EKSODOS 7
7
1U Trai u ong ha u Moses, “Ngan pynlong ïa me kum U Blei ha u Pharaoh, bad u Aaron u hynmen jong me un kren ha u kum u nongïathuhlypa jong me. 2Ïathuh ha u Aaron ïa kaei kaei baroh kaba nga hukum ïa me, bad un ïathuh ha u Pharaoh ba un shah ïa ki Israel ban mihnoh na ka ri jong u. 3-4#Ki Kam. 7:36Hynrei ngan pynmutlop ïa u Pharaoh, bad un ym shahshkor ïa me, kam pher katno kiei kiei kiba shyrkhei ba nga leh ha ka ri Ijipt. Nangta ngan wallam ka jingpynshitom kaba tyngeh ha ka Ijipt bad ngan ïalam ïa ki jait jong ki briew jong nga na ka ri Ijipt. 5Te ki nong Ijipt kin tip ba nga long U Trai, haba nga rah ïa la ka kti pyrshah ïa ki bad ïalam noh ïa ki Israel na ka ri jong ki.” 6U Moses bad u Aaron ki leh ïa kaei kaba U Trai u la hukum. 7Ha kata ka por mynba ki la kren ha u Pharaoh, u Moses u la don phraphew snem ka rta bad u Aaron u la don phraphew lai snem.
U diengduh jong u Aaron
8U Trai u ong ha u Moses bad u Aaron, 9“Lada u Pharaoh u dawa ba phin pynshisha ïa lade da kaba leh kambah, ong ïa u Aaron ban shim ïa la u diengduh bad bret ïa u ha khmat u Pharaoh, bad un sa kylla bseiñ.” 10Kumta u Moses bad u Aaron ki leit sha u Pharaoh bad ki leh kumba U Trai u la hukum. U Aaron u bret ïa la u diengduh ha khmat u Pharaoh bad ha khmat ki rangbah pynïaidkam jong u, bad u kylla bseiñ. 11Nangta u Pharaoh u phah khot ïa ki riewstad bad ïa ki nongleh myntor jong u, bad ki ruh ki leh kumjuh da ka myntor jong ki. 12Ki la bret ïa la ki diengduh, bad kita ki kylla bseiñ. Hynrei u diengduh jong u Aaron u la nguid ïa ki diengduh jong ki. 13U Pharaoh, pynban, u la ïai mutlop bad kumba U Trai u la ong, u Pharaoh um shym shahshkor ïa u Moses bad u Aaron.
Ki jingpynjot kiba shoh ïa ka ri Ijipt
Ka snam
14Nangta U Trai u la ong ha u Moses, “U Pharaoh u long uba mutlop eh bad u kyntait ban shah ïa ki paidbah ban leit. 15Kumta khie leit bad ïakynduh ïa u mynstep ha ka por ba u leit hiar sha ka wah Nile. Rah bad me ïa u diengduh ïa uba la pynkylla bseiñ, bad ap ïa u harud wah. 16Nangta ong ha u Pharaoh, ‘U Trai, U Blei jong ki Hebru, u la phah ïa nga ban ong ha phi ba phin shah ïa ki briew jong u ban leit, khnang ba kin ïoh ban mane ïa u ha ri shyiap. Hynrei haduh mynta phim shym shahshkor. 17#Jpw. 16:4Mynta te, ko Syiem Kynrad, U Trai u ong ba phin sa tip u long uei da kaei kaba un sa leh. Ha khmih, ngan tied ïa ka sla um da une u diengduh, bad ka um kan kylla snam. 18Ki dohkha kin ïap, bad ka wah kan sa iwtung eh kat haduh ba ki nong Ijipt kin ym nud ban dih um na ka.’ ”
19U Trai u ong ha u Moses, “Ong ïa u Aaron ban shim ïa la u diengduh bad ban rah ïa u halor ki wah, ki nur-um, bad ki pukri um baroh ha ka ri Ijipt. Ka um kan kylla snam, bad ha ka ri baroh kawei kan don ka snam, wat ha ki khiew dieng bad ki khiew maw ruh.”
20Nangta U Moses bad u Aaron ki la leh kumba U Trai u la hukum. Ha khmat jong u Pharaoh bad ha khmat ki rangbah pynïaidkam jong u, u Aaron u la rah ïa la u diengduh bad u tied ïa ka sla um jong ka wah Nile, bad ka um baroh ka la kylla snam. 21Ki dohkha ha ka wah ki la ïap, bad ka la sma iwtung eh kat haduh ba ki nong Ijipt kim nud shuh ban dih um na ka. Ka snam ka la don ha kylleng ka ri Ijipt. 22Nangta ki nongleh myntor jong u Pharaoh ki la leh kumjuh da ka myntor jong ki; bad u Pharaoh u dang mutlop hi kumba u long. Kumba U Trai u la lah ong, u Pharaoh u la kyntait ban shahshkor ïa u Moses bad u Aaron. 23Pynban, u la phai wak bad u leit noh sha la ka ïingsyiem khlem da pynleit jingmut ei ei ruh em shaphang kane. 24Ki nong Ijipt baroh ki ïatih shi lynter ïa ka rudwah baroh ban ïoh umdih, namar kim lah shuh ban dih ïa ka um na ka wah.
25Hynñiew sngi ki la leit hadien ba U Trai U la shoh ïa ka wah.
Currently Selected:
EKSODOS 7: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
