JENESIS 47
47
1Kumta u Joseph u leit ïalam san ngut na ki hynmen jong u sha u syiem. U ong, “I pa bad ki hynmen ki para jong nga ki la wan na ka ri Kanaan ryngkat bad ki kynhun langbrot bad ki jingri jingdup jong ki, bad baroh ruh kat kiba ki don. Mynta ki don ha Goshen.” 2Nangta u pynithuh ïa kita ki hynmen jong u ha u syiem. 3U syiem u kylli ïa ki, “Phi trei phi ktah aïu?”
“Kynrad, ngi dei ki nongap langbrot, kumba ju long ki kpa tymmen jong ngi,” ki jubab. 4“Ngi la wan ban sah ha kane ka ri, namar ha Kanaan ka don ka 'nemsniew kaba jur katta katta haduh bym don phlang shuh ïa ki jingri jong ngi. Sngewbha ai jingbit ïa ngi ban shong ban sah ha ka thain Goshen.” 5U syiem u ong ha u Joseph, “I pa jong phi bad ki hynmen ki para jong phi ki la wan sha phi, ka ri Ijipt ka long ka jong ki. 6Ieh kin ïashong ïasah ha Goshen, ka jaka kaba bha tam ha ka ri. Bad lada don napdeng jong ki, ki briew kiba tbit, buh ïa ki ban peit ïa ki jingri jong nga.”
7Nangta u Joseph u wan ïalam ïa u Jakob u kpa jong u bad u pynithuh ïa u ha u syiem. U Jakob u kyrkhu kyrdoh ïa u syiem, 8bad u syiem u kylli ïa u, “Phi la dap katno ka rta?”
9U Jakob u jubab, “Ha ka jingim jong nga kaba ïaidwir nawei shawei nga la dap shispah laiphew snem. Kita ki snem ki long kiba khyndiat bad kiba eh, ym kum ki snem kiba jrong ba ki kpa tymmen jong nga ki la pynlut ha ka jingïaid wir.” 10U Jakob u kyrkhu khublei bad u leit noh. 11Nangta u Joseph u ai jaka shong jaka sah ïa la u kpa bad ïa la ki hynmen ha Ijipt, ha ka bynta kaba bha tam hajan ka nongbah Rameses, kumba u syiem u la hukum. 12U Joseph u pyndap pynbiang jingbam ïa la u kpa, ïa la ki hynmen ki para, bad ïa ki ba-ha-ïing u kpa jong u baroh katba ki ïadon, haduh kiba khynnah tam.
Ka 'nemsniew
13Kata ka 'nemsniew ka la jur katta katta ba ym don jingbam shuh hangno hangno, ki briew ha Ijipt bad ha Kanaan ki la nang tlot namar ka jingthngan. 14Katba ki nang thied kew, u Joseph u lumlang ïa ka pisa bad u leit ai ïa ki sha ïingsyiem. 15Haba ym don pisa shuh ha Ijipt bad ha Kanaan, baroh ki nong Ijipt ki ïawan sha u Joseph, bad ki ong, “Ai jingbam ba ngin bam! Wat ai ba ngin shu ïapthngan! Ngim don pisa shuh.”
16U Joseph u jubab, “Lada phim don pisa shuh, wallam ïa ki jingri jong phi; te ngan ïapli ïa ka jingbam bad kita ki jingri.” 17Kumta ki wallam ïa la ki jingri sha u Joseph; u pat u ïapli ïa ka jingbam bad ki kulai, ki langbrot, ki blang, ki jingri jingdup, bad ki kada. Ha kata ka snem u pyndap ïa ki da kaba shu ïapli bad ki jingri jingdup jong ki baroh.
