EKSODOS 6
6
1Nangta U Trai u la ong ha u Moses, “Mynta men sa ïohi aïu ngan leh ïa u Pharaoh. Ngan pynbor ïa u ban shah ïa ki briew jong nga ban leit. Ha ka jingshisha, ngan pynbor ïa u ban beh noh ïa ki na ka ri jong u.”
U Blei u khot ïa u Moses
2 #
Jen. 17:1; 28:3; 35:11; Eks. 3:13-15 Te U Blei u la kren ha u Moses bad u la ong, “Nga long U Trai. 3Nga la mihpaw ha u Abraham, ha u Isaak, bad ha u Jakob, kum U Blei Badonbor Baroh, hynrei ngam shym la pynithuh ïa lade ha ki da ka kyrteng bakhuid jong nga, U Trai. 4Nga la pynlong ruh ka jutang bad ki, da kaba kular ban ai ha ki ïa ka ri Kanaan, ka ri ha kaba ki la shong la sah kum ki sohshnong. 5Mynta nga la ïohsngew ïa ka jingud jong ki Israel, ïa kiba ki nong Ijipt ki la teh mraw, bad nga la kynmaw ïa la ka jutang. 6Kumta ïathuh ïa ki Israel ba nga ong ha ki, ‘Nga long U Trai; ngan pyllait ïa phi bad pyllaitluid ïa phi na ka jinglongmraw jong phi ha ki nong Ijipt. Ngan rah ïa ka ksang'ti badonbor jong nga ban wallam ka jingpynshitom bashyrkhei halor jong ki, bad ngan pynim ïa phi. 7Ngan pynlong ïa phi ki briew jong nga, bad nga ngan long U Blei jong phi. Phin sa tip ba nga long U Trai U Blei jong phi haba nga pyllaitluid ïa phi na ka jinglongmraw ha ka ri Ijipt. 8Ngan ïalam ïa phi sha ka ri kaba nga la kular skhem ban ai ha u Abraham, ha u Isaak, bad ha u Jakob; bad ngan ai ïa ka ha phi kum ka nongkynti jong phi hi. Nga long U Trai.’ ” 9U Moses u la ïathuh ïa kane ha ki Israel, hynrei kim shym sngap ïa u, namar ka mynsiem jong ki ka la pait la pra na kata ka jinglongmraw basohsat jong ki.
10Nangta U Trai u la ong ha u Moses, 11“Khie leit bad ong ha u Pharaoh ba u dei ban shah ïa ki Israel ban mihnoh na ka ri jong u.”
12Hynrei u Moses u phai ktien, “Wat ki Israel ruh kim shym sngap ïa nga, u Pharaoh lei shano un sngap? Nga dei u briew uba duna ka ktien ka thylliej.”
13U Trai u la hukum ïa u Moses bad ïa u Aaron; “Ïathuh ha ki Israel bad ha u Pharaoh ba nga la hukum ïa phi ban ïalam noh ïa ki Israel na ka ri Ijipt.”
Ka thup buh jingkynmaw ïa ka longïing jong u Moses bad u Aaron
14U Reuben, u khun nyngkong jong u Jakob, u don saw ngut ki khun shynrang: U Hanokh, u Pallu, u Hesron, bad u Karmi; kine ki la long ki kpa tymmen jong kito ki jait kiba ai kyrteng da ki. 15U Simeon u don hynriew ngut ki khun shynrang: u Jemuel, u Jamin, u Ohad, u Jakhin, u Sohar, bad u Shaul u khun jong ka kynthei nong Kanaan; kine ki la long ki kpa tymmen jong kito ki jait kiba ai kyrteng da ki. 16#Jkhñ. 3:17-20; 26:57,58; 1 Khrn. 6:16-19U Lebi u don lai ngut ki khun shynrang: u Gershon, u Kohath, bad u Merari; kine ki la long ki kpa tymmen jong kito ki jait kiba ai kyrteng da ki. U Lebi u la im haduh shispah laiphew hynñiew snem ka rta. 17U Gershon u don ar ngut ki khun shynrang: u Libni bad u Shimei, bad ki ruh ki don bun ki khun ki ksiew. 18U Kohath u don saw ngut ki khun shynrang: u Amram, u Ishar, u Hebron, bad u Ussiel. U Kohath u la im haduh shispah laiphew lai snem ka rta. 19U Merari u don ar ngut ki khun shynrang: U Mahli bad u Mushi. Kine ki long ki jait jong ki Lebi lem bad ki khun ki ksiew jong ki.
20U Amram u shongkurim ïa ka Jokhebed, ka para jong u kpa jong u, bad ka la kha ïa u Aaron bad u Moses. U Amram u la im haduh shispah laiphew hynñiew snem ka rta. 21U Ishar u don lai ngut ki khun shynrang: u Korah, u Nepheg, bad u Sikhri. 22U Ussiel ruh u don lai ngut ki khun shynrang: u Mishael, u Elsaphan, bad u Sithri.
23U Aaron u shongkurim ïa ka Elisheba, ka khun jong u Amminadab bad ka para jong u Nahshon. Ka la kha ïa u Nadab, u Abihu, u Eleasar, bad u Ithamar. 24U Korah u la don lai ngut ki khun shynrang: u Assir, u Elkanah, bad u Abiasaph; kine ki la long ki kpa tymmen jong ka jait Korah. 25U Eleasar u khun jong u Aaron u la shongkurim ïa kawei na ki khun kynthei jong u Putiel, bad ka la kha ïa u Phinehas. Kine ki la long ki khlieh jong ki kur bad ki jait kiba mih na u Lebi.
26U Aaron bad u Moses ki la long kita ha kiba U Trai u la ong, “Ïalam noh ïa ki jait Israel na Ijipt.” 27Dei ruh ma ki kiba la ong ha u Pharaoh ban pyllait noh ïa ki Israel.
U Trai u hukum ïa u Moses bad ïa u Aaron
28Mynba U Trai u la kren ha u Moses ha ka ri Ijipt, u la ong, “Nga long U Trai. 29Ïathuh ha u Pharaoh ïa kaei kaei baroh kaba nga la ong ha me.”
30Hynrei u Moses u la jubab, “Me tip ba nga long uba duna ha ka ktien ka thylliej; kumno keiñ u Pharaoh un shahshkor ïa nga?”
Currently Selected:
EKSODOS 6: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
