JOHAN 11

Lazar Sihna

1Huan mi khat, Mari leh a sanggam Martha omna khua Bethani mi, Lazar, damlou in om hi. 2Mari, thaunamtui Toupa nilh a a sam a a khe nulnu sanggampa Lazar damlou in a om hi. 3A sanggamnute’n Jesu kiang ah, “Ngai dih Toupa, na it a china hi” chi in, mi a sawl uhi.

4Jesu’n huai a zak in, “Hiai natna sihna ding zen ahi kei, Pathian thupina ding ahizaw hi. Pathian Tapa hiai ziak a hihthupi a hih theihna ding ahi” a chi hi.

5Martha, a sanggamnu, Mari leh Lazar te Jesu’n a it hi. 6Huaiziak in a china chih a zak in, a omna ngei ah ni nih a tamlai hi. 7Huaikhit in a nungzuite kiang ah, “Judia gam ah i hohnawn ding uh” a chi hi.

8Huan nungzuite’n a kiang ah, “Rabbi, tuma zek in Judate’n suang a honden a tum ua; huchipi in huai ah na hohnawn dia hia?” a chi ua.

9Jesu’n, “Sun in dakkal sawmlehnih a om ka hia? Mi sun a a vak leh a kisui ngeikei a, hiai khovel vak a muh ziak in. 10Himahleh mi zan a a vak leh a kisui hi; amah a vak a omlouh ziak in” chi in a dawng hi. 11Huai thute a genkhit in a kiang uah, “I lawmpa Lazar a ihmuta; a ihmu phawnghalh ding in ka hawh ding ahi” a chi hi.

12Huchi in a nungzuite’n a kiang ah, “Toupa, a ihmut takleh a khanglou nawn na ke” a chi uhi.

13Jesu’n a sih thu gen ahi a; himahleh amau ihmu a khawl thugen hiam a sa uhi. 14Huchi in Jesu’n chiantak in a kiang uah “Lazar si ahi a chi hi. 15Huai a ka omlouh nou ziak in ka kipak hi, na gintak theihna ding un; himahleh a kiang ah i hawh ding uh” a chi hi.

16Thomas, Didum a chih un, a nungzuihpihte kiang ah, “A sihna a i sihsamna ding in i hawh ding uh” a chi hi.

Jesu Thohnawnna leh Hinna

17Huchi in Jesu a tun in ni li han ah a omta chih a thei hi. 18Bethani khua Jerusalem kiang a om ahi a, ching sawmlehnga phial a gamla ahi; 19Huchi in a sanggampa uh sihna tung a khamuan ding in Judate tampi Martha leh Mari kiang ah a hoh uhi.

20Jesu a hong dek chih Martha in a zakphet in a vadawn a; Mari bel inn sung ah a tu lailai hi. 21Martha in Jesu kiang ah, “Toupa, hiai a om hile chin, ka sanggampa si lou ding hi a. 22Tun ah leng Pathian kiang a na nget peuhmah Pathian in nang honpe ding chih ka thei” a chi hi.

23Jesu’n a kiang ah, “Na sanggampa a thounawn ding” a chi hi.

24Martha in a kiang ah, “Nitawpni chiah, thohnawnna ah, a thounawn ding chih ka thei” a chi hi.

25Jesu’n a kiang ah, “Kei thohnawnna leh hinna ka hi; kuapeuh hon gingta si mahleh a hing gige ding; 26A hing peuhmah a, a hon gingta peuhmah tangtawn in a sikei ding; huai thu na gingta hia?” a chi hi.

27Aman a kiang ah, Gingta e, Toupa, Khrist, Pathian Tapa, khovel a hongpai dingpa na hi chih ka gingta hi” a chi hi.

Jesu Leh Sihna

28Huan huai thu a genkhit in a kuan a, a sanggamnu Mari a sim sap a, “Sinsakpa hiai ah a om a, nang a hon samsak” a chi hi. 29Aman huai a zaktak in, a dingkhe paha, a kiang ah a vahoh hi. 30Jesu khua ah a lut naikei a, Martha in a vadawn lai a a omna ngei ah a omlai hi. 31Huan insung a amah khamuana ompih Judate’n Mari dingkhe paha pawt a muhtak un, han ah kap ding a hohdek hi’n teh chi in, a zui uhi.

