JENESIS 26
26
U Isaak u shong u sah ha Gerar
1Ka la jia sa kawei pat ka 'nemsniew ha kata ka ri, nalor kata kaba la jia ha ki sngi u Abraham. U Isaak u la leit sha u Abimelekh u syiem jong ki Philistia, ha Gerar. 2U Trai u la mihpaw ha u Isaak bad u ong, “Wat leit sha ri Ijipt; sah ha kane ka ri ha kaba nga la ong ha me ban sah. 3#Jen. 22:16-18To shong to sah hangne, bad ngan long lem bad me, bad ngan kyrkhu ïa me. Ngan sa ai ïa kane ka ri baroh ha me bad ha ki khun ki ksiew jong me. Ngan bat ïa la ka kular kaba nga la pynlong ha u Abraham u kpa jong me. 4Ngan ai ha me ïa ki khun ki ksiew kat ki khlur ha ka sahit bneng, bad ngan ai ha ki ïa kane ka ri baroh. Ki jaitbynriew baroh kin kyrpad ïa nga ba ngan kyrkhu ïa ki kumba nga la kyrkhu ïa ki khun ki ksiew jong me. 5Ngan kyrkhu ïa me, namar ba u Abraham u la kohnguh ïa nga, bad u la sumar ïa ki aiñ bad ki hukum jong nga.”
6Kumta u Isaak u la shong la sah ha Gerar. 7#Jen. 12:13; 20:2Haba ki briew hangta ki kylli shaphang ka tnga jong u, u jubab ba ka dei ka para jong u. Um shym ïathuh ba ka dei ka tnga jong u, namar u sheptieng ïoh ba ki briew hangta kin pynïap ïa u ban ïoh ïa ka Rebekka, kaba long kaba bhabriew eh. 8Haba u Isaak u la don hangta katto katne por, u syiem Abimelekh u peit na ka jingkhangïit bad u ïohi ïa u Isaak bad ka Rebekka ba ki ïaleh ieit. 9Kumta u Abimelekh u phah khot ïa u Isaak, bad u ong, “Pleng, ka dei ka tnga jong me! Balei pat me ong ba ka dei ka para jong me?”
U jubab, “Namar nga pyrkhat ïoh ba nga shah pynïap lada nga ong ba ka dei ka tnga jong nga.”
10“Kaei keiñ kane kaba me la leh ha ngi?” u Abimelekh u ong. “Uwei na ki briew jong nga un jin da la kum ïathiah bad ka tnga jong me, bad men jin da la kit pop namar ki jingleh jong ngi.” 11U Abimelekh u la maham ïa ki briew baroh; “Uno uno uba lehbeiñ ïa une u briew lane ïa ka tnga jong u, un shah pynïap.”
12U Isaak u la thung jingthung ha kata ka jaka, bad ha kata ka snem u ïoh ot shispah shah ïa kaba u la bet, namar U Trai u la kyrkhu ïa u. 13U la nang manbha, bad u la kylla long uba riewspah eh. 14Namar ba u don shibun ki kynhun langbrot bad ki kynhun masi, bad bun ngut ki shakri, ki Philistia ki la bishni ïa u. 15Kumta ki tep khyndew noh ïa ki pukri baroh kiba ki shakri jong u kpa jong u, u Abraham ki la tih mynba u Abraham u dang im.
16Te u Abimelekh u ong ha u Isaak, “To mihnoh na ka ri jong ngi. Me la kylla long uba kham khrawbor ban ïa kaba ngi long.” 17Kumta u Isaak u mihnoh nangta bad u sher dara ha ka Them Gerar, ha kaba u la shong la sah katto katne por. 18U la tih biang sa shisien ïa ki pukri ïa kiba la tih ha ka por jong u Abraham ïa kiba ki Philistia ki la set khyndew noh hadien ka jingïap jong u Abraham. U Isaak u la ai kijuh ki kyrteng ïa kita ki pukri kumba u kpa jong u, u la khot ïa ki.
