JENESIS 24
24
Ka tnga ïa u Isaak
1U Abraham u la tymmen bha, bad U Trai u la kyrkhu ïa u ha kiei kiei baroh kiba u leh. 2U ong ha u shakri jong u, uba la rangbah bha, uba peit halor baroh kiba u don, “Buh ïa la ka kti hapdeng ki lbong jong nga bad pynlong ka jingsmai. 3Nga kwah ïa me ban pynlong ka jingsmai ha ka kyrteng U Trai, U Blei jong ka bneng bad ka khyndew, ba men ym jied ka tnga ïa u khun jong nga na ki briew hangne ha ri Kanaan. 4Me dei ban leit pat sha ka ri ha kaba la kha ïa nga, bad men pynïoh ka tnga ïa u khun jong nga u Isaak napdeng ki kur ki jait jong nga.” 5Hynrei uta u shakri u kylli, “Kumno lada jia ba kata ka samla kam mon ban iehnoh ïa la ka ïing ban wan ryngkat bad nga sha kane ka ri? Hato ngan phah noh ïa u khun jong phi sha kata ka ri na kaba phi wan?”
6U Abraham u jubab, “To da khmih bha ba men ym phah noh ïa u khun jong nga shata! 7U Trai, U Blei jong ka bneng, u la ïalam noh ïa nga na ka ïing u kpa jong nga bad na ka ri ki kur ki jait jong nga, bad u la kular skhem ha nga ba un ai ïa kane ka ri ha ki khun ki ksiew jong nga. Un phah ïa u angel jong u ha shuwa jong me, ba me lah ban pynïoh hangta ka tnga ïa u khun jong nga. 8Lada kata ka samla kam mon ban wan ryngkat bad me, men laitluid na kane ka jingkular. Hynrei da lei lei ruh wat leit ïalam noh ïa u khun jong nga shata.” 9Kumta uta u shakri u buh ïa la ka kti hapdeng ki lbong jong u Abraham, u kynrad jong u, bad u pynlong ka jingsmai ban leh ïa kaei kaba u Abraham u la hukum ïa u.
10Uta u shakri uba peit halor ki jingdon jingem jong u Abraham, u shim shiphew tylli ki ut jong u kynrad jong u bad u leit sha ka nongbah ha kaba u Nahor u shong u sah ha ka bynta bashaphang shatei ka ri Mesopotamia. 11Haba u la poi, u pyndem khohsiew ïa kita ki ut harud ka pukri kaba don shabar jong ka nongbah. Ka dei haba la janmiet bha, ka por ha kaba ki kynthei ki ju wan tong um. 12U la duwai, “A Trai, U Blei jong u kynrad jong nga u Abraham, to ai ka jingjop ïa nga mynta ka sngi bad to bat ïa la ka kular ïa u kynrad jong nga. 13Hangne nga don harud kane ka pukri ha kaba ki samla kynthei jong ka nongbah kin sa ïawan tong um. 14Ngan ong ha kawei na ki, ‘Sngewbha pynhiar ïa u khiew um jong phi bad to ai ba ngan ïoh dih um.’ Lada ka ong, ‘Dih, bad ngan sa wanrah um ruh ïa ki ut jong phi,’ to ai ba kan dei ma ka kaba me la jied na ka bynta u shakri jong me u Isaak. Lada kane kan jia, ngan tip ba me la batskhem ïa la ka kular ha u kynrad jong nga.”
15Shuwa ban kut ka jingduwai, ka Rebekka ka la wan poi bad u khiew um ha la ka tyrpeng. Ka dei ka khun jong u Bethuel, uba long u khun jong ka Milkah bad u Nahor, uba shi para bad u Abraham. 16Ka long ka samla kaba bhabriew eh bad kaba dang sotti. Ka leit hiar sha ka pukri, ka pyndap um ha la u khiew bad ka wan kiew biang. 17Uta u shakri u leit bran bran ban ïashem ïa ka bad u ong, “To ai um ba ngan dih na uto u khiew um jong phi.” 18Ka ong, “Ko rangbah, to dih” bad ka pynhiar kloi kloi ïa uta u khiew um na ka tyrpeng jong ka, bad ka pynbat katba u dang dih. 19Haba u la dep dih, ka ong, “Ngan leit tong um sa ïa ki ut jong phi de bad to ai ba kin ïoh dih katba ki kwah.” 20Ka pynstet ban phylliew ïa ka um na u khiew jong ka ha ka shyngoid ai um ïa ki jingri bad ka mareh sha kata ka pukri ban leit tong um shuh, haduh ba kan da dep ban ai um ïa ki ut jong u baroh. 21Uta u briew u dang ïai khmih jar jar ïa ka, ban peit la ka long ba U Trai u la ai jingjop ïa u.
