EKSODOS 2

Ka jingkha ïa u Moses

1Ha kata ka por, uwei u briew na ka jait Lebi u shongkurim ïa ka khun jong uwei u Lebi bad ka la kha khun shynrang ïa u. 2#Ki Kam. 7:20; Heb. 11:23Haba ka ïohi ba u long u khunlung uba bhabriew, ka buhrieh ïa u lai bnai. 3Hynrei haba kam lah shuh ban buhrieh ïa u, ka shim kawei ka shang ba la shna na u khah bad ka lape ïa ka da ka bsiang ban ym pei um. Ka pynthiah ïa uta u khunlung hapoh kata ka shang bad ka buh ïa ka hapdeng ki khah harud jong ka wah. 4Ka hynmen jong uta u khunlung ka ap khmih kham na pajih ban ïohi kan jia aïu ïa u.

5Ka khun u Pharaoh ka la wan hiar sha ka wah ban sum, katba ki shakri kynthei jong ka pat ki nang ïa-ïaid kai harud wah. Kynsan ka la ïohi ïa kata ka shang hapdeng ki khah, bad ka phah ïa ka mraw ban leit shim ïa ka. 6Haba ka plied ïa ka, ka ïohi ïa u khunlung. Uta u khunlung u ïam, bad ka sngewsynei ïa u. “Une te u dei uwei na ki khun Hebru,” ka la ong.

7Nangta ka hynmen jong u ka ong ha ka khun u Pharaoh, “Hato ngan leit khot ïa kawei ka kynthei Hebru ba kan ri bad sumar ïa une u khunlung na ka bynta jong phi?”

8Ka khun u Pharaoh ka ong ha ka, “Khie leit.” Kumta kata ka khynnah ka leit bad ka wan ïalam da ka kmie jong uta u khunlung hi. 9Ka khun u Pharaoh ka ong ha ka, “Shim ïa une u khunlung bad ri ïa u na ka bynta jong nga, bad ngan da siew ïa pha.” Kumta kata ka kynthei ka shim ïa uta u khunlung, bad ka ri ka sumar ïa u. 10#Ki Kam. 7:21Ynda uta u khunlung u la san, ka leit ïalam ïa u sha ka khun u Pharaoh; ka ruh ka ri ïa u kum la u khun, bad ka khot kyrteng ïa u, u Moses, “Namar,” ka ong, “nga la sei ïa u na ka um.”

U Moses u phet sha Midian

11 # Ki Kam. 7:23-28 # Heb. 11:24 Ha kawei ka sngi, haba u la rangbah, u Moses u leit jngoh ïa la ki para jait, ki Hebru, bad u ïohi kumno la pynbor ïa ki ban trei ïa ki kam kiba shitom sat. U ïohi ruh ïa uwei u nong Ijipt ba u pynïap ïa uwei u Hebru, u para jait jong u Moses hi. 12U Moses u peit shane shatai, bad haba u ïohi ba ym don mano mano ba peit sha u, u pynïap ïa u, bad u tep ïa u hapoh u shyiap. 13Haba u leit sa ha kawei pat ka sngi, u ïohi ar ngut ki Hebru kiba ïashoh. U ong ha uta uba leh bymdei, “Balei me da shoh ïa la u para Hebru?”

14Uta u briew u jubab, “Mano ba thung ïa phi kum u syiem bad nongbishar jong ngi? Hato phi mut ban pynïap ïa nga kumba phi la pynïap ïa uto u nong Ijipt?” Kumta u Moses u la sheptieng, bad u pyrkhat, “Pleng, ki briew ki la tip ïa kaei ba nga la leh.” 15#Ki Kam. 7:29; Heb. 11:27Haba u Pharaoh u ïohsngew ïa kata, u pyrshang ban phah pynïap ïa u Moses; hynrei u Moses u la phet ïap, bad u leit shong noh ha ri Midian.

16Ha kawei ka sngi, katba u Moses u dang shongthait harud kawei ka pukri, hynñiew ngut ki khun kynthei jong u Jethro, u lyngdoh ka Midian, ki ïawan tong um ban pyndap ïa ki shyngoid ba kin ïoh ai um ïa ki langbrot bad ki blang jong u kpa jong ki. 17Hynrei don ki nongap langbrot kiba wan beh noh ïa ki. Te u Moses u leit ban ïada ïa ki bad u ïarap ai um ruh ïa ki jingri jong ki. 18Ynda ki leit phai sha la u kpa, u kylli ïa ki, “Kumno phi ïawan kloi mynta ka sngi?”

19“Uwei u nong Ijipt u pyllait ïa ngi na ki nongap langbrot,” ki jubab; “u pyntong um lem ïa ngi, bad u ïarap ai um de ïa ki jingri jong ngi.”

20“Ha-ei u don?” u kylli ïa la ki khun. “Balei phi shu ieh ïa uta u briew? Khie leit khot ïa u ban ïabam bad ngi.”

21Kumta u Moses u la mynjur ban shong ban sah noh hangta, bad u Jethro ruh u pynshongkurim ïa u bad ka Sipporah ka khun jong u kaba la kha khun shynrang ïa u Moses. 22U Moses u ong ha lade, “nga long u sohshnong ha kane ka ri, bad kumta nga kyrteng ïa u, u Gershom.”

23Bun snem hadien kane, u syiem Ijipt u ïap noh, hynrei ki Israel ki dang ïai ud namar kata ka jinglongmraw jong ki bad ki pyrta ban ïoh jingïarap. 24#Jen. 15:13,14Kata ka jingud jong ki ka kiew sha U Blei, uba la ïohsngew ïa ka jingud jong ki bad kynmaw ïa la ka jutang bad u Abraham, u Isaak bad u Jakob. 25U ïohi ïa ka jinglongmraw jong ki Israel, bad u la sngewkhia na ka bynta jong ki.

Currently Selected:

EKSODOS 2: KHACLBSI

Highlight

Copy