JOHAN 12

Bethani A Jesu Thaunilhna

(Mat 26.6-13; Mar 14.3-9)

1Huan Paikan Ankuangluina ding ni guk a-om lai a, Jesu'n misi lak a kipan a akaihthoh Lazaras omna khua, Bethani ahong tung hi. 2Huai ah amah a ding in nitak an abawl ua, Martha in nek abawl hi, Lazaras bel a-ankuang umpih khat ahi. 3Mari in spiknardi buk kimkhat thaunamtui manphatak ahon tawi a, Jesu khete anuh a, asam in anul a, huai thaugim in insung adimta hi. 4Himahleh Judas Iskariot, anungzuite lak a khat, amansak ding pa'n, 5“Hiai thaunamtui bangziak a makhai zathum a zuak a migentheite kiang a pe zaw lou uh ahia?” achi hi. 6Migentheite a-awlmoh ziak a hiai thu gen ahi kei; amah guta ahi a, dangka ip akem a, asung a koih a alak zel ziak ahi zaw hi.

7Jesu'n, “Subuai kei un, ka kivui ni a dia asit ahi. 8Na kiang ua migentheite om gige ahi ua, kei bel na kiang ua om gige ding ka hi kei,” achi hi.

Lazaras Thah Sawmna

9Huan huai mun ah Jesu a-om chih Juda mipite'n atheih un; ahong ua, Jesu ziak kia hilou in, misi lak a kipan a akaihthoh, Lazaras mah leng amuh nop ziak uh ahi. 10Huan siampu liante Lazaras leng thah ding in akihou uhi. 11Amah ziak a Judate tampi in langkaisan a, Jesu agintak ziak un.

Jesu Vualzou A Jerusalem Lutna

(Mat 21.1-11; Mar 11.1-11; Luk 19.28-40)

12Azing in, Ankuangluina a hong mipi tampi'n Jerusalem ah Jesu ahong pai ding chih azak un, 13tumnahte atawi ua, dawn ding in apawtkhia ua,

“Hosanna! Toupa min a Israelte Kumpipa hong pai ahampha e!”

chi in akikou uhi.

14Huan Jesu'n sabiltungnou amu a, atung ah atuang hi.

15“Lau ke'n, Zion tanu; en in, na Kumpipa,

sabiltungnou tung a tuang in, ahong pai ding,”

chih gelh ahih bang in.

16Huai thute atung in anungzuite'n atheisiam kei ua; himahleh, Jesu pahtawi ahih nung in, atanchin ah huai thu gelh ahi chih leh amah tung ah huai thilte akihih ngei chih atheita uhi.

17Huan han a kipan asapkhiakpa Lazaras, misi lak a kipan akaihthoh lai a akiang a mipi omte'n, athu atheihpih uhi. 18Huaiziak in ahi, mipite'n leng amah ava dawn uh; huai thillamdang ahih chih atheih ziak un. 19Huchi in Pharisaite'n, “Thei un, bangmah na hihtheih louh uh, en un, khovel in amah azuita,” akichi uhi.

Grikte Ngetna

20Huan ankuangluina a Pathian be ding a hohtoute lak ah Grik kuate hiam a-om uhi. 21Huaite Galili gam a Bethsaida a mi Philip kiang ah ahong ua, akiang ah, “Pu, Jesu ka mu nuam uh,” achi ua, angen uhi.

22Philip in Andru ahong hilh a, Andru leh Philip in Jesu ahong hilh uhi. 23Jesu'n adawng a, akiang uah, “Mihing Tapa pahtawi a a-omna ding hun atungta hi. 24Chihtaktak in, chihtaktak in ka hon hilh ahi, lei a buhtang akiak a, asih phot keileh amah kia in a-om tawntung; asih in bel, tampi in agah hi. 25Kuapeuh ahinna it in amangsak ding a; kuapeuh hiai khovel a ahinna ngaineu in tangtawn hinna ah akem ding hi. 26Kuapeuh in ka nna asepleh hon zui hen; ka omna ah ka sikha leng a-om ding hi; kuapeuh in ka nna asepleh Pa'n amah apahtawi ding hi.

