JOHAN 14

Jisu hi Pâ kyn tungnâ lampui

1“Nyng mulung chukrypak mar se; Pathyn nyng khym, kyima rang khawm kyi khym rou. 2Ky Pâ ina awmnâ tamka â awm, awm mar synang chu nyng na ril ta ket ha; nyngni tâsik mun sym rangnin tou ki sê hi. 3Khanung, nyngni tâ mun ky sym zou nung hawng kir nok ket, ky bylap nyng na roi ket; ky awmnâ kyn nyngni khawm nyng awm thyi rang kân. 4Ky sênâ lom lampui te nyng hoi,” a ti.

5Thoma chu a kyn, “Pumâ, ny sênâ lom te hoi mung ha, lampui chu hakhanin maw hoi kyi?” a ti.

6Jisu chu a kyn, “Kyima ngan tâk lampui, chawngtak le damnâ ki chang; ky kân chang lou chu mi atu khawm Pâ kyn â tung thyi awm mak. 7Kyima rang ky nyng hoi synang te, ky Pâ rang khawm nyng hoi rang tâk; atun kyntâ chu atak rang nyng hoi ta, mu khawm nyng mu ta,” a ti. 8Philip chu a kyn, “Pumâ, Pâ rang chu kyi na rumu ta raw, hazikân ngan kyini tâ chu rup at,” a ti.

9Jisu chu a kyn, “Philip sâwtka nyng bylap ky awm ta khawm ato kyi la risin mak che maw? Kyima rang kâ mu khoka chu Pâ rang khawm a mu ta; hakhanin maw, ‘Pâ rang chu kyi na rumu raw te ni ti thyi?’ 10Kyima Pâ kyn ki awm a, Pâ khawm ky kyn â awm tinin khym mak che maw? Nyng kyn chawng ki ril hi kyimân tâ kyimân phoknin ki ril chang mak a; Pâ ky kyn awmnin, a kâm a tho sin. 11Kyima Pâ kyn ki awm, Pâ ky kyn â awm tinin kyi khym rou; a chang mak kale, hi kâmtho ngyi kân lo kyi khym rou. 12Chawngtaktênin, chawngtaktênin nyng na ki ril hi, mi atu khawm kâ khym khoka chu tharo ki tho ngyi hi atak khawm tho seng at; hingyi nêknin tharochawp khawm la tho iat, Pâ kyn ky sê rang tâsiknin. 13Khanung, ki rimingnin nyng zawng khoka chu, pat tho sin ket, Pâ, Sapâ kânin rypâknin a awm thyi rang kân. 14Nyngni ki rimingnin ky nyng zawng khoka chu pat tho ket.

Rythâ rythyng pe rang tâ sawinâ

15“Nyngni ky nyng mawawl a chang nung ky chawngpêk tinka ngyi zawm nyng. 16Khanung, Pâ rang zawng ket a, atak chu champui ro nyng na pe iat, kumkhoka nyng bylap awm rang tânin; 17hamâ chu Rythâ dik tak â chang; khawmol mi hamâ rang chu man thyi ma ngyi, asik chu atak rang mu ma ngyi hoi khawm hoi ma ngyi; nyngni te atak rang nyng hoi a, nyng bylap pat â awm a, nyng kyn la awm at. 18Sarânin nyng na ma nâ ning a; nyng kyn hawng nok ket. 19Tawtkatê tâsiknin khawmol chu kyi mu khâi nâ ni; imyitinung, nyngni te kyi mu nyng; kyima ki dam tâsiknin nyngni khawm dam seng nyng. 20Hatika chu kyima, ky Pâ kyn ki awm, nyngni ky kyn nyng awm, kyima nyng bylap ki awm la hoi nyng. 21Mi atu khawm ky chawngpêk ngyi lanin â zawmmi chu, ka mawawlmi â chang: ka mawawl khoka chu, ky Pâ mawawl at, kyi khawm atak rang chu mawawl ket, a kyn rylang ket,” a ti.

22Khanung Juda (Iskariot chang makmi) chu a kyn, “Pumâ, kyi kyn rylang net a, khawmol mi kyn rylang nâ chini ia, itâ maw?” a ti.

23Jisu chu, atak rang a ril a, ka mawawlmi khoka chu ky chawngpêk zawm at, ky Pâ khawm atak rang mawawl at, a kyn hawng kyi a, a bylap pat awm kyi. 24Mi atu khawm kyi mawawl makmi chu ky chawng pawm mak; chawng hoi ngyi hi ky tâ chang mak, Pâ kâ depmi tâ tou â chang. 25Nyng kyn ky la awm tenka hi chawng ngyi nyng na ki ril hi. 26Imyitinung, Sungmidâimi, Rythâ Rythyng, Pâ ki rimingnin a hawng dep lom ha, hamâ ha atinka nyng na rysyi at, nyng kyn ki ril kipka nyng na la mihoi nok at.

27“Sungdainâ nyngni rang nyng na ky mâk; ky kyntâ sungdâinâ nyng na ky pêk hi; khawmol nyng nai pêk kuvang kyima nyng na pe ming hi. Nyng mulung chukrypak mar se, chi khawm chi mar se. 28‘Sê ta ket a, nyng kyn hawng nok ket,’ nyng kyn ki ti ha nyng hoi ta. Nyngni ky nyng mawawl chang synang Pâ kyn ky sê rang tâsiknin nyng lawm lom â chang; Pâ chu kyima nêknin a rysâng. 29Atun hingyi atung mâna nyng na ki hai ril sai bak tâk hi, a hawng tung tika nyng khym rang kân. 30Nyng kyn a dang chawng ril khâi nâ ning, khawmol mylal hawng tiat a, atak chu ky kyn i ngan nyi mak; 31imyitinung kyima Pâ rang ki mawawl le, Pâ chawng kai pêk ngyi kuvangnin ky tho tinin khawmol mi ngyi yng hoinâ rangnin â chang hi. Ding rou, hinântâ soknin sê tai ti.

Currently Selected:

JOHAN 14: MOLSBSI

Highlight

Copy