18Ha ka snem kaba bud, ki ïawan sha u, bad ki ïa-ong, “Kynrad, ngin ym buhrieh ïa ka jingshisha na phi ba ki pisa jong ngi baroh ki la lut, bad ba ki jingri jingdup jong ngi ki la dei ki jong phi. Ngim don ei ei shuh ban ai ïa phi lait noh sa tang ki met jong ngi bad ki lyngkha jong ngi. 19Wat ai ba ngin ïap, To leh ei ei! Wat ai ba ki lyngkha jong ngi kin shu sah shrah. Thied noh ïa ngi, bad ïa ka khyndew ka shyiap jong ngi, ban ïa-bujli bad ka bam. Ngin mat long noh ki mraw u syiem, bad u pat un long trai ïa ka khyndew ka shyiap jong ngi. Ai kew ïa ngi ba ngin dup im, bad ai symbai ba ngin ïoh bet ha la ki lyngkha.”
20Kumta keiñ u Joseph u thied lut ïa ka khyndew ha Ijipt na ka bynta u syiem. La pynbor ïa uwei pa uwei u nong Ijipt ban die ïa la ki lyngkha namar ba ka 'nemsniew ka la jur palat; bad baroh ka khyndew ka kylla long ka jong u syiem. 21U Joseph u la pynlong mraw ïa ki briew na tduh sha tduh ka Ijipt. 22Ïa ka khyndew kaba dei ka jong ki lyngdoh te um shym thied. Kim donkam ban die ïa la ka khyndew namar ba ki ïoh ka baibam kaba thikna na u syiem, bad ki im da kata. 23U Joseph u ong ha kita ki briew, “Phi ïohi mynta ba nga la thied ïa phi bad ïa ki khyndew jong phi na ka bynta u syiem. Shim une u symbai ba phin ïabet ha ka khyndew. 24Ha ka por ot, phin ai shi bynta na ka san bynta ha u syiem, bad kaba sah saw bynta kan long ka jong phi, ba phin ïoh buh symbai, bad ba phin ïoh jingbam na ka bynta ïa lade bad ïa ki ba-ha-ïing ha-sem jong phi.”
25Ki jubab, “Phi la pyllait im ïa ngi; phi la lehbha ïa ngi, bad ngi ruh ngin long ki mraw jong u syiem.” 26Kumta u Joseph u shna ïa ka aiñ kaba ïadei bad ka khyndew ha ri Ijipt ba kaba shi bynta na ka san bynta na ka jinglum ha ka aïom ot kan long ka jong u syiem. Kane ka aiñ ka dang neh haduh kane ka sngi. Tang ka khyndew jong ki lyngdoh te kam shym kylla long ka jong u syiem.
Ka jingkwah kaba khatduh u Jakob
27Ki Israel ki shong ki sah ha ri Ijipt ha thain Goshen, ha kaba ki ïoh ban lum ka spah ka phew, bad ki nang ïaroi parum pareh. 28U Jakob u sah ha Ijipt khathynñiew snem, haduh ba un da dap shispah sawphew hynñiew snem ka rta.
29 #
Jen. 49:29-32; 50:6 Shuwa ba u Jakob un ïap, u khot ïa u Joseph u khun jong u, bad u ong ha u, “Buh ïa la ka kti hapdeng ki lbong jong nga, bad kular da shisha ba phin ym tep ïa nga ha Ijipt. 30Nga kwah ba phin tep ïa nga bad la ki kpa tymmen; rah ïa nga na Ijipt, bad tep ïa nga ha ka jaka ba la tep ïa ki.”
U Joseph u jubab, “Ngan leh kumba phi ong.”
31Nangta u Jakob u ong, “Pynlong ka jingsmai ba phin leh kumta.” U Joseph u la pynlong ka jingsmai, bad u Jakob ruh u ainguh hangta ha jingthiah.
Currently Selected:
JENESIS 47: KHACLBSI
Highlight
Share
Copy
Want to have your highlights saved across all your devices? Sign up or sign in
Khasi CL Bible
Copyright © Bible Society of India, 2016.
Used by permission. All rights reserved worldwide.
