तइरकर 2
2
नेम्हा बॊलतासी एत्तना
1पेन्तॆकोस्तॆ#2:1 ईद यहूदीर ही ख़ोयना परब हवे। ईद कट्टना परब ही पचास पूरना उल्ला नू मना लिया। परब ही उल्ला अंड़सिया ख़ने आर ओर्मर ओन अड्डा ख़ॊंड़रका रहचर।#लौव्य 23:15-21; व्य 16:9-11 2आचका ही मेर्ख़ा ती कोहाँ बरन्डो ही ख़रख़ना लेक्खा ख़रख़ना मेन्द्रा, अरा आर उक्काचर आ गोट्टा एड़पा गुदकारा केरा। 3अरा आर गे चिच्ची ही हदकारना गुट्ठी लेक्खा ऎथ्रा, अरा अबड़ा ओर्त ओर्त मइय्याँ उक्किया। 4अरा अबड़ा ओर्मर नेम्हा बॊलतस नू निन्दियर केरर, अरा बॊलतस एकासे कछनख्र'आ गे सवंग चिच्चस अबड़ा ओर्मर नन्ना नन्ना भखा कछनख्र'आ हेलरर।
5आ बारी ख़ॆख़ेल ता बग्गे राजी ती परब गे बरचका भगती यहूदीर येरुसलॆम नू र'आलियर। 6ई ख़रख़ना मंजा ख़ने, गोंहड़ा ख़ॊंड़रा ती तम्है तम्है भखा नू अबड़ा आलारिन कछनख्रनन मेंजर ती आर अकबकरर। 7आर नगदे अकबकरर केरर अरा अनचकरर ती ब'आ हेलरर, “अबड़ा कछनख्र'ऊ ओर्मा आलर गलिलेयर मलनर का? 8होले नाम एकासे तम्है तम्है अयंग भखा ही भखा नू मेन्दत? 9नम्है नू पारथी अरा मॆदी अरा एलामिती अरा मेसोपोतामिया नू र'उर अरा यूदेया अरा कप्पदोकिया अरा पोन्तोस अरा आसिया 10अरा फ्रुगिया अरा पम्फुलिया अरा मिसर अरा कुरॆनॆ हेद्दे ता लीबिया चक ता आलर अरा रोम ती कुद्दा ऎरा बरचका आलर 11अरा यहूदी अरा यहूदी मंजका आलर अरा क्रॆस अरा अरब ता आलर हूँ र'अनर। नाम अपन अपन भखा गुट्ठी नू आर धर्मेसी अजगुत नलख गुट्ठी ही पत्त नू तेंगनन मेन्दत।” 12अरा आर ओर्मर अकबक मंजर अरा दुभेदी मंजर ती अपन ती नन्नारिन ब'आ हेलरर, “ईद ही मने एन्देर हवे?” 13लिकिन नन्नर हंसी नंजर ती बाचर, “ईर गा बग्गे उंखका र'अनर।”
पतरसी सिखाब'अना
14तहाँ पतरस अबड़ा ग्यारा तइरकर गने इज्जस अरा जॊरसरिया ब'आ हेलरस, “अना यहूदी आलारो अरा येरुसलॆम ता र'ऊ आलारो, इदन अख़'आ हो'आ अरा एंग्है कत्थन चिहुंक लग'अय मेना। 15एकासे नीम सोचदर अन्ने ईर उंखका आलर मलनर, अक्कुन गा उल्ला ही नौ बज'आली। 16लिकिन ईद धर्मेसी कत्था तिंगू यॊऎलसी बाचका कत्था लेक्खा मना ली।
17‘धर्मेस बाचकादस ‘मुंज्रना ही उल्ला गुट्ठी नू
ऎन उर्मी आलर मइय्याँ एंग्है बॊलतन तुन्दोन,
होले निम्है कुक्को कुक्के ख़द्दर धर्मेसी कत्थन मुन्द तेंगोर,
अरा निम्है जॊंख़र देखार गुट्ठी ऎरोर,
अरा निम्है पचगीर तुंगुल गुट्ठी ऎरोर।
18अरा ऎन अबड़ा उल्ला नू एंग्है जॊंख़र
अरा जॊंख़ पेल्लर मइय्याँ हूँ एंग्है बॊलतन तुन्दोन।
