GENESIS 13
13
Abram Leh Lot Kikhenna
1Aigupta gam a kipan Abram pawt in simlam ah apaitou a, akiang ah azi, aneih tengteng leh Lot leng apaitou hi. 2Abram tuh ganta, dangkate leh dangka-engte in ahausa mahmah hi. 3Negev a kipan Bethel tan in apai zel a, Bethel leh Ai khua kikal atung a, achil a apuanin akaihna mun tanpha, 4maitam adoh masakna mun mah ah Abram in Toupa min alou hi.
5Lot leng Abram kiang a pai in, belamhonte, bawnghonte leh puaninte anei hi.
6A-omkhawmna ding un gam akichingta kei a; avan neih uh atam mahmah ziak in, a-omkhawm thei nawnta kei uhi. 7Abram ganpute leh Lot ganpute kikal ah kiselna ahong omta a; huai lai in huai gam ah Kanaante leh Perizte ateng uhi.
8Abram in Lot kiang ah, “Hehpih in, nang leh kei kikal ah, na ganpute leh ka ganpute kikal ah leng kiselna om kei hen; unau lah i hi ngal a,” achi hi. 9“Gam pumpi na ma ah a-om kei a hia? Hehpih in ka kiang a kipan tuam om mai in. Nang veilam a na paileh, kei taklam ah ka pai ding, ahihkeileh, nang taklam a na paileh, kei veilam ah ka pai ding,” achi hi.
10Lot adak a, Zoar kholam zuan in, Jordan Phaizang tengteng, Toupa huan bang ahihkeileh Aigupta gam bang in, gam chih a tui tampi omna ahi chih athei hi: Toupa'n Sodom leh Gomorrah ahihsiat ma lah ahi ngal a.
11Lot in Jordan Phaizang tengteng atelta hi. Suahlam ah Lot akisuan a; huchi in akikhenta uhi. 12Kanaan gam ah Abram ateng a, phaizang khopite ah Lot ateng a, Sodom khua pha in apuanin akai hi. 13Ahi a, Pathian mitmuh in Sodom mite nakpitak in hoih lou leh khial in a-om uhi.
Abram Akisuan
14Akiang a kipan Lot a-om tuam nung in, Toupa'n Abram kiang ah, “Dak inla, na omna a kipan mallam, simlam, suahlam leh tumlam en in. 15Na gam muh tengteng na kiang ah leh na suante kiang ah tangtawn a ding in ka hon pe ding. 16Na suante lei a leivui bang in ka bawl ding hi. Mi'n lei a leivui asim seng uleh, na suante leng sim seng ahi ding uh. 17Thou inla, gam dung leh vai palsuak in; na kiang a hon pe ding ka hi,” achi hi. 18Abram in apuanin asuan a, Hebron a om Mamre tosaw kiang ah atengta a, huai ah Toupa a ding in maitam adoh hi.
Currently Selected:
GENESIS 13: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
