JOHAN 16

1“Lungkia a na paimang louhna ding un na kiang uah hiai thute ka genta hi. 2Kikhopnainte ah a hon nongsak ding ua; kuapeuh nou honthat Pathian tung a thil hoih hih in a kithei ding ua huai bang hun hongtung ding ahi. 3Huai thilte a hih ding ua, Pa leh kei hon theihlouh ziak un. 4Hiai thute na kiang uah ka genta hi, a hun a hongtun chiang a, k’on hilhkhinta chih na theihnawnna ding un. Hiai thilte na kiang ua ka om takdih ziak in a tung a k’on hilhlouh him na hi uhi.

Kha Siangthou Nasep

5“Tuin hon sawlpa kiang ah ka pai ding a noute kuamah in, koi a hoh ding? chi in, n’on dong kei uhi. 6Hiai thute na kiang ua ka gen ziak in na lungtang uh lungkhamna in a dimzou hialta hi. 7Himahleh thutak k’on hilh ahi; ka pai nou ding in a hoihzaw hi; ka paikei leh Khamuanpa na kiang uah a hong tungkei ding a; ka pai leh bel na kiang ua honsawl ding ka hi. 8Amah a hongtun chiang in, khelhna, diktatna, leh vaihawmna thu ah khovel a siamlouh dan a theisak ding hi; 9Khelhna thu ah siamlouh ahi ding uh, kei hon gintak louh ziak un. 10Diktatna thu ah siamlouh a tang ding uh; Pa kiang a ka pai ding a, nou kei n’on muhnawn taklouh ding ziak un. 11Vaihawmna thu ah siamlouh ahi ding uh, hiai khovel lal siamlouh a a puktak ziak in.

12“Na kiang ua thugen ding tampi ka neilai a, himahleh tuin zaw na chin tadih kei uhi. 13Himahleh amah Thutak Kha a hongtun chiang in, thutak tengteng ah nou a honpi ding; amah phuahtawm in thu a genkei dia; a zak peuhmah a genzaw ding, thil hongtung dingte leng nou a hon theisak ding hi. 14Aman kei a hon pahtawi ding a; kei a a la ding a, nou kiang ah a hon theisak ding hi. 15Pa’n thil a neih tengteng kei a ahi; huaiziak in kei a a la ding a, na kiang uah a hon theisak ding, ka chi hi.

Mangpha Khakna Thute

16“Sawtlouchik in nou kei n’on mu kei ding ua; sawtlouchik mah in nou kei n’on munawn ding uh, a chi hi.

17“A nungzuite khenkhat in, i kiang ua a thugen bang ahi, sawtlouchik in nou kei n’on mu kei ding uh, sawtlouchik mah in n’on munawn ding uh a chih leh, Pa kiang a ka hohdek ziak in, a chih? a kichi uhi. 18Amau mah in, sawtlouchik, a chih bang chihna ahia? A thugen i theisiam kei uh, a chi uhi.

19“Huan amah dot ut a nei uh chih Jesu’n a thei a, a kiang uah, sawtlou chik in nou kei n’on mu kei ding uh, sawtlou chik mah in nou kei n’on mu nawn ding uh chi a ka thugen na kidong umaw? 20Chihtaktak in, chihtaktak in, k’on hilh ahi, na khitui uh a ke ding a, na kap huphup ding uh, khovel bel a kipak ding; na lungkham ding ua, himahleh na lungkham uh kipahna a suak ding hi. 21Numei nau nei ding in a veilai in a lungkham nak hi, a hun a tuntak ziak in; himahleh nau a suahtakin a lunggimna a thei nawnta kei hi, khovel a naungek mel hongpian a a kipah ziak in. 22Tuin nou na lungkham uh; himahleh k’on munawn ding a, na lungtang uh a kipak ding, na kipahna uh kuamah in hon laksak kei ding hi. 23Huai ni chiang in nou kei bangmah n’on ngen kei ding uh. Chihtaktak in, chihtaktak in, k’on hilh ahi, Pa kiang a bangpeuh ka min a na nget uleh a honpe ding hi. 24Tu tan in ka min in bangmah na ngen nai kei uh. Ngen un, huchi in na mu ding uh, na kipah uh a kimna ding in.

Khovel Tung a Vualzohna

25“Huai thute a hem in na kiang uah ka genta hi; a hun a tung dekta, huai hun chiang in na kiang uah a hem in thu ka gen nawn kei ding a, chiantak in Pa tanchin k’on hilh ding hi. 26Huai ni chiang in keimah min in thil na ngen ding uhi; Pa kiang ah ken k’on ngetsak ding ka chikei hi. 27Pa in amah ngei in nou a hon it ngal a, nou kei n’on it ua, Pa a kipan ka hi chih n’on gintak ziak un. 28Kei Pa kiang a kipan hongpawt a, khovel a hongpai ka hi a; khovel paisan a, Pa kiang a pai nawn ding ka hi, a chi hi.

29Huan a nungzuite’n a kiang ah, “Ngai dih tuin teltak in a genta, a hem in na gen ta kei hi a chi uhi. 30Nang bangkim na thei a, kuamah hondot na kiphamoh kei chih tuin ka theita uhi; hiai ziak in Pathian kiang a kipan hongpai na hi chih ka gingta uhi, a chi uhi. 31Jesu’n a dawng a a kiang uah, tuin na gingta u maw?

32“Ngai un, a hun hong tungding ahi, tuin leng a tungta hi, huai hun chiang in noumau in chiat ah na dalh vek ding ua, keimah kia n’on nuse ding uh. Himahleh Pa ka kiang a om ziak in keimah kia in ka omkei hi. 33Hiai thute na kiang uah ka genta hi, keimah a na khamuanna ding un. Khovel ah gimthuakna na neiding uh, himahleh khamuangtak in om un, ken khovel ka zouta, a chi hi.

Currently Selected:

JOHAN 16: PAITBSI

Highlight

Copy