होले आर धर्मेसी कत्थन मुन्द तेंगोर।
19अरा ऎन मइय्याँ मेर्ख़ा नू अजगुत नलख ऎद'ओन,
अरा किय्या ख़ॆख़ेल नू ख़ॆंस अरा चिच्ची
अरा अजम कुहड़ा ही चिन्हा ऎद'ओन।
20उर्बासी कोहाँ अरा लौकारना उल्ला ही बरना ती मुन्द
बीड़ी ऊख़ा अरा चन्दो ख़ॆंस लेक्खा मनो क'ओ।
21तहाँ एका एका ओर्तर उर्बासी नामेन गोहरार'ओर
आर नाड़र'ओर।’’#योए 2:28-32
22इस्राऎल आलारो, इबड़ा कत्थन मेनके। नीम अख़दर का धर्मेस नासरेत ता येसुस ती एका कोहाँ अजगुत नलख अरा अकबक नलख अरा चिन्हा गुट्ठी निम्है मझी नू नंजस। इत्रु ती धर्मेस आसिन निमन ऎदस का आस धर्मेस तरती तइरकाचस। 23धर्मेसी ओक्ताचका चिता बुता अरा धर्मेस ती मुन्द बाचका कत्था लेक्खा आस सोंपतारस। आ येसुसिन नीम धरतारकी पपहर ही ख़ेक्खा ती क्रुस नू अरगकर ती पिटकर।#मत्ता 27:35; मर 15:24; लूक 23:33; यॊ 19:18 24लिकिन धर्मेस आसिन खे'अना ही सस्ती गुट्ठी ही नुंजना ती अम्बताचस ती आसिन उज्जताचस चॊदस। खे'अना गा आसिन तंग्है तबे नू उइय्या पोल्ला।#मत्ता 28:5,6; मर 16:6; लूक 24:5 25आसी पत्त नू दाऊद बॆलस एन्ने ब'अदस,
‘ऎन ऎरदन का उर्बस सगरो एंग्है मुन्दहारे र'अदस।
आस एंग्है तीना पक्खा उक्कादस,
औंगे ऎन जिटजिट र'अदन।
26औंगे एंग्है जिया रिझ्र'ई,
अरा एंग्है ततख़ा एंग्है रिरयारनन तिंग'ई,
अरा एंग्है मॆद असरा ती ख़न्न ऎख़र'ओ।
27एन्देरगेका नीन एंग्है बॊलतन केचकर ही मझी नू मल अम्बोय,
अरा नीन निंग्है नेम्हा आलासिन कित्ता मल चि'ओय।
28नीन एंगन उज्जना ही डहरे गुट्ठिन अख़ताचकय।
अरा निंग्है मुन्दहारे एंगन रिझ ती नीन्द'ओय।’#भज 16:8-11
29अना भईरो! पूरखा दाऊदसी पत्त नू ऎन निमन बड़ियर गने ब'आ ओंग्दन का, आस केच्चस केरस अरा आसिन मंडियर हूँ, अरा आसी मसड़ा इन्ना गूटी हूँ नम्है मझी नू र'ई। 30दाऊदस ओन्टा धर्मेसी कत्था तिंगुस रहचस। आस अख़'आलियस का धर्मेस किरया मोक्खस ती आसिन एन्ने बाचका रहचस, ‘ऎन निंग्है जईपुंईरिन ओर्त आलासिन निंग्है बॆल-गदिया नू ओक्त'ओन।’#भज 132:11; 2सामु 7:12,13 31दाऊदस मुन्द तिम इदन अक्खस ती मसीसी उज्जा चो'अना ही पत्त नू एन्ने बाचस, ‘धर्मेस आसिन केचकर ही मझी नू मल अम्बियस अरा आसी मॆदन कित्ता मल चिच्चस।’
32ई येसुसिन धर्मेस केचका ती उज्जताचस चॊदस, ऎम ओर्मम इदही गोवाह हिकदम। 33तहाँ धर्मेस आसिन होच्चस ती तंग्है गने ओक्तारकी राजी नन्ना ही मईन आबोन चिच्चस। अरा आस बबस गच्छरका नेम्हा बॊलतासिन ख़क्खियस ती अदिन नमा चिच्चस, एकासे अक्कुन नीम ऎरदर अरा मेन्दर। 34दाऊदस गा मेर्ख़ा मल्ला अरगका। लिकिन आस ब'अदस,
