EKSODOS 5
5
U Moses bad u Aaron ha khmat u Pharaoh
1Nangta u Moses bad u Aaron ki leit sha u Pharaoh, bad ki la ong, “U Trai, U Blei ki Israel, u ong, ‘Shah ïa ki briew jong nga ban leit, khnang ba kin ïoh pynlong ïa ka Jingkhawai Niam ha ka ri shyiap ban pyndonburom ïa nga.’ ”
2“Uei uta U Trai?” u Pharaoh u kylli. “Balei ba nga dei ban shahshkor ïa u, bad shah ïa ki Israel ban leit? Ngam ithuh ïa U Trai, bad ngam shah ïa ki Israel ban leit.”
3U Moses bad u Aaron ki la jubab, “U Blei jong ki Hebru u la pynpaw ïa lade ha ngi. Shah ïa ngi ban leit lai sngi sha ka ri shyiap ban ai jingkñia ha U Trai uba U Blei jong ngi. Lada ngim leh kumta, un sa pynïap ïa ngi da ka jingpang lane da ka thma.”
4Hynrei u Pharaoh u la ong ha u Moses bad u Aaron, “Phi mut kumno da kaba pynlong ïa ki briew ban leh klet ïa la ki kam? Ong ïa ki ban leit sha la ki kam ki kam! 5Phi mynta phi la kham ïabun paid ban ïa ki nong Ijipt. Bad mynta phi kwah ban sangeh trei!”
6Ha kajuh ka sngi, u Pharaoh u la hukum ïa ki nong Ijipt kiba pyntrei mraw bad ïa ki rangbah Israel kiba pynïaidkam: 7“Wat ai phlangïap#5:7 phlangïap: Kane ka kyntien ka kynthup ruh ïa u skum kew, u skum kba bad kiwei kiwei de ki jait phlang kiba long ban pyndonkam ha kaba shna maw-it. shuh ïa kine ki briew ban shna maw-it. Ieh kin leit ïawad phlangïap hi da lade. 8Hynrei khmih ba kin shna katjuh ki maw-it kumba mynshuwa; tang uwei ruh ym dei ban duna. Kim da bunkam eh, bad dei namar kata ba ki ïai kyrpad ïa nga ban shah ïa ki ban leit bad ai ki jingkñia sha U Blei jong ki! 9Pyntrei shitom kham tyngeh ïa kine ki briew bad pynbunkam ïa ki, khnang ba kin ym don por ban shahshkor ïa ki nia lamler.”
10Kumta ki nongpyntrei mraw bad ki rangbah Israel kiba pynïaidkam ki la mihnoh bad ki la ong ha ki Israel, “U Pharaoh u ong ba un ym ai phlangïap shuh ïa phi. 11Phi hap ban leit ïawad hi kat naba phi lap, hynrei phi dei ban shna katjuh ki maw-it.” 12Kumta kita ki briew ki leit wad phlangïap kylleng ka ri Ijipt. 13Ki nongpyntrei mraw ki ïai pyrshang ban pynbor ïa ki ban shna katjuh ki maw-it man ka sngi kumba ki la shna mynba dang ai phlangïap ïa ki. 14Te ki nong Ijipt kiba pyntrei mraw ki shoh ïa ki rangbah Israel kiba pynïaidkam, ha kiba ki la buh ban khmih ïa ka kam. Ki la dawa, “Balei ba phim shym shna katjuh ki maw-it kumba phi la ju shna mynshuwa?”
15Nangta ki rangbah pynïaidkam ki leit sha u Pharaoh bad ki la ujor, “Ko Syiem Kynrad, balei phi leh ïa kane ha ngi? 16Ym shym la ai phlangïap shuh ïa ngi, hynrei la ïai hukum ïa ngi ban shna maw-it! Bad mynta pat ngi shah shoh. Dei ki briew jong phi keiñ kiba bakla.”
17U Pharaoh u la jubab, “Phi kiba jaipdeh bad phim kwah ban treikam, bad dei kata balei ba phi kyrpad ïa nga ban shah ïa phi ban leit bad ai ki jingkñia sha U Trai. 18Mynta khie leit sha la ka kam! Yn ym ai phlangïap shuh ïa phi, hynrei phi dei ban pynmih katjuh ki maw-it.” 19Ki rangbah pynïaidkam ki la don ha ka jingjynjar haba la bthah ba ki dei ban shna katjuh ki maw-it man ka sngi kumba ki la ju shna mynshuwa.
20Haba ki dang mihnoh, ki ïakynduh ïa u Moses bad u Aaron, kiba ap ïa ki. 21Ki la ong ha u Moses bad u Aaron, “U Trai u la ïohi ïa kaei kaba phi la leh, bad un pynshitom ïa phi namar ba phi pynlong ïa u Pharaoh bad ïa ki rangbah pynïaidkam jong u ban isih ïa ngi. Phi la ai daw ïa ki ban pynïap ïa ngi.”
U Moses u ujor ha U Trai
22Nangta u Moses u la phai biang sha U Trai bad u la ong, “A Trai, balei me lehbeiñ sat ïa la ki briew? Balei me phah ïa nga shane? 23Naduh ba nga la leit sha u Pharaoh ban ïakren na ka bynta jong me, u la lehbeiñ tyngeh ïa ki. Bad mem shym la leh ei ei ban ïarap ïa ki!”
Currently Selected:
EKSODOS 5: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