22Haba ka la dep ai um, uta u briew u shim ïa ka sati ksiar kaba remdor bad u pyndait ha ka khmut jong ka, bad u pyndeng ruh ar tylli ki khadu ksiar kiba heh ha ki ryndang-kti jong ka. 23U ong, “To ïathuh ïa nga uei u kpa jong phi? Hato don jaka ha ka ïing u kpa jong phi ïa ki briew jong nga bad ïa nga ba ngin ïoh sahmiet?”
24“U kpa jong nga u dei u Bethuel u khun jong u Nahor bad ka Milkah,” ka la jubab. 25“Don shibun u phlangïap bad ka jingbam ïa ki jingri ha ïing jong ngi, bad don ruh ka jaka na ka bynta jong phi ban sah.”
26Kumta uta u briew u la dem khohsiew bad mane ïa U Trai. 27U ong, “Ïaroh ïa U Trai, U Blei jong u kynrad jong nga u Abraham, uba la batskhem ïa la ka kular ha u kynrad jong nga. U Trai hi u la ïalam beit ïa nga sha ki kur ki jait u kynrad jong nga.”
28Kata ka samla ka la mareh sha ka ïing ka kmie jong ka bad ka ïathuh ïa kaba la jia baroh. 29Ka Rebekka ka don u hynmen uba kyrteng u Laban; bad u Laban u la mareh bran bran shabar ban leit sha kata ka pukri ha kaba u shakri jong u Abraham u don. 30U Laban u la ïohi ïa ka sati khmut bad ïa ki khadu ha ki ryndang-kti jong ka para jong u, bad u la ïohsngew ïa ka ba ka ïathuh ïa kaei kaba uta u briew u la ong ha ka. U leit sha u shakri jong u Abraham, uba ïeng hajan ki ut jong u harud kata ka pukri, 31bad u ong, “Ale sha ïing bad nga. Phi long u briew ïa uba U Trai u la kyrkhu. Balei phin shu ïeng hangne kumne? Nga la pynkhreh ka jaka ïa phi ha ïing jong nga, bad don ruh ka jaka ïa ki ut jong phi.”
32Kumta uta u briew u leit rung sha kata ka ïing, bad u Laban u pynhiar ïa ki jingkit na kita ki ut bad u la ai phlangïap bad jingbam ïa ki. Nangta u la wanrah um ïa u shakri jong u Abraham bad ïa ki nongbud jong u ba kin sait ïa la ki kjat. 33Haba la wanrah jingbam, uta u briew u ong, “Ngan ym pat bam tad ynda nga la dep ïathuh ïa kaei ba nga don ban ong.”
U Laban u ong, “To ïathuh keiñ.”
34“Nga dei u shakri jong u Abraham,” u la sdang. 35“U Trai u la kyrkhu kyrhai ïa u kynrad jong nga bad u la pynlong ïa u, u briew uba riewspah. U la ai ha u ki kynhun langbrot bad blang, ki masi, ka rupa, ka ksiar, ki mraw shynrang bad kynthei, ki ut bad ki kada. 36Ka Sarah, ka tnga u kynrad jong nga, ka la kha khun shynrang ïa u haba ka la tymmen, bad u kynrad jong nga u la ai lut ha u kat ïa kaba u don. 37U kynrad jong nga u la pynkular ïa nga da kaba smai ba ngan kohnguh ïa ka hukum jong u. U la ong, ‘Wat ym jied ka tnga ïa u khun jong nga na ki samla kynthei ha ka ri Kanaan. 38Pynban, men leit sha ki briew u kpa jong nga, bad sha ki kur ki jait jong nga, bad jied ka tnga na ka bynta jong u.’ 39Bad nga la kylli ha u kynrad jong nga, ‘Kumno lada jia ba kata ka briew kam treh ban wan ryngkat bad nga?’ 40U la jubab, ‘U Trai, ïa uba nga la ju kohnguh, un phah ïa u angel jong u lem bad me bad ai ha me ka jingjop. Men pynïoh ïa u khun jong nga ka tnga na ki briew jong nga hi, bad na ki ba-ha-ïing ha-sem jong u kpa jong nga. 41Don tang kawei ka lad ïa me ba men lait na kaba me la smai: lada me leit sha ki kur ki jait jong nga, bad ki kyntait ïa me, te men laitluid.’