‘उर्बस एंग्है उर्बासिन बाचस,
‘नीन एंग्है तीना पक्खे उक्का र'आ,
35एका गूटी ऎन निंग्है बैरीरिन
निंग्है तबे नू मल ओन्द्र'ओन।’’#भज 110:1
36औंगे इस्राऎल ही ओर्मा आलर इदन मानिम गने अख़'आ हो'आ का नीम क्रुस नू ठोकचका ई येसुसिन धर्मेस उर्बस हूँ अरा मसीस हूँ कमचस।”
37एकाबारी आलर इदिन मेंजर ख़ने आर ही जिया दोलख़्रा, अरा आर पतरस अरा नन्ना तइरकर ती मेंजर, “भईरो, एमा एन्देर नन्ना मनो?” 38पतरस आरिन बाचस, “नीम जियन किर्त'आ, अरा नीम ओर्मा आलर निम्है पाप गुट्ठी ही छमा गे येसु मसीसी नामे ती नॊड़र'आ। होले नीम इनाम नू नेम्हा बॊलतासिन ख़क्खोर। 39एन्देरगेका ई गच्छरका निमा गे अरा निम्है ख़द्दर गे अरा नन्ना राजी गुट्ठी नू र'उर गे हूँ हवे। ईद उर्बस नम्है धर्मेस तंग्है गुसन मींख़का ओर्मा आलर गे हवे।”
40तहाँ पतरस अउरिम कोड़हे कत्थन मेन्ताचस अरा चेता बाचस, “नीम निमन ई कुचुरहा परिया ती बछाब'आ।” 41एकार पतरसी कत्थन पत्ताचर आर नॊड़रर। अउलम तीन हजार केम आलर चेलर गने मेसरर। 42अरा आर तइरकर ही सिखाब'अना अरा अपन ती नन्नर गने चोन्हा ती संगे भेंटारना नू अरा संगे ओन्ना-मॊख़ना ती उर्बासी दाँड़े आबोन सुरता नन्ना नू अरा संगे गोहरारना नू लक्का रहचर।
नेम्हा आलर ही ख़ॊंड़रना
43ओर्मर मइय्याँ इल्चका कोरचा केरा, अरा नगदे कोहाँ कोहाँ अजगुत नलख अरा चिन्हा तइरकर ती मनालिया। 44अरा उर्मी पत्त'ऊ आलर ओन संगे र'आलियर, अरा आर ही एन्द्रा रहचा अबड़ा ओर्मर ही सजहा रहचा#तइ 4:32-35। 45आर तम्है जिनिसन अरा कुर्जिन बीसालियर अरा अदही ढिबन ओर्मर ही चाड़ ही लेक्खा ओर्मर गे ख़ट्टालियर। 46आर उर्मी उल्ला ओन जिया मनरकी धर्मेसी मन्दिर ही चाली नू ख़ॊंड़र'आलियर। अरा तम्है एड़पा एड़पा गुट्ठी नू उर्बासी दाँड़े आबोन सुरता नन्ना ती रिझ अरा उजगो जिया ती मंडी ओनालियर। 47अरा धर्मेसी ओहमा ननालियर ती उर्मी आलर ती मया ख़क्खियर। अरा नॆ नॆ नाड़र'आलियर आरिन उर्बस उर्मी उल्ला आर नू मेस'आलियस।
Currently Selected:
तइरकर 2: KURUXBSI
Highlight
Share
Copy
Want to have your highlights saved across all your devices? Sign up or sign in
Kurux NT - पुना गच्छरना NT
Copyright © Bible Society of India, 2014.
Used by permission. All rights reserved worldwide.
