तइरकर 1
1
चिन्हा परछा
1अना थेओफिलुस! ऎन एंग्है मुन्द ता पुथी नू येसुसी नंजका अरा सिखाबाचका उर्मी कत्थन लिखचकादन।#लूक 1:1-4 2आस तान चज्जियस अबड़ा तइरकर गे नेम्हा बॊलतस ती पॆसका चिच्का ती मेर्ख़ा होतारना गूटी येसुस नंजका अरा सिखाबाचका उर्मी कत्थन अइय्यम लिखचकन। 3येसुस दुक्खे भोगचका अरा केचका ख़ॊख़ा आर गे कोड़हे सबुत ऎदस का तान उज्जालदस। अरा आर गे बग्गे हॆल चालीस उल्ला गूटी ऎथ्रते रहचस अरा धर्मेसी राजी ही पत्त नू कछनख्रते रहचस। 4ओंग्होल येसुस आर गने मंडी ओनो बारी आरिन पॆसस का#लूक 24:49, “नीम येरुसलॆम नगरेन अमके अम्बा, लिकिन बंगासी गच्छरका ही पाब ऎरा, एकदा ही पत्त नू ऎन निमन मुन्द तिंकन। 5यॊहनस गा अम्मु ती नॊड़रताचस, लिकिन जोक्क उल्ला ख़ॊख़ा नीम नेम्हा बॊलतस ती नॊड़तार'ओर।”#मत्ता 3:11; मर 1:8; लूक 3:16; यॊ 1:33
येसुस मेर्ख़ा होतारना
6एकाबारी तइरकर ख़ॊंड़रर ख़ने येसुसिन मेंजर, “अना उर्बायो, नीन अक्कुनिम इस्राऎल आलर गे राजिन किर्त'ओय चि'ओय का?” 7येसुस आरिन बाचस, “बंगस एका उल्ला महले बेड़ा गुट्ठिन ओक्ताचस ती तंग्है आकुस नू दिम उइय्कादस, अदिन अख़ना निम्है चाड़ मलकी। 8लिकिन इकला नेम्हा बॊलतस निम्है मइय्याँ एत्तोस, नीम सवंग ख़क्खोर अरा येरुसलॆम नू अरा गोट्टा यूदेया अरा समारिया नू अरा ख़ॆख़ेल ही ठुट्ठु गूटी नीम एंग्है गोवाह मनोर।”#मत्ता 28:19; मर 16:15; लूक 24:47,48 9आस इबड़न बाचका ख़ॊख़ा, आर ही ईरनुम ईरनुम आस मइय्याँ होतारस। अरा ओन्टा बदाली आर ही ईरनुम ती आसिन कुल्लिया चिच्चा।#मर 16:19; लूक 24:50,51 10अरा आसी कानुम, एकाबारी आर मेर्ख़ा तरा मॆन ऎरनुम रहचर, ख़नेम आचका ऎंड़ मॆतर पंडरू किचरी अत्तर आर गुसन बरचर इज्जर। 11अरा आर बाचर, “अना गलिलेया आलारो, नीम एन्देरगे इज्जनुम मेर्ख़ा तरा मॆन ऎरालदर? ई येसुस, नॆ निम्है गुसते मेर्ख़ा होतारस, एकासे नीम आसिन मेर्ख़ा काना ईरकादर, अन्नेम आस फिन बर'ओस।”
मतियासी चाजरना
12तहाँ आर जैतून नामे ही परता ती येरुसलॆम किर्रियर। ईद येरुसलॆम ती अधा कॊस गेच्छा नू र'ई। 13अरा असन आर अंड़सियर ख़ने, ओन्टा पाटन कुठला नू केरर। अइय्यम पतरस अरा यॊहन अरा याकॊब अरा अन्द्रेयस अरा फिलिप्पोस अरा तॊमस अरा बरतोलोमैस अरा मत्तायोस अरा हलफैसी तंग्दस याकॊब अरा यहूदीर ही छछिन्द सैना ता सिमॊन अरा याकॊबसी तंग्दस यूदस र'आलियर।#मत्ता 10:2-4; मर 3:16-19; लूक 6:14-16 14इबड़ा ओर्मर अरा जोक्क मुक्कर येसुसी तंग्यो मरियम, अरा आसी भइय्योर गने ओन जिया मंजर ती गोहरारना अरा ने'अना नू र'आलियर।
15अबड़ा उल्ला नू उन्दुल मलागूटी ओन सौ बीस आलर ख़ॊंड़रका रहचर, पतरस आर ही मझी नू इज्जस ती बाचस, 16“अना भईरो, नेम्हा पुथी ता लिख्रका मन्ना चाड़ रहचा, आद नेम्हा बॊलतस दाऊदसी बई ती येसुसिन हॆंरका आलर गे कड़हाब'ऊ रहचका यूदसी पत्त नू मुन्द बाचका रहचस। 17यूदस गा एम्है गने गन्तारस, अरा ई सुसर'अना नू संगे रहचस। 18(यूदस तंग्है मलदौ नलख ही अर्जाचका ती ओन्टा ख़ल्ल ख़ीन्दियस, अरा आस अइय्या कुक्कु भरसा खत्रस, अरा आसी कूल बिदिगरा केरा, अरा आसी पोट्टा बहरी उरखा केरा। 19ई कत्थन येरुसलॆम ता उर्मी र'ऊ आलर अक्खर। औंगे आ ख़ल्ल ही नामे तम्है भखा नू ‘हकेलदामख़’ बातार'ई, इदही माने ‘ख़ॆंस ही ख़ल्ल’ हवे।)#मत्ता 27:3-8 20ईद गा दाऊदसी डंडी पुथी नू एन्ने लिख्रकी र'ई,#भज 69:25
‘आसी र'अना अड्डा धंस्र'ओ क'ओ नेकअन, अरा अइय्या नॆ हूँ मल ओक्र'ओर नेकअन।’
अरा#भज 109:8
‘आसी पद आबोन नन्नस इंझ्र'ओस नेकअन।’
21औंगे उर्बा येसुस एम्है संगे काला बर'आ लगियस अबड़ा उर्मी बेड़ा गूटी एम्है गने रहचका आलर ती ओर्तोसिन नाम यूदसी अड्डा नू चाजना र'ई। 22आस येसुस यॊहनस ती नॊड़रस ती मेर्ख़ा होतारना गूटी एम्है गने रहचका आलर ती ओर्तोस र'अना र'ई। आस एम्है गने येसुसी उज्जा चो'अना ही गोवाह र'ओस।”#मत्ता 3:16; मर 1:9; 16:19; लूक 3:21; 24:51 23ख़ने आर बरसब्बास बारना यॊसॆफसिन (ईसी नन्ना नामे यूसतोस हवे) अरा मत्तियसिन इजताचर। 24अरा आर एन्ने बिन्ती नंजर, “अना उर्बायो, नीन ओर्मर ही मनेन अख़दय, इदिन दहदर नना का इबड़र ती नॆकन चज्जिकादय, 25का आस ई सुसर'अना नलख अरा तइरकर ही अड्डन हो'ओस, एकदन यूदस अम्बियस ती तंग्है अड्डा किर्रिम बिच्चियस।” 26तहाँ आर आर ही नामे ती चिठी टिड्डर अरा चिठी मत्तियसी नामे नू उरखा। ख़ने आस अबड़ा ग्यारा तइरकर गने तइरकस मंजस।
Currently Selected:
तइरकर 1: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
