JOHAN 18
18
Jesu Matna
(Mat 26.47-56; Mar 14.43-50; Luk 22.47-53)
1Jesu'n huai thute agen khit in anungzuite toh apawt ua, Kidron luita akan ua, huai ah huan khat a-om hi. Huai ah amah leh anungzuite alut uhi. 2Huan amansak dingpa Judas in leng huai mun athei a; huai ah anungzuite toh Jesu ava tawlnga zelzel uhi. 3Huchi in Judas in sepaih pawl, siampu liante leh Pharisaite kiang a om heutute api a, khawnvakte, meiselte, galvante tawi in huai ah ahong pai uhi. 4Jesu'n atung a thil tung ding tengteng atheigige a, ava pawt a, akiang uah, “Kua ahia na zon uh?” achi hi.
5Amau akiang ah, “Nazaret Jesu,” chi in adawng uhi. Jesu'n akiang uah, “Keimah ka hi,” achi hi. 6Amansakpa Judas leng alak uah adingh a, “Keimah ka hi,” achihtak in, anungtolh ua, lei ah apuk duam uhi. 7Huan ama'n akiang uah, “Kua ahia na zon uh?” chi in adong nawn hi. Amau, “Nazaret Jesu,” achi uhi.
8Huan Jesu'n, “Keimah ka hi chih ka hon hilhta a; nou kei hon zong na hih uleh hiaite hoihtak in khah un,” achi a adawng hi. 9“Nang kei na hon piakte khat leng ka mangsak kei,” chi a athugen atangtunna ding ahi.
10Huan Simon Peter in anamsau vom adokkhia a siampu lianpen sikha asat a, abil taklam asatkhiaksak hi. Huai sikha min Malkas ahi. 11Huchi in Peter kiang ah Jesu'n, “Na namsau apai ah siat in; Pa in nou ahon piak ka dawn kei dia hia?” achi hi. 12Huchi in sepaih pawl leh Judate heutute'n Jesu aman ua, ahenta uhi.
Jesu Siampu Lian Ma Ah
13Annas kiang ah api masa uh, amah Kaiapha sunghpa ahih ziak in. Kaiapha, huai kum a siampu lianpen ahi. 14Kaiapha bel, mi tengteng sang a mi khat sih ahoihzaw chi a, Judate hanthawnpa ahi.
Peter In Jesu Akitheihmohbawl
(Mat 26.69-70; Mar 14.66-68; Luk 22.55-57)
15Huan Simon Peter in nungzui dang khat toh Jesu azui hi. Huai nungzuipa siampu lianpen meltheih ahi a, siampu lianpen huangsung intual ah, Jesu kiang ah alut sam hi. 16Himahleh polam a kongkhak bul ah Peter adingh hi. Huchi in nungzui dang siampu lianpen meltheih khat ava pawt a, kongkhak ngaknu ahoupih a, Peter apilut hi. 17Kongkhak ngak, nungak in Peter kiang ah, “Nang leng hiai mi nungzuite lak a pang sam na hi hia?” achi hi.
18Ama'n, “Ka hi kei,” achi hi. Sikhate leh heutute huai ah adingh uhi. Avot ziak in meihol in mei atoh ua, meilum a-awi uhi. Peter leng akiang uah a-om a, dingh kawm in meilum a-awi sam hi.
Siampu Lianpen In Jesu Thu Dong
(Mat 26.59-66; Mar 14.55-64; Luk 22.66-71)
19Siampu lianpen in Jesu anungzuite tanchin leh athusinsak adong hi. 20Jesu'n adawng a, akiang ah, “Khovel kiang ah vantang theih in, thu ka gen gige hi; sinagog, tempul leh Judate omkhawmnate ah thu ka hilh zel a, asim in bangmah ka gen kei. 21Bang achia kei hon dong? Akiang ua ka thugen ka thuzate dong in, ngai in, amaute'n ka thugen athei uh akei hiam,” achi hi.
