GENESIS 21
21
Isak Pianna
1Huan Toupa'n agensa bang in Sarah ava veh a, achiamsa bang in Sarah tung ah Toupa'n ahihta hi. 2Sarah agai a, Pathian in akiang a agen hun seh bang in, atek nung in Abraham tapa aneihsakta hi. 3Abraham in Sarah in aneihsak atapa min Isak asa hi. 4Abraham in Pathian in akiang a thu apiak bang in atapa Isak ni giat achin in azek asumsak hi. 5Atapa Isak apian lai in Abraham kum zakhat a upa ahita. 6Sarah in, “Pathian in hon nuisakta; aza kha peuhmah in hon nuihpih ding uh,” achi hi. 7Amah mah in, “Sarah in naungekte apom ding, chih kua'n ahia Abraham kiang a gen thei ding? Atek nung in tapa ka neihsakta,” achi hi.
8Naungek ahong khanglian a, nawinek atawpsakta uh. Isak nawinek atawpsak ni un, Abraham in ankuang thupitak alui hi.
Hagar Leh Ishmael Sawlkhiakna
9Aigupta mi Hagar tapa, Abraham a ding a aneihsak pen in Isak asimmohbawl lai Sarah in amu hi. 10Huaiziak in Abraham kiang ah, “Hiai sikhanu leh atapa delhkhia in. Hiai sikhanu tapa in ka tapa Isak gou aluahpih thei kei ding,” achi hi. 11Hiai thu atapa mah toh kisai ahih ziak in Abraham ngaih in thil hoih loutak ahi. 12Himahleh Pathian in Abraham kiang ah, “Naupang tungtang thu leh na sikhanu tungtang thu na ngaih in thil hoih lou hi kei hen. Sarah in na kiang a thu agen tengteng zui in, Isak ah na suante kisim ding chih ahi ngal a, 13Sikhanu tapa ah leng, na suan ahih ziak in, nam chih tham ngial ka bawl ding,” achi hi.
14Beltak in Abraham athou a, tanghou leh tuithawl, tui a dim ala a, Hagar kiang a pia in, aliangkou ah asuan a, naupang toh asawlkhia hi. Apai a, Beer-sheba gamdai ah avakvakta hi. 15Tuithawl a tui ahong beitak in, sawlbawk lim nuai khat ah naupang akoihta mai hi. 16“Naupang si ding ka en ngam kei,” achih ziak in gamla kuam, thal kap phakna ding ah, ava pai a, amazawn a tu in ngaihtak in akapta hi.
17Pathian in naupang aw aza a; Pathian angel in van a kipan Hagar asam a, akiang ah, “Bangchi na hia, Hagar? Lau ke'n, a-omna a naupang aw Pathian in aza hi. 18Thou inla, naupang phong in, na khut in len in, amah nam thupitak a bawl ding ka hi,” achi hi. 19Pathian in amit ahihvaksak a, huan tuileh amuta hi. Huai ah ava pai a, tuithawl dim in tui adim a, naupang adawnsak hi. 20Naupang kiang ah Pathian a-om a, ahong khanglian a; gamdai ah ateng zel a, thalkapmi ahong hita hi. 21Paran gamdai ah ateng a; anu'n Aigupta gam a kipan zi aguan hi.
Abraham Leh Abimelek Kithukimna
22Huan hichi ahong hi a, huai lai in Abimelek leh asepaih pawl a heutu Phikol in Abraham kiang ah, “Na thilhih peuh ah na kiang ah Pathian a-om. 23Tu in hiai ah Pathian min lou inla, kei leh ka tapa leh ka tapa' tapa leng khem lou in, ka hon hehpih khit tak sa bang in kei leh na tenna gam hehpih thuk sam ding in ka kiang ah kichiam in,” achi hi.
24Abraham in, “Ka kichiam ding,” achi hi.
25Abimelek sikhate'n tuileh asuhsak ziak un Abraham in Abimelek asal hi. 26Abimelek in, “Hiai thilhih pen kua ahia, ka thei himhim kei. Nang lah na hon hilh ngal kei a, tuni ngal lou in ka za kha himhim kei,” achi hi. 27Abraham in belamte leh bawngtalte api a, Abimelek kiang ah apia a; anih un thu akhungta uhi. 28Abraham in abelamhon lak a belamnou anu sagih akoihtuam hi. 29Abimelek in Abraham kiang ah, “Belamnou anu sagih atuam a na koih bang na chihna ahia?” achi hi.
30Ama'n, “Hiai tuileh keimah leh ahi, chih na hon theihpihna ding in hiai belamnou anu sagih ka khut a kipan na lak ding ahi,” achi hi. 31Huaiziak in huai mun Beer-sheba asa hi; huai a anih ua akichiam ziak un.
32Beer-sheba ah thu akhungta uh. Abimelek athou a, asepaih pawl heutu Philok toh Philistiate gam ah apai nawnta uhi. 33Abraham in Beer-sheba ah meilah sing asuan a, huai ah Toupa, Tangtawn Pathian min alou hi. 34Philistiate gam ah Abraham sawtpi ataam hi.
Currently Selected:
GENESIS 21: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
