EKSODOS 3

U Blei u khot ïa u Moses

1Ha kawei ka sngi katba u Moses u dang ap ïa ka kynhun langbrot jong u Jethro, u kthaw kurim jong u, u lyngdoh ka Midian, u ïalam ïa kata ka kynhun lyngba ka ri shyiap, bad u wan poi ha Sinai, u lum uba khuid. 2#Ki Kam. 7:30-34Hangta u angel jong U Trai u la mihpaw ha u ha ka dur ka thylliej ding napdeng kawei ka 'lawlynnong. U Moses u ïohi ba kata ka 'lawlynnong ka la kem ding, hynrei kam shym ing satia. 3“Kane te kaba iphylla,” u la pyrkhat. “Balei ba ka 'lawlynnong kam shym ing duh? Ngan da leit kham hajan bad peit.”

4Haba U Trai u ïohi ba u Moses u wan kham hajan, u khot ïa u napdeng kata ka 'lawlynnong, bad u ong, “Moses! Moses!”

U ruh u jubab, “Oi! Nga don hangne.”

5“Wat wan sha jan,” ong U Blei. “Loit noh ïa la ki juti, namar me ïeng ha ka jaka kaba khuid. 6Nga long U Blei jong ki kpa tymmen jong me, U Blei jong u Abraham, u Isaak bad u Jakob de.” Kumta u Moses u tap ïa la ka khmat, namar um nud ban peit sha U Blei.

7Nangta U Trai u ong, “Nga la ïohi haduh katno la pynshitom beiñ ïa ki briew jong nga ha Ijipt; nga la ïohsngew ruh ba ki ud ban ïohlait noh na ki nongpyntrei mraw jong ki. Nga tip ïa ki jingshah shitom jong ki baroh, 8bad kumta nga la wan ban pyllait ïa ki na ki nong Ijipt bad ban ïalam noh ïa ki na ka ri Ijipt sha kata ka ri kaba ïar bad kaba seisoh, kaba tuid da ka dud bad ka ngap, ha kaba ki Kanaan, ki Hit, ki Amor, ki Peris, ki Hib bad ki Jebus ki shong mynta. 9Da shisha nga la ïohsngew ïa ka jingud ki briew jong nga, bad nga la ïohi ruh kumno ki nong Ijipt ki pynshitom beiñ ïa ki. 10Mynta nga phah ïa me sha u Pharaoh khnang ba men ïalam noh ïa ki Israel, ki briew jong nga, na Ijipt.”

11Hynrei u Moses u ong ha U Blei, “Ngam long ei ei. Kumno nga lah ban leit sha u Pharaoh bad ban ïalam noh ïa ki Israel na Ijipt?”

12U Blei u jubab, “Ngan long lem bad me, bad haba me ïalam noh ïa ki briew jong nga na Ijipt, phin ïamane ïa nga ha une u lum. Kata kan long ka jingpynshisha ba nga la phah ïa me.”

13 # Eks. 6:2,3 Hynrei u Moses u phai ktien, “Haba nga leit sha ki Israel bad ngan ong ha ki, ‘U Blei jong ki kpa tymmen jong phi u la phah ïa nga sha phi,’ kin sa kylli ïa nga, ‘Kaei ka kyrteng jong u?’ Ngan ong kumno ïa ki?”

14 # Jpw. 1:4,8 U Blei u ong ha u Moses, “NGA LONG UBA NGA LONG. Kane ka long kaei kaba me dei ban ong ha ki: ‘Uta ïa uba la khot UBA NGA LONG u phah ïa nga sha phi.’ 15Ong ïa ki Israel ba ma nga, U Trai, U Blei jong ki kpa tymmen jong ki, U Blei jong u Abraham, u Isaak bad u Jakob, u la phah ïa me sha ki. Kane ka long ka kyrteng jong nga junom la junom; kumne ruh ki pateng bynriew ki ban dang wan ki dei ban khot ïa nga. 16Khie leit lumlang ïa ki tymmen ki san jong ki Israel bad ïathuh ha ki ba nga U Trai, U Blei jong ki kpa tymmen jong ki, U Blei jong u Abraham, U Isaak, bad u Jakob, nga la mihpaw ha me. Ïathuh ruh ha ki ba nga la wan jngoh ïa ki, bad nga la ïohi aïu ki nong Ijipt ki la leh ïa ki. 17Nga la kular ba ngan ïalam noh ïa ki na Ijipt ha kaba ki shah lehbeiñ, sha kata ka ri kaba tuid da ka dud bad ka ngap — ka ri jong ki Kanaan, ki Hit, ki Amor, ki Peris, ki Hib bad ki Jebus.

18“Ki briew jong nga kin shahshkor ïa kaei kaba me ong ha ki. Nangta me dei ban leit bad ki nongïalam jong ki Israel sha u Pharaoh bad ong ha u, ‘U Trai, U Blei jong ki Hebru, u la pynpaw ïa lade ha ngi. Mynta shah ïa ngi ban leit lai sngi lynti sha ka ri shyiap ban ai jingkñia ha U Trai, U Blei jong ngi.’ 19Nga tip ba u Pharaoh un ym shah ïa phi ban leit lymda la pynbor ïa u ban leh kumta. 20Hynrei ngan pyn-i ïa la ka bor bad ngan pynshitom ïa ka ri Ijipt da kaba leh hangta ïa kiei kiei kiba shyrkhei. Hadien kata un sa shah ba phin leit.

21 # Eks. 12:35,36 “Ngan pynlong ruh ïa ki nong Ijipt ba kin sngewburom ïa phi khnang ba ynda ki briew jong nga kin mih, kin ym mihnoh thylli. 22Man la ka kynthei Israel kan pan ïa ki jingdeng ksiar bad jingdeng rupa, bad ïa ki jaiñkup jaiñsem ruh, na la ka paramarjan nong Ijipt bad na ka kynthei Ijipt kaba shong basah ha ïing jong ka. Ki Israel kin buh ïa kine kiei kiei ha la ki khun shynrang bad kynthei bad kit noh ïa ka spah jong ki nong Ijipt.”

Currently Selected:

EKSODOS 3: KHACLBSI

Highlight

Copy