22Huan agentak in akiang a dingh heutu khat in Jesu abeng a, “Siampu lianpen hichibang in na dawng maw?” achi hi.
23Jesu'n akiang ah, “Thudiklou gen ka hihleh, adiklouhna hon theisak in; himahleh, ka thugen dik ahihleh bang achia hon beng?” achi hi.
24Huan Annas in hensa in siampu lianpen Kaiapha kiang ah asawl hi.
Peter In Jesu Akitheihmohbawl Nawn
(Mat 26.71-75; Mar 14.69-72; Luk 22.58-62)
25Simon Peter in dingh kawm in meilum a-awi hi. “Nang leng anungzuite lak a pang sam na hi hia?” achi uhi. Ama'n, “Ka hi kei,” chi in akitheihmohbawl hi.
26Huan siampu lianpen sikha khat Peter in abil satkhiaksakpa sanggampa'n, akiang ah, “Huan ah ka hon mu kei maw?” achi hi.
27Huchi in Peter in akitheihmohbawl nawn a; huan ak akhuang pah hi.
Pilat Ma ah Jesu
(Mat 27.1-2,11-14; Mar 15.1-5; Luk 23.1-5)
28Kaiapha inn a pan in Vaihawmna inn ah Jesu api nawn ua; huai zingsang ahi a; amau ahihleh Vaihawmna inn ah alut kei uh, alut un zaw buah in, Paikan Ankuanglui ane thei kei ding uhi. 29Amaute kiang ah Pilat ava pawt a, “Hiai mi tung ah hekna bang ahia na neih uh?” achi hi.
30Amau akiang ah, “Hiai migilou hi keileh na kiang ah ka hon pi kei ding uh,” chi in adawng uhi.
31Huan Pilat in akiang uah, “Nou pi unla, na dan bang un vai hawmsak un,” achi hi. Judate'n akiang ah, “Kou thu in kuamah hihlup dan bang ahi kei,” achi uhi. 32Hiai thu asihdan ding, Jesu'n agen bang a atangtunna ding ahi.
33Huchi in insung ah Pilat alut nawn a, Jesu asam a, akiang ah, “Judate' Kumpipa na hi hia?” achi hi.
34Jesu'n, “Hiai ka tungtang thu nangmah lungsim puakkhiak a na gen hia, midang in hon hilh?” chi in adawng hi.
35Pilat in, “Kei Juda mi ka hi a hia? Nangmah chipihte leh siampu liante'n ka kiang ah ahon pekhia ua ahi; thil bang ahia na hih?” chi in adawng hi.
36Jesu'n, “Ka kumpi hihna hiai khovel ahi kei; ka kumpi hihna hiai khovel a hileh Judate kiang a piak a ka omlouhna ding in, ka sikhate'n adou ding uh. Himahleh ka kumpi hihna zaw hiai khovel a kipan ahi kei,” chi in adawng hi.
37Pilat in akiang ah, “Huchi, nang kumpipa na hi mawleh?” achi hi. Jesu'n, “Kumpipa ka hi na hon chi mah ve. Thutak theihsak ka piansan leh khovel a ka hong paisan ahi. Kuapeuh thutak a om peuhmah in ka thu asang uh,” achi hi.
38Pilat in akiang ah, “Thutak bang ahia?” achi hi. Huan huai thu agen khit in, Judate kiang ah ava pawt nawn a, akiang uah, “Bangmah agitlouhna ka mu kei,” achi hi.
Jesu Si Ding A Thutanna
(Mat 27.15-31; Mar 15.6-20; Luk 23.13-25)
39Himahleh Paikan Ankuangluina ah mi khat ka hon pawtsakna ding dan na nei uh; huchi in “Judate' Kumpipa hon pawtsak leng na ut uhia?” achi hi.
40Amau akikou nawn ua, “Hiai mi hi kei henla, Barabbas pen hi zaw hen,” achi uhi. Barabbas tuh suamhat ahi.
Currently Selected:
JOHAN 18: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
