EKSODOS 4
4
U Blei u ai ha U Moses ka bor ban leh kambah
1Te U Moses u jubab ïa U Trai, “Hynrei tharai ki Israel kin ym ngeit ïa nga, bad kin ym shahshkor ïa kaei kaba nga ong. Ngan leh kumno lada ki ong ba mem shym la paw ha nga?”
2Kumta U Trai u kylli ïa u, “Aïu me bat ha la ka kti?”
“U diengduh,” u jubab.
3U Trai u la ong, “Bret ïa u ha madan.” Haba u Moses u bret ïa u, uta u diengduh u kylla bseiñ, bad u Moses u phet na uta. 4Nangta U Trai u ong ïa u Moses, “Dem bad shim ïa u na u tdong.” Kumta u Moses u dem bad u kem ïa u, bad u kylla diengduh pat. 5U Trai u la ong, “Leh ïa kane ban pynshisha ha ki Israel ba U Trai, U Blei jong ki kpa tymmen jong ki, U Blei jong u Abraham, u Isaak bad u Jakob, u la mihpaw ha me.”
6U Trai u kren biang ha u Moses, “Bsuh ïa la ka kti shapoh ka jaiñkup jong me.” U Moses u la kohnguh; bad ynda u sei pat ïa la ka kti, ka la ïoh jingpang kaba la tap da ki jingthohlieh, kum ka ïor. 7Nangta U Trai u ong, “Bsuh biang ïa kato ka kti jong me shapoh ka jaiñkup jong me.” U ruh u leh kumta, bad haba u sei ïa ka, u ïohi ba ka la koit pat, kumba ka long mynshuwa. 8U Trai u la ong, “Lada kim ngeit ïa me lane kim lah pdiang ïa ka kambah kaba nyngkong, te kane kan pynngeit ïa ki. 9Lada jia ba kim ngeit ïa kine ki kambah baroh ar, bad lada ki kyntait ban shahshkor ïa kaba me ong, shim khyndiat ka um na ka wah Nile bad theh ïa ka ha ka khyndew. Kata ka um kan sa kylla snam.”
10Hynrei u Moses u ong, “Em, ko Trai, wat phah ïa nga. Ngam ju long u nongkren ba-pnah, bad ngam shym long kum uwei na kita naduh ba me la sdang ban kren ïa nga. Nga long u bym pnah ban kren, uba suki bad uba thlun.”
11U Trai u la ong ha u, “Uei uba ai ha u briew ïa ka shyntur? Uei uba pynlong ïa u uba kyllut ne u bymnang kren? Uei uba ai ha u ïa ka jingïohi ne pynlong ïa u, uba matlah? Dei ma nga, U Trai. 12Mynta, khie leit! Ngan ïarap ïa me ban kren, bad ngan ïathuh ïa me aïu men ong.”
13Hynrei u Moses u jubab, “Em, Kynrad, sngewbha phah noh dano dano.”
14Ha kane U Trai u la bitar ïa u Moses, bad u ong, “Kumno shaphang u para jong me U Aaron, u Lebi? Nga tip u tbit bha ban kren. Ha ka jingshisha, mynta u dang wan ban ïakynduh ïa me bad un kmen ban ïohi ïa me. 15Me lah ban ïakren bad u, bad ïathuh ha u ïa kaei kaba un ong. Ngan ïarap ïa phi baroh ar ngut ban kren, bad ngan ïathuh ha phi aïu phin leh. 16U un long u nongpynkren lem jong me bad un kren ha u paidbah na ka bynta jong me. Nangta me pat men long kum U Blei, da kaba ïathuh ha u aïu un ong. 17Shim ïa une u diengduh bad me, namar da u men sa leh ïa ki kambah.”
U Moses u wan phai sha Ijipt
18Nangta u Moses u leit phai sha u Jethro, u kthaw kurim jong u, bad u ong ha u, “Sngewbha shah ïa nga ban leit phai sha la ki ba-ha-ïing ha-sem ha Ijipt, ban leit khmih la ki dang im ne em.” U Jethro u mynjur bad u la kren khublei ïa u.
19Katba u Moses u dang don ha Midian, U Trai u ong ha u, “Khie leit phai sha Ijipt, namar ba kito baroh kiba thmu ban pynïap ïa me ki la ïap.” 20Kumta u Moses u ïalam ïa la ka tnga bad ïa la ki khun shynrang, u pynshong ïa ki ha ka kada, bad u leit bad ki sha Ijipt, u da rah ïa u diengduh uba U Blei u la ong ïa u ban rah.
21U Trai u la ong biang ha u Moses, “Mynta ba me leit phai sha Ijipt, da kynmaw ban leh ha khmat u Pharaoh ïa ki kambah baroh kiba nga la ai ha me ïa ka bor ban leh. Hynrei ngan pynmutlop ïa u Pharaoh, bad un ym shah ïa u paidbah ban leit. 22Te me dei ban ong ha u ba ma nga, U Trai, nga ong, ‘U Israel u long u khun nyngkong jong nga. 23#Eks. 12:29Nga la ong ïa me ban shah ïa u khun jong nga ban leit, khnang ba un ïoh mane ïa nga, hynrei me la kyntait. Mynta te ngan pynïap ïa u khun nyngkong jong me.’ ”
24Ha ka jaka sahmiet ha lynti, U Trai u ïashem bad u Moses, bad u mut ban pynïap noh ïa u. 25-26Te ka Sipporah ka tnga jong u, ka la shim ïa u maw uba nep, ka otsher ïa u khun jong ka, nangta ka pyndei tiak da ka doh otsher ïa ki kjat#4:25-26 ki kjat: Kine ki thup kyntien ki dei ki kyntien donakor (euphemism) ha kaba ki Hebru ki pyndonkam ha ka jingmut kaba thew ïa ka jaka leit bar jong u briew. u Moses. Namar ka jinglehniam ka jingotsher ka la ong ha u Moses, “Me long u tnga da ka snam ïa nga.#4:25-26 Me long u tnga da ka snam ïa nga: Kine ki kyntien ki mut ba ka Sipporah ka pyllait ïa u Moses na ka jingshah pynïap (dkhot 24) da kaba pyndei ïa ka doh otsher na u khun jong ka kaba dang bit snam.” Kumta U Trai u la pynsah ïa ka jingim u Moses.
27Ha kajuh ka por U Trai u la ong ha u Aaron, “Khie leit sha ka ri shyiap ban ïakynduh ïa u Moses.” Kumta u leit ban ïakynduh ïa u ha uta u lum bakhuid; bad haba u ïashem bad u, u doh ïa u. 28Nangta u Moses u ïathuh ha u Aaron ïa kiei kiei baroh kiba U Trai u la ong mynba u phah ïa u ban leit phai sha Ijipt; u ïathuh ruh ha u shaphang ki kambah kiba U Trai u la hukum ïa u ban leh. 29Kumta u Moses bad u Aaron ki leit sha Ijipt bad ki ïalumlang ïa ki nongïalam baroh jong ki Israel. 30U Aaron u ïathuh ha ki ïa kiei kiei baroh kiba U Trai u la kren ha u Moses, bad nangta u Moses u leh ïa ki kambah baroh ha khmat ki paidbah. 31Ki paidbah ki la ngeit, bad haba ki ïohsngew ba U Trai u la wan sha ki bad ba u la ïohi kumno ki la shah lehbeiñ tyngeh, ki la nguh la dem bad ki la ïamane ruh.
Currently Selected:
EKSODOS 4: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
