EKSODOS 9
9
Ka jingïap ki jingri
1U Trai u ong ha u Moses, “Khie leit sha u Pharaoh bad ïathuh ha u ba U Trai, U Blei jong ki Hebru, u ong, ‘Pyllait ïa ki briew jong nga khnang ba ki lah ban mane ïa nga. 2Lada me kyntait biang ban shah ïa ki ban leit, 3ngan pynshitom ïa me da kaba phah ïa ka jingpang kaba shyrkhei ha ki jingri jong me baroh — ha ki kulai, ki kada, ki ut, ki masi, ki langbrot bad ki blang jong me. 4Ngan pynïapher ïa ki jingri jong ki Israel na ki jong ki nong Ijipt, bad kumta yn ym don wat kawei ruh ka jingri ki Israel ka ban ïap noh. 5Ma nga, U Trai nga la buh ïa ka sngi kaba la shai kum ka por ha kaba ngan leh ïa kane.’ ”
6Ha ka sngi kaba bud, U Trai u la leh kumba u la ong bad ki jingri baroh jong ki nong Ijipt ki la ïap, hynrei kawei ruh na ki jingri jong ki Israel kam shym ïap. 7U Pharaoh u phah kylli ïa kaei kaba la jia bad la ïathuh ba na ki jingri jong ki Israel ym don satia kaba ïap. Hynrei u dang mutlop hi bad um shah ïa u paidbah ban leit.
Ki tohjaw
8Nangta U Trai u la ong ha u Moses bad u Aaron, “Shim katto katne kham u dpei na ka lawar ding; u Moses un kynting ïa u shajrong ha khmat u Pharaoh. 9Uta u dpei un sa her kum u pui pui uba ni ha ka ri Ijipt baroh, bad kat haba u hap un pynmih ki tohjaw kiba kylla prum ha u briew bad ha u mrad.” 10#Jpw. 16:2Kumta ki la rah khyndiat u dpei bad ki la ïeng ha khmat u Pharaoh; U Moses u la kynting ïa uta u dpei sha ka lyer, bad u dpei u la pynmih ïa ki tohjaw kiba kylla prum ha u briew bad ha u mrad. 11Ki nongleh myntor kim lah ïeng shuh ha khmat u Moses namar ki la ïa-ïoh tohjaw lut kumba long lem kiwei pat ki nong Ijipt. 12Hynrei U Trai u la pynmutlop ïa u Pharaoh bad, kumba u la lah ong, u Pharaoh um shym shahshkor ïa u Moses bad u Aaron.
U phria
13Te U Trai u ong ha u Moses, “Lashai dang step, leit ïakynduh ïa u Pharaoh bad ïathuh ha u ba U Trai, U Blei jong ki Hebru, u ong, ‘Pyllait ïa ki briew jong nga, khnang ba ki lah ban mane ïa nga. 14Naba ha kane ka kynti ngan pynshitom ym tang ïa ki rangbah synshar bad ïa ki briew jong me, hynrei ïa me hi ruh, khnang ba men ïoh tip ba ym don uba kum ma nga ha ka pyrthei baroh. 15Lada nga la rah ïa la ka kti bad shoh ïa me bad ki briew jong me da ka jingpang, phin jin da la ïap lut khoit. 16#Rom. 9:17Hynrei ban pyn-i ha me ïa ka bor jong nga, nga la shah ba men dang im, khnang ba yn ïoh pynbna ïa ka kyrteng jong nga ha ka pyrthei baroh kawei. 17Pynban me dang sngew hangamei, bad me kyntait ban pyllait ïa ki briew jong nga. 18Lashai hamar kane ka por, ngan pynhap da u phria uba jur, uba kat uta ka ri Ijipt kam pat ju tip mynno mynno ha ka histori jong ka. 19Mynta ai hukum ban pynrieh ïa ki jingri jong me bad ïa kiwei kiwei pat baroh kiba me don ha lum. U phria un hap ha ki briew bad ki mrad kiba don habar khlem jingda, bad baroh kin ïap lut.’ ” 20Katto katne na ki rangbah synshar jong u Pharaoh ki la sheptieng namar kaei kaba U Trai u la kren, bad ki wan ïalam noh kloi ïa la ki mraw bad ïa la ki jingri shapoh ïing. 21Kiwei pat kim suidñiew ïa ka jingmaham U Trai bad ki ieh ïa la ki mraw bad ïa la ki jingri ha lum.
22Nangta U Trai u ong ha u Moses, “Rah ïa la ka kti shajrong, bad u phria un hap ha ka ri Ijipt baroh kawei — ha ki briew, ha ki mrad, bad ha ki jingthung baroh kiba ha lyngkha.” 23Kumta u Moses u rah ïa la u diengduh shajrong, bad U Trai u phah ïa u pyrthat bad ïa u phria, bad ka leilieh ruh ka la tied ïa ka khyndew. U Trai u phah ïa u phria uba jur, lem bad ka leilieh kaba thaba. 24#Jpw. 8:7; 16:21Ka la long ka 'erïong kaba jur tam ba ka Ijipt ka la mad ha ka histori jong ka baroh. 25Kylleng ka ri Ijipt, u phria u shoh lut plain kat ïa kiba don habar, kynthup ïa ki briew bad ïa ki mrad baroh. U la pynjulor naphang ïa ki jingthung baroh ha lyngkha, bad u la pynkheiñ lut ruh ïa ki dieng baroh. 26Ka thain Goshen, ha kaba ki Israel ki shong ki sah, ka long tang ma ka, ka jaka ha kaba u phria um shym hap.
27U Pharaoh u la phah khot ïa u Moses bad u Aaron, bad u ong ha ki, “Ha kane ka sien nga la leh pop; U Trai u leh ïa kaba dei; ma nga bad ki briew jong nga ngi la leh bakla. 28To duwai ha U Trai! Ngi la shah la biang ïa une u pyrthat bad u phria! Nga kular ban pyllait ïa phi; phim donkam ban dang sah shuh hangne.”
29U Moses u ong ha u, “Nga tang shu poi shabar kane ka shnong, ngan duwai ha U Trai. U pyrthat un sangeh, bad u phria un ym hap shuh, ba phin ïoh tip ba ka pyrthei ka long ka jong U Trai. 30Hynrei nga tip ba ma phi bad ki rangbah synshar jong phi phim pat sheptieng ïa U Trai.”
31U 'saihon bad u barli ki la duh khoit, namar u barli u la ih bad u 'saihon pat u dang shylluit. 32U kew te um shym julor, namar ba u ih kham hadien.
33U Moses u mihnoh na u Pharaoh, u leit shabar ka nongbah, bad u la rah ïa la ki kti ha ka jingduwai ha U Trai. U pyrthat, u phria, bad u slap ki la sangeh. 34Haba u Pharaoh u la ïohi ïa kaei kaba la jia, u la leh pop biang. Ma u bad ki rangbah synshar jong u ki la ïailong kiba mutlop kum mynshuwa, 35bad kumba U Trai u la lah kren lyngba u Moses, u Pharaoh um shym pyllait ïa ki Israel ban leit.
Currently Selected:
EKSODOS 9: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
