bad ba phi lah ban ïathuh ha ki khun ki ksiew jong phi kumno nga la pynpaw bieit ïa ki nong Ijipt haba nga leh ïa kine ki kambah. Phi baroh phin tip ba nga long U Trai.”
3Kumta u Moses bad u Aaron ki leit sha u Pharaoh, bad ki ong ha u, “U Trai, U Blei jong ki Hebru, u ong, ‘Sa katno te men kyntait ban pyndem ha nga? Pyllait ïa ki briew jong nga ba kin ïoh mane ïa nga. 4Lada me dang ïai kyntait, te ngan wallam ïa ki puit ha ka ri jong me. 5Kin jyllei kat haduh ba kin tap lin ïa ka khyndew baroh. Kin bam lut khoit ïa kata baroh kaba u phria um shym la pynjot, bad wat ïa ki dieng kiba dang sah. 6Kin dap ha ki ïingsyiem jong me, bad ha ki ïing jong ki rangbah synshar bad ki briew jong me baroh. Kin long kiba kham sniew ban ïa kano kano kaba ki kpa tymmen jong me ki la ju ïohi.’ ” Nangta u Moses u phai bad u mihnoh.
7Ki rangbah synshar jong u Pharaoh ki la ong ha u, “Sa katno te une u briew un pynjynjar ïa ngi? Pyllait noh ïa ki Israel, khnang ba kin ïoh mane ïa U Trai U Blei jong ki. Hato phim pat sngewthuh ba ka Ijipt ka la jot?”
8Kumta la wan ïalam biang ïa u Moses bad u Aaron sha u Pharaoh, bad u ong ha ki, “Phi lah ban leit bad mane ïa U Trai U Blei jong phi. Hynrei pynthikna mano ban leit?”
9U Moses u la jubab, “Ngin ïaleit lut baroh, kynthup ki khun jong ngi haduh ki tymmen jong ngi. Ngin ïalam ïa ki khun shynrang bad ki khun kynthei jong ngi, lem bad ki langbrot bad ki blang, bad ki masi jong ngi, namar ngi dei ban pynlong ka jingkhawai ban pyndonburom ïa U Trai.”
10U Pharaoh u ong, “Nga smai da U Trai ba lano lano ruh ngan ym shah ïa phi ban ïalam ïa ki kynthei bad ïa ki khun jong phi! Ka paw shai mynta ba phi don ka jingïasylla ban ïeng ïaleh pyrshah. 11Em! Tang ki shynrang ki lah ban leit bad mane ïa U Trai, lada kata ka long kaei kaba phi kwah.” Mar kumta, la beh noh ïa ki na khmat u Pharaoh.
12Te U Trai u ong ha u Moses, “Rah ïa la ka kti halor ka ri Ijipt ban wallam ïa ki puit. Kin wan bad bam ïa kaei kaei baroh kaba mih, ïa kaei kaei baroh kaba lait na u phria.” 13Kumta u Moses u rah ïa la u diengduh, bad U Trai u la pynlong ïa ka lyer na shaphang mihngi ban beh ha kata ka ri baroh shi sngi bad baroh shi miet. Ynda mynstep kata ka lyer mihngi ka wan kit ïa ki puit. 14#Jpw. 9:2,3Kita ki puit ki wan kynhun kynhun bad ki dem ha ka ri baroh kawei. Kat kata ka jingbun ki puit ym pat ju ïohi mynno mynno lane yn ym ïohi shuh lano lano ruh. 15Ki la tap ïa ka khyndew baroh kat haduh ba ka ïong ngaiñ da ki puit suda. Ki la bam ïa kaei kaei baroh kaba u phria u dang pynsah, kynthup ïa ki soh baroh ha ki dieng. Ym shym sah shuh kano kano kaba jyrngam ha u jingthung ne ha u dieng ha ka ri Ijipt baroh kawei.
16Nangta u Pharaoh u phah khot kyrkieh ïa u Moses bad u Aaron, bad u ong, “Nga la leh pop pyrshah ïa U Trai U Blei jong phi, bad ïa phi ruh. 17Mynta ha kane ka sien to map ïa ka pop jong nga bad duwai ha U Trai U Blei jong phi ban shim noh na nga ïa kane ka jingpynshitom kaba shyrkhei na nga.” 18Kumta u Moses u leit noh na u Pharaoh, bad u la duwai ha U Trai. 19Bad U Trai u la pynkylla ïa ka lyer mihngi sha ka lyer sepngi kaba jur, kaba la rong noh ïa ki puit bad bret ïa ki sha ka Duriaw Basaw. Ym shym sah shuh uwei ruh u puit ha ka ri Ijipt baroh kawei. 20Hynrei U Trai u pynmutlop ïa u Pharaoh, bad kumta um shym pyllait ïa ki Israel ban leit.
Ka jingdum
21Nangta U Trai u la ong ha u Moses, “Rah ïa la ka kti shajrong ba ka jingdum kaba rben la kumba lah ban tba ïa ka, kan tap ïa ka ri Ijipt.” 22#Salm. 105:28; Jpw. 16:10U Moses u rah ïa la ka kti shajrong, bad kumta ka ri Ijipt baroh kawei ka la dum ngaiñ lai sngi lynter. 23Ki nong Ijipt kim ïohi shuh parabriew, bad ym don uwei ruh uba mih na la ïing ha kita ki sngi. Hynrei ha ka jaka ba ki Israel ki shong, ka don ka jingshai.
24U Pharaoh u la phah khot ïa u Moses, bad u la ong, “Phi lah ban leit bad mane ïa U Trai; wat ki kynthei bad ki khynnah ruh ki lah ban leit ryngkat bad phi. Hynrei ki langbrot, ki blang bad ki masi jong phi ki dei ban don hangne.”
25U Moses u jubab, “Lada kumta, phin hap pynbiang ïa ngi da ki mrad na ka bynta ki jingkñia bad ki jingainguh thang ban ai ha U Trai U Blei jong ngi. 26Em, ngin ïalam ïa ki mrad jong ngi lem bad ngi; yn ym don kawei ruh ïa ka ban iehnoh shadien. Ngin sa jied hi ïa ki mrad da kiba ngin mane ïa U Trai U Blei jong ngi. Bad katba ngim pat poi hangta, ngin ym tip ki jingri kiba kumno ngin kñia ha u.”
27U Trai u la pynmutlop ïa u Pharaoh, bad um shym la shah ïa ki ban leit. 28U la ong ha u Moses, “Mihnoh nangne! Ngam kwah shuh ban ïohi ïa me! Ha ka sngi ba nga ïohi ïa me, men ïap!”
29“Ka dei kaba phi ong,” U Moses u jubab. “Phin ym ïohi shuh ïa nga lano lano.”
Currently Selected:
EKSODOS 10: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
