JOHAN 15

Jisu chu Grep rui tak â chang

1“Kyima Grep rui tytak ki chang, Ky Pâ chu bakychâ â zaimi. 2Ky mychang atâ myrâ mak khoka rang chu a pai sin a; a myrâ khoka rang chu rythylnin a milang sin, a myrâ hanungzika a tam thyi rang kân. 3Nyng kyn ky chawngril tâsiknin atun khawm nyng na rythyng ta. 4Ky kyn pat awm rou, kyi khawm nyng bylap pat awm ket. A mychang chu grep rui kyn pat a awm mak nung chu amân tâ amân ai myrâ thyi mak kuvangnin, nyngni khawm ky kyn pat nyng awm mak nung myrâ thyi nâ chynyu. 5Kyima ngan tâk grep rui chu, nyngni a mychang nyng chang; mi atu khawm ky kyn awm rengnin kyima khawm a kyn ky awm rengnâ chu, hamâ chu tam taknin a myrâ sin; kyima rechel lounin i ngan tho thyi mak chou. 6Ky kyn pat awm makmi khoka chu, mychang kuvang painin â awm a, â thêm sin; hanung yng rawkhawm a, myia yng to ia, â kâng sin. 7Nyngni ky kyn pat nyng awm kale ky chawng khawm nyng kyn pat a awm kale, nyng nom khoka zawng rou, nyngni tâ tho sin chang at. 8Himâtâsiknin ky Pâ chu rypâknin â awm sin, tam taka nyng myrâ nung; hanungchu ky nungzuimi ngyi chang nyng.

9“Pâ kyima rang kai mawawl kuvangnin kyi khawm nyngni rang nyng na ky mawawl hi; nyngni ky mawawlnâ kyn pat awm rou. 10Nyngni ky chawngpêk ngyi nyng zawm nung chu, ky mawawlnâ kyn pat awm nyng; kyima khawm ky Pâ chawngpêk ngyi ky zawm a, a mawawlnâ kyn pat ki awm kuvang hi. 11Ky zâipâr yng kyn pat a awm rang kân le, nyng zâipârnâ a rikip thyi rangnin hi chawng nyng kyn ki ril hi. 12Himâ hi ky chawngpêk â chang, kyima nyng na ki mawawl kuvangnin nyngni le nyngni khawm rawawl rou. 13Maniâ a champui ruthulnin a nun â paimi tâ lyi chu rawawlnâ dang reng awm mak. 14Ky chawngpêk kipka nyng tho nung chu ky champui ngyi chang nyng. 15Sokro nyng na ti khâi nâ ning; asik chu a pumâ imaw a tho a sokro hoi mak; cham mitou nyng na ti ta ket; asik chu Pâ kyn tharo ki hoi tinka nyng kyn ki ril ta. 16Nyngni ky nyng zen chang mak, kyima mitou nyng na ki zen â chang, va myrâ rang tâ le nyng myrâ pat a awm rang tâsiknin nyng na ki zen â chang; ki rimingnin Pâ kyn nyng zawng khoka nyng na pêk rang kân.

17“Nyng rawawl thyi rang kânin hi chawng ngyi hi nyng na ki pêk â chang.

Khawmol mumâknâ

18“Khawmol nyng na mumâk nung, nyng na mumâk mâna ngan kyima rang kai mumâk tinin nyng hoi rang, 19nyngni khawmolmi nyng chang synang, khawmol hi a kyntâ mi kuvang a mawawl ang; khawmolmi chang mak chou a, khawmolmi kyntâ nyng na ki zen tâsiknin khawmol nyng nai mumâk â chang. 20‘Sokro a pumâ nêknin rysâng mak,’ tinin chawng nyng na ki ril sai ha hamâ nyng mulunga syk rou. Yngni kyima rang ky iyng ron nung te nyngni rang khawm nyng na ron yng; ky chawng yng zawm nung chu nyng chawng khawm zawm yng. 21Imyitinung, hi ngyi hi pheng ki riming tâsiknin nyng chunga tho iyng, kâ depmi rang yng hoi mak tâsiknin. 22Kyima hawngnin yng kyn chawng ril mar nang, rono reng nyi nâ ni ngyi, imyitinung atun chu yng rono thupnâ nyi khâi nâ ni ngyi. 23Mi khoka kâ hotmi chu ky Pâ rang khawm ai hot â chang. 24Tharo, midang atu ngan ai la tho mak yng kyn tho mar nang, rono yng nyi mak rang; imyitinung atun te yngni te kyima le ky Pâ kyi nikân rang kyi nyng mu ta ia, mumâk khawm kyi nyng mumâk ta. 25Zê khawm chang synang, yng Dân Lekhabu kyn, ‘Yngni a rawrawng ky iyng mumâk,’ tinin chawng ai rusui ha a hawng tung thyi rang kân yng tho â chang hi.

26“Pâ kyntâ champui nyng kyn ky dep lom, Pâ kyntâ ai sok Rythâ dik tak chu a hawng tung tika, atak chu ky chawng nyng na ril at. 27Nyngni ngyi khawm ril seng nyng, aphut kale tâ ky kyn nyng awm tâsiknin.

Currently Selected:

JOHAN 15: MOLSBSI

Highlight

Copy