42“Haba nga la wan sha ka pukri mynta ka sngi, nga la duwai, ‘A Trai, U Blei jong u kynrad jong nga u Abraham, sngewbha ai ka jingjop ha nga ha kaei ba nga leh. 43Mynta nga don hangne harud kane ka pukri. Haba ka samla ka wan ban tong um, ngan ong ha ka ba kan ai um ba ngan dih ïa nga na u khiew um jong ka. 44Lada ka mynjur bad tyrwa ruh ban wanrah um ïa ki ut jong nga, to ai ba kata kan long kaba me la jied kum ka tnga ïa u khun jong u kynrad jong nga.’ 45Ha shuwa ba ngan kut ka jingduwai bajar jar jong nga, ka Rebekka ka la wan bad u khiew um ha ka tyrpeng jong ka bad ka la leit hiar sha kata ka pukri ban tong um. Nga la ong ha ka, ‘To ai um ba ngan dih.’ 46Kumta hi ka pynhiar stet ïa u khiew um na la tyrpeng bad ka ong, ‘To dih, bad ngan ai um ruh ïa ki ut jong phi ba kin dih.’ Kumta nga la dih, bad ka la ai um ruh ïa ki ut. 47Nga la kylli ïa ka, ‘Uei u kpa jong phi?’ Bad ka la jubab, ‘U kpa jong nga u dei u Bethuel, u khun jong u Nahor bad ka Milkah.’ Nangta nga pyndait ïa ka sati ha ka khmut jong ka, bad nga pyndeng ruh ïa ki khadu ha ki ryndang-kti jong ka. 48Nga la dem khohsiew bad mane ïa U Trai. Nga ïaroh ïa U Trai, U Blei jong u kynrad jong nga u Abraham, uba la ïalam beit ïa nga sha u kur u jait jong u kynrad jong nga, ha kaba nga la shem ïa ka khun jong u na ka bynta u khun jong u kynrad jong nga. 49Mynta, lada phi mut ban pyndep ïa ka jingkitkhlieh kaba phi don ïa u kynrad jong nga bad ban lehhok ïa u, to sngewbha ïathuh ïa nga; te lada kam long, to ong kumta, bad ngan sa rai aïu ngan leh.”
50U Laban bad u Bethuel ki jubab, “Namar ba kane ka kam ka wan hi na U Trai, kam dei ïa ngi ban shim rai. 51Ka Rebekka ka don hangne; to shim bad ïalam ïa ka. Ai ba kan long ka tnga jong u khun u kynrad jong phi, kumba U Trai hi da lade u la kren.” 52Haba u shakri jong u Abraham u la ïohsngew ïa kane, u dem ngon bad u mane ïa U Trai. 53Nangta u sei ïa ki jaiñ bad ki jingdeng rupa bad ksiar, bad u ai ïa ki ha ka Rebekka. U ai ruh ïa ki jingai kiba kordor ïa u hynmen bad ïa ka kmie jong ka.
54Te u shakri jong u Abraham bad kita ki briew kiba don bad u ki la ïabam ïadih, bad ki la sahmiet hangta. Ynda ki la khie mynstep, u ong, “To shah ba ngan leit phai pat sha u kynrad jong nga.”
55Hynrei u hynmen jong ka Rebekka bad ka kmie jong ka ki ong, “Ai ba ka Rebekka kan sah shuwa bad ngi shi taïew ne shiphew sngi, bad hadien kata ka lah ban leit.”
56Hynrei u ong, “Wat pynsah shuh ïa ngi. U Trai u la ai jingjop ïa ka jingleit jong nga; to shah ngan leit phai pat sha la u kynrad.”
57Ki jubab, “To ngin khot ïa ka bad tip aïu ka don ban ong.” 58Kumta ki la khot ïa ka Rebekka bad ki la kylli, “Hato pha kwah ban leit bad une u briew?”
“Ho-oid,” ka jubab.
59Kumta ki shah ïa ka Rebekka bad ïa ka shakri ïing batymmen jong ka ba kin leit ryngkat bad u shakri jong u Abraham lem bad ki briew jong u. 60Bad ki la kyrkhu kyrdoh ïa ka Rebekka da kine ki kyntien:
“To phi, ka para,
phin long ka kmie u paidbah byllien!
To ki khun ki ksiew jong phi kin da jop thiaw ïa ki nongbah jong ki nongshun jong ki!”
61Te ka Rebekka bad ki kynthei samla jong ka ki la dep khreh bad kiew ban shong halor ki ut ban leit bad u shakri jong u Abraham, bad ki ïamih lang baroh.
62U Isaak u la wan sha ka ri khlaw jong “Ka Pukri jong uta Uba Im Uba Ïohi Ïa Nga” bad ba u sah ha ka bynta bashaphang shathie jong ka ri Kanaan. 63U la mih shabar ha ka por janmiet ban ïaid kai pyngngad ha ki pyntha bad u ïohi ïa ki ut ba ki dang wan. 64Haba ka Rebekka ka ïohi ïa u Isaak, ka la hiar noh na ka ut, 65bad ka kylli ïa u shakri jong u Abraham, “Uei utai u briew uba ïaid ha pyntha sha pyrshah jong ngi?”
“U dei u kynrad jong nga,” la jubab uta u shakri. Kumta ka shim ïa la ka jaiñsop ryndang bad ka la tap ïa la ka khmat.
66U shakri u ïathuh lut ha u Isaak ïa kaei kaei baroh kaba u la leh. 67Nangta u Isaak u ïalam ïa ka Rebekka shapoh ka ïingjaiñ ha kaba ka Sarah ka kmie jong u ka la ju shong, bad ka la kylla long ka tnga jong u. U Isaak u ieit ïa ka Rebekka, bad da kumta u la ïoh jingtngen hadien ba u la duh ïa la ka kmie.
Currently Selected:
JENESIS 24: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
