YouVersion Logo
Search Icon

GENESIS 25

25
Abraham Suan Dangte
(1 Kro 1.32,33)
1Huan Abraham in zi dang anei nawn a, amin Keturah ahi. 2Ama'n Zimran, Jokshan, Medan, Midian, Ishbak leh Shuah aneihsak hi. 3Jokshan in tapa Sheba leh Dedan anei a, Dedan tapate Asshurim leh Letushim leh Leummim ahi uh. 4Midian tapate Ephah, Epher, Hanok, Abidah leh Eldaah ahi uh. Huai tengteng Keturah tate ahi uhi.
5Abraham in aneih tengteng Isak apia hi. 6Amei tapate kiang ah Abraham in thilpiakte apia a; amah dam lai ngei in atapa Isak a kipan amaute suahlam gam ah asawlkhia hi.
Abraham Sihna Leh Vuina
7Abraham damsung kum zakhat sawmsagih-le-nga ahi. 8Abraham in akha akhahta a, lu a kelsam pou vek in tekkun a dam in asi a, achipihte kiang a pi in a-omta hi. 9Atapa Isak leh Ishmael in Hit mi Zohar tapa Ephron lou a, Mamre phak ma a Makpelah kokhuk ah avui uhi. 10Huai lou, Abraham in Heth suante a pan aleisa ahi a, huai mun ah azi Sarah kiang ah Abraham vui in a-om hi. 11Huan hichi ahong hi a, Abraham sih nung in, Pathian in atapa Isak avualzawl a; Beer-lahai-roi ah Isak ateng hi.
Ishmael Suante
(1 Kro 1.28-31)
12Hiaite Abraham tapa Ishmael, Sarah sikhanu, Aigupta mi Hagar in Abraham aneihsak suante ahi uh. 13Hiaite amin chiat uleh asuante uh dungzui zel in Ishmael tapate min ahi. Ishmael tapa upapen Nebajoth ahi a, huai ban ah Kedar, Adbeel leh Mibsam, 14Mishma, Dumah leh Massa, 15Hadad, Tema, Jetur, Naphish leh Kedemah ahi uh. 16Huaite Ishmael tapate ahi ua, huaite akhua uh bang leh agiahphual uh dungzui zel a amin uh gelh ahi a, anam uh bang zel in vaihawmmi sawm-le-nih ahi uhi. 17Ishmael damsung kum zakhat sawmthum-le-sagih ahi a; akha khah in asi a, achipihte kiang ah pi in a-omta hi. 18Atapate Havilah gam a kipan Assuria gam lam a Aigupta gam phak ma a Shur tan in ateng ua, a-unau dang teng a kipan atuamten uhi.
Esau Leh Jakob Pianna
19Hiaite Abraham tapa Isak suante ahi ua: Abraham in tapa Isak anei hi. 20Isak in Padan-aram gam a Siria mi Bethuel tanu, Aram mi Laban sanggamnu Rebekah zi a aneih lai in kum sawmli a upa ahi. 21Azi achiin ziak in Isak in Toupa kiang ah azi a ding in nget petmah in angetsak hi. Toupa'n angetna angaihkhiaksak a, azi Rebekah ahong gaita hi. 22Asung a anaupaite akisual ua; ama'n, “Hichibang ahih ngalleh, bangziak in ahia, ka hi chih?” achi a; Toupa dong ding in akuanta hi.
23 Toupa'n akiang ah,
“Na sul ah nam nih a-om ua,
na gilsung a kipan nam nih
akikhen ding uh,
nam khat sang in nam khat ahatzaw ding a,
a-upazaw in anaupangzaw
nna asem ding,” achi hi.
24Anau neih ahun in, ngai in, asul ah phik a-om hi. 25Amasazaw asan a san seksawk, puanmul bang a mul thiapthuap in ahong suakkhia a, amin Esau asa uhi. 26Huai nung in anau hong suakkhe nawn a, akhut in Esau khetul alenkip a; ama min Jakob asa uhi. Rebekah in amaute aneih lai in Isak kum sawmguk a upa ahi.
Esau In Ta Masa Ahihna Azuak
27Naupangte hong khanglian ua; Esau sabetsiam, gamvakmi ahi a; Jakob mimelmawl, puaninte a tengmi ahi. 28Isak in asamatte anek zel ziak in Esau a-it a; Rebekah in bel Jakob a-it hi.
29Jakob in betang ahuan laitak in Esau gamkuan ahong tung a, atawl mahmah hi. 30Esau in Jakob kiang ah, “Hehpih in na betang huan hon nesak in; ka bah mahmah hi,” achi hi. Huaiziak in ahi amin Edom achih uh.
31Jakob in, “Na ta masa hihna hon leisak phot lechin,” achi hi.
32Esau in, “Ngai in, si dek ka hi ngal a; kei a ding in hiai ta masa hihna bang aphatuam dia?” achi hi.
33Jakob in, “Tuni in ka kiang ah kichiam phot in,” achi hi. Akiang ah akichiam a, Jakob kiang ah ata masa hihna akhawng maimah hi. 34Jakob in Esau tanghou leh abetang huan apia a; ama'n ne in adawn a, athou a, apaikheta hi. Huchibang in Esau in ata masa hihna angaineu hi.

Currently Selected:

GENESIS 25: PAITBSI

Highlight

Share

Copy

None

Want to have your highlights saved across all your devices? Sign up or sign in