JOHAN 19

1Huchi in Pilat in Jesu a pi a, a zep hi. 2Huan sepaihte’n linglukhu a phan ua, a khusak ua, puan sandup leng a silh sak uhi. 3A kiang ah a hongpai ua, “Chibai, Judate Kumpipa”; a chi ua, a beng uhi.

4Huan Pilat a pawt nawn a, a kiang uah, “En un, bangmah a gitlouhna ka mu kei chih na theihna ding un, na kiang uah k’on pikhia hi,” a chi hi. 5Jesu linglukhu khu in leh puan sandup silh in a hongpawt hi. Pilat in a kiang uah, “En un, Mihing!” a chi hi.

6Huan siampu liante leh heutute’n amah a muhtak un a kikou ua, “Kros ah kilhlum in, Kros ah kilhlum in” a chi uhi. Pilat in a kiang uah, “Noumau paipih unla, Kros ah kilhlum un; ken zaw bangmah a gitlouhna ka mu ngalkei hi” a chi hi.

7Judate’n a kiang ah, “Ka dan uh khat a om, huai dan bangzel in Pathian Tapa a a kibawl ziak in a si ding ahi” a chi ua, a dawng uhi.

8Pilat in huai thu a zak in a launawn semsem hi; 9Amah Inpi sung ah valut nawn in Jesu kiang ah, “Koi a hong kipan na hia?” a chi hi. 10Himahleh Jesu’n a dawngkei hi. Pilat in a kiang ah, “Nang kei hon houpih lou ding maw? Honkhah thei leh Kros a hon kilhlum thei ka hi chih na theikei ahia?” a chi hi.

11Jesu’n, “Tunglam a kipan piak hi kei lechin, ka tung ah hihtheih na neikei ding. Huaiziak in na kiang a hon pekhepa’n khelhna lianzaw a pua hi” a chi hi.

12Huai nungsiah Pilat in khah a tuma; himahleh Judate a kikou ua, “Hiai mi na khah leh Kaisar lawm na hi kei; kuapeuh kumpipa a kibawl Kaisar dou ahi” a chi uhi.

13Pilat in huai thu a zak in Jesu a pikhia a, a min Suanglep, Hebru pau a Gabbatha a chih uh, huai mun ah thukhenna tutphah ah a tu hi. 14Huan huai ni Paikan Ankuangluina kiginni ahi a, dak gukna ding ahi. Huan aman Judate kiang ah, “En un, na Kumpipa uh” a chi hi.

15Huan amau a kikou ua, “Hih mangthang in, hih mangthang in, Kros ah kilhlum in” a chi uhi. Pilat in a kiang uah, Na kumpipa uh Kros ah ka kilhlum ding maw? a chi hi. siampu liante’n, “Kaisar loungal kumpipa dang ka neikei uh” a chi ua, a dawng uhi.

Jesu Kilhdenna

(Matt. 27.32-44; Mk. 15.21-32; Lk. 23.44-49)

16Huchi in Pilat in Kros a kilhlup ding in amah a kiang uah a peta hi. Huchi in Jesu a pi ua, a paikhiak pih uhi. 17Aman Kros kipuak in Luguh Mun, a chih uh, Hebru pau a Golgotha a chih mun tan a pai hi. 18Huai ah Kros ah a lai ah Jesu midang nih a sik ah khat tuaktuak toh a kilhden uhi. 19Pilat in lai a gelh a, Kros ah a tak a, “NAZARET JESU JUDATE KUMPIPA” chi in a gelh hi. 20Huai laigelh Judate tampi in a sim ua; Jesu Kros a kilhlupna mun uh khopi kiang ahi a; Hebru pau, Grik pau leh Latin pau a gelh ahi. 21Huchi in Judate siampu liante’n Pilat kiang ah, “Judate Kumpipa, chi in gelh ken; Judate Kumpipa ka hi” a chi, chi in, gelh zaw in, a chi uhi.

22Pilat in “Ka gelhkhit, gelhkhit ahita ” a chi a, a dawng hi.

23Huan sepaihte’n Kros a Jesu a kilhlup khit un a puansilh phel li a suah ua, phel khatchiat in a tang uhi; a puanak leng a la uh. Puanak khui louh puanak ahi a a ngawng a kipan a pum a gatthoh ahi; 24Huaiziak in amau, “I botkek kei dia, kua tanding ahi hiam ai i san ding uh” a kichi uhi. Laisiangthou a, “Ka puansilhte a kihawm ua, ka puanak ding in ai a san uh” chih a tunna ding in hiai thil sepaihte’n a hih uhi.

25Huan Jesu Kros kiang ah a nu leh a nu sanggam, Mari Kleopa zi leh Mari Magdalin ading uhi. 26Huan Jesu’n a nu leh nungzui a itpa a kiang a ding a mu a, a nu kiang ah, “Numei, en in, na tapa” a chi hi.

27Nungzuipa kiang ah, “En in, na nu” a chi hi. Huai dak apan huai nungzui in a in ah amah pita hi.

Jesu Sihna

(Matt. 27.45-56; Mk. 15.33-41; Lk. 23.44-49)

28Huai nung in, Jesu’n thil bangkim hihzoh ahita chih a thei a, Laisiangthou a tunna ding in, “Ka dang a tak” a chi hi.

29Huai ah bel khat uain thuk a dim a tung ua, huchi in spanji khat uain thuk a diahdim in, hussop chiang dawn a tak in, a muk ah a tulhtou uhi. 30Huan Jesu’n uain thuk a dawn khitin, “Zoh ahita” a chi hi. A lu a kun a, a kha a khahta hi.

Tei A Dawtna

31Huan kiginni a hih ziak in, luangte khawlni a Kros a a omlouhna ding in, huai khawlni ni thupi ahi ngal a. Judate’n Pilat kiang ah a khete uh hihtan a a luang uh paipih ding in a ngen uhi. 32Sepaihte a hongpai ua, a kiang a Kros a kilhlup tuah masakpen leh mi khat a khe uh a hihtan uhi. 33Himahleh Jesu kiang a hongtun un, a na sita chih a thei ua, a khete a hihtan tuankei uhi. 34Himahleh sepaihte lak a mi khat in a nak ah tei in a dawt a, huchi in sisan leh tui a hong luangkhia hi. 35A mupa’n a theisakta, a thu theihsak a dik ahi; a gendik chih a kithei a, nou leng na gintakna ding un. 36Laisiangthou in, “A guh khat lel leng hihtan ahi kei ding” a chih tunna ding in huai thil a hong omta hi. 37Huan Laisiangthou dang in, “A sutpa uh lam a en ding uh” a chi hi.

Jesu Vuina

(Matt. 27.57-61; Mk. 15.42-47; Lk. 23.50-56)

38Huan huai thilte khit in, Joseph, Arimathai mi, Jesu nungzui, Judate kihtak ziak a sim om in Jesu luang paipih ding in Pilat kiang ah a ngen hi. Pilat in a phal a, huchi in a hongpai a, a luang a paipihta hi. 39Huan Nikodem, a tung a zan a a kiang a hong in, murra leh aloe kihelsa buk sawmnga vel tawi in a hongsam hi. 40Jesu luang a la ua, Judate kivui dan bang in gimlimte toh puanmalngat hoih in a tuam uhi. 41Huan Kros a a kilh lupna mun uah huan khat a om a; huan ah kuamah sialna ngei nailouhna han thak khat a om hi. 42Judate kiginni a hih ziak in, han a kiang chin uh a hih toh, huai ah Jesu a sialta uhi.

Currently Selected:

JOHAN 19: PAITBSI

Highlight

Copy