Jesu Sih Ding Genkholhna

27“Tu in ka kha amangbang mahmah; bang ka genta dia? ‘Pa, hiai hun a pan hon hondam in, ka chi dia hia?’ Himahleh hiai ding ziak mah a hiai hun a hong pai lah ka ngal a. 28Pa na min pahtawi in,” achi hi. Huchi in van a kipan in aw ahong suak a, “Ka pahtawita, ka pahtawi nawn lai ding,” achi hi.

29Mipi akiang a dinghte'n huai aza ua, “Vanpiging ahi,” achi ua; midangte'n, “Angel in amah houpih ahi,” achi uhi.

30Jesu'n adawng a, “Huai aw kei a dia hong suak ahi kei, noumau a ding ahi zaw,” achi hi. 31“Tu hiai khovel thukhensakna hun ahi; tu hiai khovel lal paihkhiak hun ahi. 32Huan lei a kipan a khaikang a ka omleh, mi tengteng keimah kiang ah ka hip ding,” achi hi. 33Huai thu asihdan ding theihsakna dia agen ahi.

34Huan mipi'n akiang ah, “Khrist tangtawn in a-om chih Dan Bu ah ka thei uh, nang Mihing Tapa khaikang a om ding ka hi, bangchi chih a chi na hia? Huai Mihing Tapa kua ahia?” achi ua, adong uhi.

35Huan Jesu'n akiang uah, “Na lak uah sawt lou sung vak a-om tadih hi. Huai vak na neih sung un vak ah khosa un, huchi lou in zaw mial in ahon lap ding hi. Kuapeuh mial a khosa in apaina athei kei hi. 36Vak na neih sung un vak gingta un, vak tate na hong hihtheihna ding un,” achi hi. Huai thute Jesu'n agen a; huan apai a, amuh louh ding un akiselta hi.

Judate Leh Ginglou Mipite

37Ama uah huchi tel a tam thillamdang hih mahleh, amah agingta tuan kei uh. 38“Toupa, ka thugen uh kua'n ahia gingta? Toupa khut leng kua kiang ah ahia latsak a a-om?” chi a zawlnei Isai thugen atangtunna ding in.

39Hiai ziak in ahi a gintak theih louh uh, Isai in,

40“Ama'n amit uh ahihtaw a, alungtang uh ahihkhauh;

huchi lou in zaw amit un amu kha ding ua,

alungtang un athei kha ding uh,

huan hong kihei nawn ding ua,

ke'n amau ka hihdam kha ding,” chih

agen nawn ziak in.

41Hiai thilte Isai in athupina amuh a atanchin agen ahi.

42Himahleh, heutute lak nangawn ah tampi in Jesu agingta uhi; himahleh Pharisaite ziak in akipulak nuam kei uh, huchi lou in zaw sinagog a kipan ahawlkhe kha ding uhi; 43Pathian pahtakna sang a mihing pahtakna adeih zawk ziak un.

Jesu'n Vantang A Thuhilhna

44Huan Jesu akikou a, “Kuapeuh hon gingta, kei hon gingta ahi kei a, hon sawlpa gingta ahi zaw hi. 45Kuapeuh kei hon mu hon sawlpa mu ahi. 46Khovel a vak hong pai pen ka hi, kuapeuh kei hon gingta mial a a-omlouhna ding in. 47Kuapeuh ka thugen za in, gingta kei mahleh, ke'n siam louh ka tangsak kei; khovel siam louh tangsak ding a hong pai ka hi kei a, khovel humbit ding a hong pai ka hi zaw hi. 48Kuapeuh kei hon deih lou a, ka thugente pom lou in, siam louh tangsak khat anei hi, ka thugen huai thu mahmah in, nitawp ni chiang in amah siam louh atangsak ding hi. 49Keimah phuahtawm in thu ka gen kei a; Pa hon sawlpa'n ka thugen ding leh ka hih ding thu ahon pe zaw hi. 50Amah thupiak tangtawn hinna ahi chih ka thei; huaiziak in ka thugen, Pa hon hilh bang zel in ka gen ahi,” achi hi.

Currently Selected:

JOHAN 12: PAITBSI

Highlight

Copy