GENESIS 22
22
Isak Lan Ding In Pathian In Abraham Thu Apia
1Huai thilte nung in Pathian in Abraham a-enchian hi. Akiang ah, “Abraham,” achi a; ama'n, “Hiai ah ka om,” achi hi.
2Ama'n, “Na tapa, na tapa neihsun, na ittak, Isak tonpih inla, Moriah gam ah pai in, huai ah ka hon hilh ding tang khat ah halmang thillat in amah lan in,” achi hi.
3Beltak in Abraham athou a, sabiltung abawl a, akiang ah atapa Isak toh sikha tangval nih atonpih hi. Haltum thillat a ding in sing a-ek a, athou a, Pathian in ahilhna mun lam ah apaita hi. 4Ani thum ni in Abraham adak a, amun gamlapi a om amu hi. 5Abraham in asikha tangvalte kiang ah, “Hiai ah sabiltung toh ana om un. Kei leh naupang huai pam ah ka va hoh ding ua; huai ah Pathian ka va be ding ua; na kiang uah ka hong kik nawn ding uh,” achi hi.
6Abraham in halmang thillatna ding sing ala a, atapa Isak aposak hi. Ama'n mei leh temta atawi a; anih un apaikhawm uhi. 7Isak in apa Abraham ahoupih a, “Pa,” achi a, ama'n, “Bawi, hiai ah ka om,” achi hi. Ama'n, “En dih, mei leh sing a-om a; hileh leng halmang thillat ding belamnou lah koi ah?” achi hi.
8Abraham in, “Bawi, Pathian in amah a dia halmang thillat ding belamnou angaihtuah tawm ding hi,” achi a; anih un apaikhawm zel uhi.
9Pathian in ahilhna mun ava tungta ua, Abraham in huai ah maitam adoh a, sing chiangkhawm in, atapa Isak ahen a, maitam a sing tung ah alumsak hi. 10Abraham in akhut alik a, atapa thahna ding temta ala hi. 11Toupa angel in van a kipan amah asam a, “Abraham, Abraham,” achi a, ama'n, “Hiai ah ka om,” achi hi.
12Ama'n, “Naupang tung ah na khut kha ke'n. Amah bangmah loh ke'n. Na tapa, na neihsun mahmah leng kei a dia na it louh ziak in Pathian na lau chih tu in ka theita,” achi hi. 13Abraham adak a, a-en a, ngai in, anunglam ah belampa, singbawk a akii awk ana om hi. Abraham in huai belampa ava man a, atapa sik in halmang thillat in alan zawta hi. 14Abraham in huai mun min, “Jehovah Jireh,” asa hi; tuni tan a, “Toupa tang ah ngaihtuah hi na ve,” achih zel bang un.
15 Toupa angel in anihveina ding in van a kipan Abraham asam nawn hi. 16“Hiai thil na hih ziak leh na tapa neihsun na it louh ziak in kei mahmah in ka kichiam hi. 17K'on vualzawl ngeingei ding a, van a aksite zah leh tuipi piau a piaunel zah in na suante ka pungsak ngeingei ding. Na suante'n adoute uh kulh kongkhak atang ding uhi. 18Ka thu na man ziak in na suan ah leitung a nam chih vualzawl in a-om ding uh,” achi hi. 19Asikha tangvalte kiang ah Abraham akik nawn a, athou ua, Beer-sheba lam manoh in apai uhi. Beer-sheba ah Abraham ateng hi.
Nahor Suante
20Hichi in huai thilte nung in Abraham kiang ah, “Ngai in, Milkah in leng na sanggampa Nahor tate aneihsakta ve,” chi in Abraham ahilh uhi. 21Ata masa Huz ahi a; asanggampa Buz ahi, Aram pa Kemuel; 22Chesed, Hazo, Pildash, Jidlaph leh Bethuelte leng ahi uh, 23Bethuel in tanu Rebekah anei a; huai giatte Milkah in Abraham nau Nahor aneihsakte ahi uh. 24Amei, amin Reumah in leng Tebah, Gaham, Thahash leh Maakah anei hi.
Currently Selected:
GENESIS 22: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
