GENESIS 14
14
Abram In Lot Ahunkhia
1Huan Shinar kumpipa Amraphel, Ellasar kumpipa Ariok, Elam kumpipa Kedorla-omer, Goiim kumpipa Tidal dam lai in hichi ahong hi a; 2amau Sodom kumpipa Bera asim uhi. Gomorrah kumpipa Birsha, Admah kumpipa Sinab, Zeboiim kumpipa Semeber, Bela kumpipa leng asim uhi, huai tuh Zoar ahi. 3Hiai tengteng Siddim Phaizang ah apang uh, huai tuh Chi Tuipi ahi. 4Kum sawm-le-nih sung Kedorla-omer nuai ah ana om ua, akum sawm-le-thumna in ahelta uhi. 5Akum sawm-le-lina ah Kedorla-omer leh akiang a kumpipa omte ahong ua, Asteroth-karnaim ah Rephaimte athat ua, Ham ah Zuzimte athat ua, Shaveh-kariathaim ah Emimte athat uh; 6a-omna Seir tang a El-paran gamdai zul a Horte omna tanpha in. 7Akik nawn ua, Enmishpat atung ua, huai ahihleh Kadesh ahi a, Amalekte gam a mi teng leh Amorte, Hazezon-tamar a tengte leng athat nawn uhi.
8Sodom kumpipa, Gomorrah kumpipa, Admah kumpipa, Zeboiim kumpipa leh Bela (huai Zoar kichi) kumpipa apawt ua, Siddim Phaizang ah amau sual ding in apangta uhi. 9Elam kumpipa Kedorla-omer, Goiim kumpipa Tidal, Shinar kumpipa Amraphelte, Ellasar kumpipa Ariok sual ding in, Kumpipa li in kumpipa nga asual uhi. 10Longnai khuk in Siddim Phaizang adim a; Sodom leh Gomorrah kumpipate ataikekna lam uah, khenkhatte huai ah akia ua, akeloute tang ah ataitou uhi.
11Sodom leh Gomorrah mite sum tengteng leh anek ding tengteng uh la in apaita uhi. 12Sodom a om Abram unaupa tapa, Lot leh aneih teng toh alaksak ua, apaita uhi.
13Huai a pan suakta mi khat ahong pai a, Hebru mi Abram ahilh a, amah Amor mi Mamre tosaw kiang a teng ahi. Mamre ahihleh Eshkol leh Aner unaupih ahi a; huai mite Abram toh pangkhawm ahi uh. 14Abram in unaupa sal in api uh chih azaktak in, a-inn a piang, ama'n achilsiamsa mi zathum apikhia a, Dan khua pha in adelhta hi. 15Zan in amau sual ding in amah leh asikhate akihawmzak ua, azou ua Hobah pha in adelh uh; Hobah bel Damaskas mallam a om ahi. 16Thil tengteng alakik nawn vek a, a-unaupa Lot leh aneih tengteng ban ah midang tengteng toh, numeite leng ahon pi nawn hi.
Melkizedek In Abram Avualzawl
17Kedorla-omer leh akiang a om kumpipate zou a, apaikik lam in Shaveh Phaizang (huai Kumpipa Phaizang kichi) ah Abram dawn ding in Sodom kumpipa ahohsuk hi. 18Salem kumpipa Melkizedek in tanghou leh uain ahon tawi a; amah Pathian Tungnungpen siampu ahi. 19Ama'n Abram avualzawl a, “Lei leh van neipa, Pathian Tungnungpen, Abram vualzawl in om hen. 20Na melmate na khut a hon pepa, Pathian Tungnungpen phat in om hen,” achi hi. Abram in amah bangkim a sawm-a-khat apia hi.
21Sodom kumpipa'n Abram kiang ah, “Mite hon pia inla, thilte zaw nang kineih in,” achi hi.
22Abram in Sodom kumpipa kiang ah, “Lei leh van neipa, Toupa, Pathian Tungnungpen lam ah ka khut ka zakta hi. 23Khauzang khat lel leng, khedap khau khat lel leng, na neih himhim ka la kei ding, huchi lou in zaw, Abram, kei hauhsaksak ahi, na chi kha ding,” achi hi. 24“Tangvalte nekmang leh ka mi tonpihte tantuan kia lou zaw ka la kei ding, Aner, Eshkol leh Mamrete'n atantuan uh la uhen,” achi hi.
Currently Selected:
GENESIS 14: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
