JENESIS 25
25
Kiwei pat kiba hiarpateng na u Abraham
(1 Khrn. 1:32-33)
1U Abraham u la shongkurim ïa kawei pat ka briew kaba kyrteng ka Keturah. 2Ka la kha na u ïa u Simran, u Jokshan, u Medan, u Midian, u Ishbak, bad u Shuah. 3U Jokshan u dei u kpa jong u Sheba bad u Dedan, bad ki khun ki ksiew jong u Dedan ki long ki Asshurim, Ki Letushim, bad ki Leummim. 4Ki khun shynrang jong u Midian ki long u Ephah, u Epher, u Hanokh, u Abida, bad u Eldaah. Kine baroh ki long ki khun ki ksiew jong ka Keturah.
5U Abraham u la iehnoh ïa kaei kaei kaba u don ha u Isaak; 6hynrei mynba u dang im, u la ai ki jingai sngewbha ïa ki khun shynrang ba u la ïoh na kiwei pat ki tnga jong u. Nangta u phah noh ïa kine ki khun shynrang sha ka ri kaba shaphang mihngi, jngai na u khun jong u, u Isaak.
Ka jingïap bad kaba tep ïa u Abraham
7-8U Abraham u la ïap ha ka rta ba la ih bha haba u la dap shispah hynñiewphew san snem ka rta. 9Ki khun shynrang jong u, u Isaak bad u Ishmael, ki la tep ïa u ha ka krem Makhpelah, kaba ha ka lyngkha kaba don shaphang mihngi na Mamre, kaba dei ka jong u Ephron u khun jong u Sohar u nong Hit. 10#Jen. 23:3-16Kata ka dei ka lyngkha kaba u Abraham u la thied na ki Hit, dei hangta ba la tep ïa u Abraham bad ïa ka tnga jong u ka Sarah. 11Hadien ka jingïap jong u Abraham, U Blei u la kyrkhu ïa u Isaak u khun jong u, uba sah hajan “Ka Pukri jong Uta Uba Im Uba Ïohi Ïa Nga.”
Ki khun ki ksiew jong u Ishmael
(1 Khrn. 1:28-31)
12U Ishmael, ïa uba ka Hagar ka nong Ijipt kaba long ka mraw jong ka Sarah, ka la kha na ka bynta u Abraham, 13ka la ïoh ïa kine ki khun shynrang, ïa kiba la thoh ter ter kat kum ka sngi kha jong ki: u Nebaïoth, u Kedar, u Adbeel, u Mibsan, 14u Mishma, u Duma, u Massa, 15u Hadad, u Tema, u Jetur, u Naphish, bad u Kedemah. 16Kine ki long ki kpa tymmen jong ki khat-ar jait, bad da ki kyrteng jong ki la jer ïa ki shnong bad ïa ki jaka sher dara jong ki. 17U Ishmael u ïap haba u la dap shispah laiphew hynñiew snem ka rta. 18Ki khun ki ksiew jong u Ishmael ki la shong la sah ha ka jaka kaba hapdeng ka Habilah bad ka Shur, sha ka phang mihngi jong ka ri Ijipt ha ka lynti sha Assyria. Kine ki la shong kyrpang na kiwei pat ki khun ki ksiew jong u Abraham.
Ka jingkha ïa u Iso bad ïa u Jakob
19Kane ka dei ka khana shaphang u Isaak u khun jong u Abraham. 20U Isaak u la sawphew snem ka rta mynba u shongkurim ïa ka Rebekka, ka khun jong u Bethuel (u nong Aram na ka ri Mesopotamia) bad ka para jong u Laban. 21Namar ba ka Rebekka kam ïoh khun, u Isaak u la duwai ha U Trai na ka bynta jong ka. U Trai u la jubab ïa ka jingduwai jong u, bad ka Rebekka ka la punkhun. 22Ka la dei ban ïoh khun synrap, bad ha shuwa ba yn kha ïa ki, ki ïakhih ïaksaid para ma ki ha ka kpoh jong ka. Ka ong, “Balei kaba kum kane ka wan jia ha nga?” Kumta ka la leit kylli na U Trai ban ïoh jubab.
23 #
Rom. 9:12
U Trai u ong ha ka,
“Ar tylli ki jaitbynriew ki don hapoh jong pha;
Phan sa kha ar jait ki briew kiba ïaleh pyrshah para ma ki.
Kawei kan kham khlaiñ ban ïa kawei pat,
Kaba ha shuwa kan shakri ïa kaba hadien.”
24Ka por ka la poi ïa ka ba kan kha, bad ka la ïoh ar ngut ki khun synrap shynrang. 25Uba nyngkong u long uba saw doh, bad ka sniehdoh jong u ka long kum ka jaiñkup shñiuh; kumta la khot kyrteng ïa u, u Iso. 26Ïa uba ar la kha da kaba u batskhem triang ïa ka khongdong'jat jong u Iso; kumta la khot kyrteng ïa u, u Jakob. U Isaak u la dap hynriewphew snem ka rta mynba la kha ïa ki.
U Iso u die noh ïa ki hok jong u kum u khun nyngkong
27Kita ki khynnah shynrang ki la nang san nang rangbah, bad u Iso u kylla long u nongbeh mrad uba tbit, u briew uba ieit ban shang lum shang wah, katba u Jakob pat u long u briew uba jar jar, uba shong tang ha ïing. 28U Isaak u kham jied ïa u Iso, namar u bang bha ban bam ïa ki mrad kiba u Iso u pynïap, hynrei ka Rebekka ka kham jied ïa u Jakob.
29Ha kawei ka sngi katba u Jakob u dang shet syrwa jhur, u Iso u la wan na kaba behmrad. 30U la thngan bad u ong ha u Jakob, “Nga la thngan shaba palat, to ai khyndiat ba ngan dih ïa kato ka syrwa saw.” (Dei namar kata ba la khot ïa u, u Edom.)
31U Jakob u jubab, “Ngan ai ïa ka lada phi ai shuwa ha nga ïa ki hok jong phi kum u khun nyngkong.”
32U Iso u ong, “Ka biang hi! Nga sngew kum ban sa ïap noh; kita ki hok jong nga kin myntoi aïu pat ïa nga?”
33 #
Heb. 12:16
U Jakob u jubab, “Nyngkong to smai ba phin ai noh ha nga ïa ki hok jong phi.”
U Iso u smai bad u ai noh ïa la ki hok ha u Jakob. 34Nangta u Jakob u ai kpu bad katto katne ka syrwa jhur ïa u. U ruh u la bam bad dih, bad nangta u ïeng joit bad u leit noh. Kata ka long kumno ba u Iso u sumar ïa la ki hok kum u khun nyngkong.
Currently Selected:
JENESIS 25: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