19Ki shakri jong u Isaak ki la tih ïa ka pukri ha kata ka them bad ki lap ba ka don um. 20Ki nongap langbrot jong ka Gerar ki la ïakajia bad ki nongap langbrot jong u Isaak, bad ki ong, “Kane ka um ka dei ka jong ngi.” Kumta u Isaak u khot kyrteng ïa kata ka pukri “Ka Jingïakajia.”
21Ki shakri jong u Isaak ki la ïatih ïa kawei pat ka pukri, bad hangta ruh la don ka jingïakajia shaphang jong ka, kumta u la khot kyrteng ïa ka, “Ka Jingïashun.” 22U la kynriah noh nangta bad tih ïa kawei pat ka pukri. Ym shym don jingïakajia shuh ïa kata, kumta u khot kyrteng ïa ka, “Ka Jinglaitluid.” U ong, “Mynta te U Trai u la ai jinglaitluid ïa ngi ban shong ban sah ha kane ka jaka, bad ngin sa nang roi ha kane ka ri.”
23U Isaak u mihnoh nangta bad u leit sha Beersheba. 24Ha kata ka miet U Trai u la mihpaw ha u bad u ong, “Nga long U Blei jong u kpa jong me u Abraham. Wat sheptieng, nga don ryngkat bad me. Ngan kyrkhu ïa me, bad ngan ai ha me bun ki khun ki ksiew namar ka jingkular jong nga ïa u shakri jong nga u Abraham.” 25U Isaak u la tei ka duwan hangta bad mane ïa U Trai. Nangta u sher ïa la ka dara hangta, bad ki shakri jong u ki ïatih sa kawei pat ka pukri.
Ka jingïateh kular hapdeng u Isaak bad u Abimelekh
26 #
Jen. 21:22
U Abimelekh u la wan na Gerar lem bad u Ahussath u nongaibuit jong u bad u Phikol u rangbah shipai jong u ban ïakynduh ïa u Isaak. 27Kumta u Isaak u kylli, “Balei ba phi wan sha nga mynta, haba phi la isih ïa nga mynshuwa bad ba phi la pynlong ïa nga ban mihnoh na ka ri jong phi?”
28Ki jubab, “Mynta ngi tip ba U Trai u don bad phi, bad ngi pyrkhat ba ka dei ban don ka jingïateh kular badonburom hapdeng jong ngi. 29Ngi kwah ba phin kular ba phin ym pynmynsaw ïa ngi, kumba ngi ruh ngim shym la pynmynsaw ïa phi. Ngi la lehsbun ïa phi bad ngi la shah ba phin leit da kaba suk. Mynta ka paw shai ba U Trai u la kyrkhu ïa phi.” 30U Isaak u pynkhreh ka jingkhawai ïa ki, bad ki ïabam ïadih. 31Dang step phyrngab ha ka sngi kaba bud, uwei pa uwei u la kular bad pynskhem da kaba shim smai. U Isaak u khublei khatduh ïa ki, bad ki ïakhlad kum ki paralok.
32Ha kata hi ka sngi, ki shakri jong u Isaak ki la wan ïathuh ha u shaphang ka pukri kaba ki la ïatih. Ki ong, “Ngi la shem ïa ka um.” 33U la khot kyrteng ïa kata ka pukri “Ka Jingsmai.” Dei kumta ba ka shnong Beersheba ka la ïoh ïa la ka kyrteng.
Ki tnga nongwei jong u Iso
34Haba u Iso u la dap sawphew snem ka rta, u shongkurim ïa ar ngut ki kynthei Hit, ka Judith ka khun jong u Beeri bad ka Basemath ka khun jong u Elon. 35Kine ki la pynkthang mynsiem ïa u Isaak bad ïa ka Rebekka.
Currently Selected:
JENESIS 26: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
