JOHAN 15

Jesu, Grepgui Dik

1“Kei grepgui dik ka hi, ka Pa a kempa ahi. 2Kei a hiang gahlou peuhmah a lamang a; a gah peuhmah a gah tamsemna ding in a hahsiang hi. 3Na kiang ua ka thugen tawn in tun ah na siangthou pah uhi. 4Keimah ah om gige un, keileng noumau ah ka om gige ding. Hiang, grepgui a a om gige kei leh amah in a gah theikei bang in, nou leng keimah a na om gige kei uleh, na gah theikei ding uhi.

5“Kei a grepgui ka hi a, nou a hiangte na hi uh. Kuapeuh keimah a om gige a, keileng amah a ka om gige na, huai mah tampi in a gah hi; keimah lou in bangmah na hih theikei uhi. 6Mi kei a a om gige kei leh, hiang bang a paihkhiak in a om a, a vuai hi; huan a tawm ua mei ah a pai ua, a kang hi. 7Nou keimah a na om gige ua, ka thu leng noumau a a om gige leh na ut peuh uh ngen un, nou adia hih in a om ding hi. 8Hiaiziakin tampi a na gah chiang un ka Pa pahtawi in a om hi, huchi in ka nungzuite na hi ding uhi. 9Pa’n kei hon it bangmah in k’on it hi; ka itna ah om gige un. 10Nou ka thupiakte na zuih uleh ka itna ah na om gige ding uhi, ken ka Pa thupiakte ka zui a, a itna a ka om gige mah bang in.

11“Ka kipah noumau a a om gige theihna din leh na kipah uh a kimna ding in hiai thu na kiang uah ka gen ahi. 12Hiai ka thupiak ahi, ken nou k’on it bang in, noumau leng ki-ittuah un. 13Mihing in a lawm adia a hinna a piak sang a itna thupizaw kuama’n a neikei hi. 14Thu k’on piak peuhmah na hih uleh ka lawmte na hi ding uhi. 15Sikha k’on chi nawn kei dia; a toupa thilhih sikha in a theihlouh ziak in; lawmte k’on chi zawta ding; Pa kiang a ka thilzak tengteng na kiang uah k’on theisakta hi. 16Nou n’on tel kei ua, ken k’on tel zaw hi, vagah ding leh na gah uh om gige ding in k’on sep hi; ka min a Pa kiang a na nget peuhmah uh a hon piakna ding in. 17Hiaite k’on thupiak ahi, ki-ittuah chiat un.

Khovel Leh Thutak Kha

18“Khovel in nou a honhuat leh nou a honhuat ma in keimah a hon haw khinta chih thei un. 19Nou khovel a hi le uchin, khovel in amah a a it ding; khovel a kipan k’on telkhiak zawk ziak in, khovel in nou a hon hua hi. 20Sikha a toupa sang in a thupizaw kei, chih thu k’on hilhta hi, theigige un. Amau kei a honsawi uleh, nou leng a honsawi ding uh; ka thu zui hita le uh, noumau thu leng a zui ding uhi. 21Himahleh hiai thil tengteng ka min ziak in na tung uah a hih ding uh, hon sawlpa a theihlouh ziak un. 22Kei hong pailou in a kiang uah thu gen keileng khelhna neilou ding hi ua, himahleh tuin a khelhna uah paulap ding a neita kei uhi. 23Kuapeuh kei honhua in, ka Pa leng a hua ahi. 24Midang kuamah hih ngeilouhte a lak ua hihlou hita leng, khelhna neilou ding hi ua, himahleh tuin amau kei leh ka Pa ka nih un hon muta uh, huat leng hon hawta uhi. 25A dan uah, amau a ziak omlou in hon hua uh chih, thu gelhpen, a hongtunna ding ua hih uh eive.

26“Huan Pa a kipan Khamuanpa na kiang ua k’on sawl ding, Pa a kipan thutak Kha a hongtun chiang in, keimah hon theihpih ding hi; 27A tung a kipan a kei toh omkhawm na hih ziak un nou leng na theihpih ding uhi.

Currently Selected:

JOHAN 15: PAITBSI

Highlight

Copy