32Huan Mari Jesu omna a vatunga amah a muhtak in a khebul ah a khupboh in, a kiang ah, “Toupa, hiai a om hile chin ka sanggampa silou ding hi a” a chi hi.

33Huan Jesu’n Mari kap leh a honzui Judate kap a mu a, a lung a khoih mahmah a, kha in amau hi. 34Huan aman “Amah kaw sial na hi ua?” a chi hi. Amau a kiang ah, “Toupa hongpai inla, en in” a chi uhi.

35Jesu a kapta. 36Judate’n, “En dih uh, Lazar it na tel e” a chi uhi.

37Himahleh khenkhat in, “Hiai mi, mittaw mit hihvakpa’n, hiai mi leng a silou sakthei kei a eita?” a chi uhi.

Lazar Kaihthohna

38Huan Jesu nakpi’n a mau nawn a, han a tung hi. Huai han kawkhuk, suang a sit ahi. 39Jesu’n, “Suang hemkhia un” a chi hi. A sipa sanggamnu Martha in a kiang ah, “Toupa, tun zaw a namta ding, a sihna ni li ahita” a chi hi.

40Jesu’n a kiang ah, na gintak leh Pathian thupina na mu ding, k’on chi ka hia? a chi hi. Huchi in, suang a hemkhia uhi. 41Huchi in Jesu a vandak a, “Pa ka thu na ngaihkhiak ziak in na tung ah ka kipak hi. 42Ka thu na ngaikhe zel chih ka thei a; himahleh, mipi dingte ziak in hiai ka chi ahi, nang n’on sawl chih a gintak theihna ding un” a chi hi. 43Huan huchi a a paukhit in aw ngaihtak in, “Lazar, hongpawt in” chi in a kikou hi. 44Huan, misi a khut a khe, han puan a tuamsa in a hong pawtta a, a mai leng kinulna puan a tuam ahi. Jesu’n a kiang uah, “Phel unla, paisak un” a chi hi.

Jesu Thah Sawmna

(Matt. 6.1-5; Mk. 14.1-2; Lk. 22.1-2)

45Huchi in Mari kiang a hongpai Jesu thilhih mu, Judate a khen tampi in Jesu a gingta uhi. 46Himahleh, a khen Pharisaite kiang ah a vahoh ua, a kiang uah Jesu thilhihte a vahilh uhi. 47Huchi in siampu liante leh Pharisaite’n vaihawmte a samkhawm ua, “Bangchi’n i hih ding ua? Hiai min thillamdang tampi a hih ngal a, a chi uhi. 48Hichibang a i khahzan unzaw mi tengteng in amah a gingta ding ua; Rome mite a hongpai ding ua, i mun leh i namte a hon laksak ding uh” a chi uhi.

49Huan a lak ua mi khat Kaiapha, huai kum a siampu lianpen in a kiang uah, “Nou bangmah theikei uteh, 50I nam pumpi manthat louhna ding in mi tengteng sik a mi khat sih, nou adin a hoih chih leng na ngaihtuah kei uh” a chi hi. 51Huai thu amah phuahtawm in a genkei, huai kum in siampu lianpen ahi a, a namte sik a Jesu a sih ding a genkhol ahizaw hi. 52Huai namte sik kia ahi kei a, Pathian ta khovel a dalhte tengteng a pikhawmna ding in leng ahi sam hi.

53Huchi in huai ni a kipan amah that ding in a kihou zel uhi. 54Huaiziak in Jesu Judate lak ah a langtang in a vaknawnta kei a, huai a kipan gamdai zullam a khaw khat Ephraim a chih uah a vahohta hi; huai ah nungzuite toh a om nilouh ta uhi.

55Huan Judate Paikan Ankuangluina a naita a, mi tampi kisiangsak ding in, gam apat, Paikan Ankuanglui ma in, Jerusalem khua ah a hohtou uhi. 56Huchi in Jesu a zong ua Pathian biakin ah ding kawm in a kihou ua, Bang ahia na ngaihtuah uh? Ankuangluina ah a hong kei ding maw? a kichi uhi. 57Siampu liante leh Pharisaite’n amah a mat theihna ding un kuapeuh in a omna a theih uleh amaute theihsak ding thu a peta uhi.

Currently Selected:

JOHAN 11: PAITBSI

Highlight

Copy