JENESIS 46
46
U Jakob bad la ka longïing longsem ki leit sha Ijipt
1Kumta u Jakob u mihnoh, u da kit lut baroh kat kiba u don, bad u leit sha Beersheba, bad hangta u kñia ainguh ha U Blei jong u Isaak u kpa jong u. 2Te U Blei u kren ha u ha ka jingïohipaw mynmiet, bad u ong, “Jakob, Jakob!”
U ruh u jubab, “Oi, nga hangne.”
3“Nga long U Blei, U Blei jong u kpa jong me,” u ong. “Wat sheptieng ban leit hiar sha Ijipt; hangta ngan pynlong ïa ki khun ki ksiew jong me ka jaitbynriew kaba khraw. 4Ngan leit lang bad me sha Ijipt, bad ngan wan ïalam biang ïa ki khun ki ksiew jong me sha kane ka ri. U Joseph ruh un don ryngkat bad me ynda me ïap.”
5Nangta u Jakob u mihnoh na Beersheba. Ki khun shynrang jong u ki pynshong ïa u, ïa ki khun rit jong ki, bad ïa ki tnga jong ki, ha kita ki kali kiba u syiem ka Ijipt u la phah ban kit ïa ki. 6-7#Ki Kam. 7:15Ki shim ruh ïa la ki jingri bad ki jingdon jingem baroh kiba ki la lum ha Kanaan, bad ki leit noh sha Ijipt. U Jakob u leit sha Ijipt lem bad ki khun ki ksiew jong u baroh, ki khun shynrang ki ksiew shynrang ki khun kynthei bad ki ksiew kynthei.
8Ki dkhot jong ka ïing ka sem u Jakob kiba leit ryngkat bad u sha Ijipt ki long u khun nyngkong jong u, u Reuben, 9bad ki khun shynrang jong u Reuben: u Hanokh, u Pallu, u Hesron, bad u Karmi. 10U Simeon bad ki khun shynrang jong u: u Jemuel, u Jamin, u Ohad, u Jakhin, u Sohar, bad u Shaul, u khun ka kynthei nong Kanaan. 11U Lebi bad ki khun shynrang jong u: u Gershon, u Kohath, bad u Merari. 12U Judah bad ki khun shynrang jong u: u Shelah, u Peres, bad u Serah. (Kiwei pat ki khun shynrang jong u Judah: u Er bad u Onan ki la ïap noh ha Kanaan); ki khun shynrang jong u Peres ki long u Hesron bad u Hamul. 13U Issakhar bad ki khun shynrang jong u: u Tola, u Puah, u Jashub, bad u Shimron. 14Ki khun shynrang jong u Sebulun: u Sered, u Elon, bad u Jahlil. 15Kine ki dei ki khun shynrang ba ka Leah ka la kha na u Jakob ha Mesopotamia nalor ka khun kynthei jong u, ka Dinah. Baroh ki khun ki ksiew kiba u ïoh na ka Leah ki long laiphew lai ngut.
16U Gad bad ki khun shynrang jong u: U Sephon, u Haggi, u Shuni, u Esbon, u Eri, u Arod, bad u Areli. 17U Asher bad ki khun shynrang jong u: u Imnah, u Ishbah, u Ishbi, bad u Beraïah lem bad ka Serah ka para jong ki. Ki khun shynrang u Beraïah ki long u Heber bad u Malkhiel. 18Kine khathynriew ngut ki long ki khun ki ksiew ba u Jakob u ïoh na ka Silpah ïa kaba u Laban u ai ha ka Leah ka khun jong u ban long ka mraw jong ka.
19Ki khun ka Rakhel ka tnga jong u Jakob: U Joseph bad u Benjamin. 20#Jen. 41:50-52Ha Ijipt u Joseph u la ïoh ar ngut ki khun shynrang, u Manasseh bad u Ephraim, na ka Asenath ka khun jong u Potiphera, u lyngdoh ha ka Heliopolis. 21Ki khun shynrang jong u Benjamin ki long u Bela, u Bekher, u Ashbel, u Gera, u Naaman, u Ehi, u Rosh, u Muppim, u Huppim, bad u Ard. 22Kine khatsaw ngut ki long ki khun ki ksiew ba u Jakob u ïoh na ka Rakhel.
23U Dan bad u Hushim u khun jong u. 24U Naphtali bad ki khun shynrang jong u: u Jahsil, u Guni, u Jeser, bad u Shillem. 25Kine hynñiew ngut ki long ki khun ki ksiew ba u Jakob u ïoh na ka Bilhah kaba u Laban u ai ha ka Rakhel ka khun jong u ban long ka mraw jong ka.
26Baroh ki khun ki ksiew jong u Jakob kiba la leit sha Ijipt, lait noh ki tnga jong ki khun shynrang jong u, ki long hynriewphew hynriew ngut. 27#Ki Kam. 7:14Ki khun shynrang u Joseph ïa kiba la kha ha Ijipt ki long ar ngut; kumta ki briew baroh kiba na ka ïing u Jakob kiba la wan sha Ijipt ki long hynñiewphew ngut.
U Jakob bad la ka longïing longsem ha Ijipt
28U Jakob u phah ïa u Judah ban nang leit sha khmat ban ong ïa u Joseph ban wan ïakynduh bad u ha Goshen. 29Haba ki la poi hangta, u Joseph u kiew ha la ka kali kulai bad u leit sha Goshen ban ïashem ïa u kpa jong u. Haba ki la ïashem, u Joseph u la piam khak ïa la u kpa, u da ïam slem ha ka ryndang u kpa. 30U Jakob u ong ha u Joseph, “Mynta nga la kloi lada ïap noh ruh, namar ba nga la ïohi ïa me bad tip ba me dang im.”
31Nangta u Joseph u ong ha la ki hynmen bad ha ki khun ki kti u kpa jong u, “Nga dei ban leit ïathuh ha u syiem ba ki hynmen ki para jong nga bad ki ba-ha-ïing ha-sem i pa kiba shong ha Kanaan ki la wan poi sha nga. 32Ngan ïathuh ha u ba phi dei ki nongri jingri, bad ba phi la wan ïalam ïa la ki kynhun langbrot, ïa kiwei de ki jingri, bad ïa kiei kiei baroh kat kiba phi don. 33Haba u syiem u khot ïa phi bad u kylli phi ïatrei ïaktah aïu, 34phin jubab ba phi dei ki nongri jingri baroh shi jingim kumba long ki kpa tymmen jong phi. Kumta keiñ un shah ïa phi ban shong ha Goshen; namar ki nong Ijipt kim kwah kano kano ka jingïadei bad ki nongap langbrot.”
Currently Selected:
JENESIS 46: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
