JOHAN 13

Nungzuite Khe Jesu’n A Sil

1Paikan Ankuanglui kipat ma in, Jesu’n hiai khovel nusia a Pa kiang a a pai hun hongtungta chih a thei a; khovel a a itte, a tawppha in a it hi.

2Huan nitak annek lai in, Diabol in Simon tapa, Judas Iskariot, lungtang a Jesu zuausan a matsak lungsim a koihsak khitnung in, 3Pa’n a khut ah thilbangkim a peta chih leh Pathian a kipan hongpai ahi a, Pathian kiang a pai ding ahi chih Jesu’n theigige in, 4Nitakan umlai ading a, a puante a suahkhia a, kinulna puan a la a, a teng hi. 5Huan kisilna kuang ah tui asung a, nungzuite khe a silta a, kinulna puan a ten in a nul zel hi. 6Huchi in Simon Peter kiang ah a honghi; “Aman Toupa, nang tel in ka khe na sil dia hia?” a chi hi.

7Jesu’n a kiang ah, “Ka thilhih tun ah na theikei; himahleh tunung chiang in na thei ding” a chi a, a dawng hi.

8Peter in a kiang ah, “Ka khe na silkei hial ding” a chi hi. Jesu’n a kiang ah, “Na khe ka sil kei leh ka kiang ah tan na neikei ding” a chi hi.

9Simon Peter in a kiang ah, “Toupa, ka khe kia hilou in, ka khutte leh ka lutang leng aw” a chi hi.

10Jesu’n a kiang ah, “Kisil khinsa a khe loungal sil a kiphamoh kei, a pumpi in a siang; nou na siang uh, na vek un zaw ahi kei” a chi hi. 11A mansakpa dingpa a thei ngal a; huaiziak in, na vek un zaw na siangkei uh, a chi ahi.

12Huchi in a khete uh a silkhit a, a puante a lak a, a tutnawn in a kiang uah, “Na tung ua ka thilhih na thei uhia?” a chi hi. 13“Nou Toupa leh heutupa n’on chi ua; na chidik uhi, ka hihna mah ahi. 14Kei Toupa leh na heutupa un na khe uh ka sil leh nou leng na khe uh na kisilsak ding uh ahi. 15Na tung ua ka hihbang in, nou leng na hihsam ding un, hih ding dan honhilh ka hi. 16Chihtaktak in, chihtaktak in, k’on hilh ahi, sikha a toupa sang in a thupizaw kei a; sawl a om leng a sawlpa sang in a thupizaw sam kei hi. 17Huai thilte na theih ua, na hih uleh mi nuamsa na hi uhi.

18Na vek ua thu ka genkei a; ka telte ka thei; himahleh Ka tanghou nepa’n ka tung ah a khetul a likta chih, Laisiangthou a hongtun theihna ding ahi. 19Tuin a hong tunma in k’on hilh ahi, a hongtun hun chiang a kei amah ka hi chih na gintakna ding un. 20Chihtaktak in, chihtaktak in, k’on hilh ahi, kuapeuh ka sawl kipahpih, kei hon kipahpih ahi; kuapeuh kei hon kipahpih, hon sawlpa kipahpih ahi,” a chi hi.

Jesu’n Matsaka A Om Ding Genkholhna

21Jesu’n huai thu a genkhit in, a lungsim a mangbang a, “Chihtaktak in, chihtaktak in, k’on hilh ahi, Na lak ua mi khat in kei hon mansak ding” chi in a theisakta hi.

22Huan nungzuite’n a chihpen a theikei ua, a ki en tuah chiat uhi. 23A nungzuite lak a khat, Jesu’n a itpa, dohkan sik ah Jesu angsung ah kingai in a om hi. 24Simon Peter in huai mi kiang ah, kua pen thu ahia a gen dong ding in a khutvan hi.

25Jesu awm ngai mah in a awnphei a, a kiang ah, “Toupa, kuapen ahia?” a chi hi.

26Jesu’n, “Tanghou them ka diah a, ka piakpa ahi ding” chi in a dawng hi. Huchi in tanghou them a diah nung in, Iskariot, Simon tapa Judas kiang ah a pia hi. 27Tanghou them a piak nung in Setan asung ah a lutta hi. Huchi in Jesu’n a kiang ah, “Na hih ding hihmeng in” a chi hi. 28Dohkan a omte’n bang tuma hiai thu gen hiam chih a theikei uhi. 29A khen in Judas in dangka ip a vom ziak in, Jesu’n Ankuangluina ading thil kiphamoh peuh lei in, chi hiam, mi gentheite kiang ah banghiam piak ding, chi hiam a sa uhi.

30Huan tanghou them la in, a pawtkhe paha; huai zanlai ahi.

Thupiak Thak

31Huaiziak in a pawtnungin, Jesu’n a gen a, “Tuin Mihing Tapa pahtawi in a omta a, Pathian leng amah ziak in pahtawi in a om hi. 32Amah a Pathian pahtawi a a om leh amah leng Pathian mahmah in a pahtawi ding, a pahtawi pah ding hi. 33Naute aw, hun tomchik na kiang uah ka omlai tadih hi. Nou n’on zawng ding uh; Judate kiang a, ka paina ding ah nou na hongpai theikei ding uh chih ka gen bang in, tuin huchi mah bang in na kiang uah ka gen ahi. 34Thupiak thak konpia ahi, ki-ittuah un; ken nou k’on it bang in, nou leng ki-ittuah un. 35Na ki-ittuah uleh mi tengteng in ka nungzuite na hi uh chih hiai ah a thei ding uh” a chi hi.

Peter Kitheihmohbawl Ding Genkholhna

(Matt. 26.31-35; Mk. 14.27-31; Lk. 22.31-34)

36Simon Peter in a kiang ah, “Toupa, koi a hoh ding na hia? a chi hi. Jesu’n, ka hohna ding ah nang tuin n’on zui theikei ding; tunung chiah zaw n’on zui ding” chi in a dawng hi. 37Peter in a kiang ah, “Toupa, bangding in ahia tua leng k’on zuih theihlouh ding? Nangmah ziak in ka hinna ka koihkhe ding” a chi hi. 38Jesu’n “Keimah ziak in na hinna na koihkhe ding maw? Chihtaktak in, Chihtaktak in, k’on hilh ahi, nang thumvei n’on kitheihmohbawl ma in ak a khuangkei ding” chi in a dawng hi.

Currently Selected:

JOHAN 13: PAITBSI

Highlight

Copy