JOHAN 20

Han Vuak

(Mat 28.1-8; Mar 16.1-8; Luk 24.1-12)

1Nipikal a ani masapen ahong tun in, zingsangpi khomial lai in, han ah Mari Magdalin ava hoh a, hansuang lakkhiaksa in amu hi. 2Huchi in atai a, Simon Peter leh nungzui dang, Jesu'n a-itpa kiang ah ahong pai a, “Han a kipan Toupa apaimangpih ua, akoihna uh ka thei kei uh,” chi in agen hi.

3Huchi in Peter apawt a, nungzui dang toh han lam azuan uhi. 4Atai tuak ua; nungzui dang in Peter amakhelh a, han atung masa hi. 5Huan kunsuk in a-en a, puanmalngat hoih amu a; himahleh asung ah alut kei hi. 6Simon Peter amah nung in ahong tung sam a, han sung ah alutsuak a; puanmalngat hoih omte amu hi. 7Jesu lukhung a kinulna puan pen, puanmalngat hoih lak a om lou a, atuam a khepsa a om amu hi. 8Huchi in nungzui dang, han tung masazaw pen leng alut sam a, amu a, agingta hi. 9Misi lak a kipan a thounawn ding ahi, chih Laisiangthou gen atheigige nawn kei uhi. 10Huchi in nungzuite amau inn ah apai nawnta uhi.

Mari Magdalin Kiang Ah Jesu Akilak

(Mat 28.9-10; Mar 16.9-11)

11Himahleh han pua ah kap kawm in Mari adingh a; kap kawm in akun a, han sung a-en hi. 12Huan angel nih puanngou silh, Jesu luang sialna mun ah khat alulam leh khat akhe lam a tu amu hi. 13Huan amau, “Numei, bangziak a kap na hia?” achi uhi. Ama'n, “Ka Toupa apaimangpih ua, akoihna uh ka theih louh ziak in,” chi in adawng hi.

14Huan huchi a agentak in anunglam anga a, Jesu dingh amu a, himahleh Jesu ahi chih athei kei hi. 15Jesu'n akiang ah, “Numei, bangziak a kap na hia? Kua ahia na zon?” achi hi. Ama'n huanpu hiam asa a, akiang ah, “Pu, amah hiai a kipan a paimangpih na hihleh, na koihna hon hilh tanla, huchi in ka la ding,” achi hi.

16Jesu'n akiang ah, “Mari” achi hi. Amah akihei a, akiang ah Hebru pau in, “Rabboni” achi a, (huai tuh Sinsakpa chihna ahi).

17Huan Jesu'n akiang ah, “Hon lawng ke'n, tutan in leng Pa kiang ah ka kahtou nai kei hi. Himahleh ka unaute kiang ah va hoh inla, akiang uah, ka pa, na Pa uh, ka Pathian, na Pathian uh kiang ah ka kahtou dek, achi, va chi in,” achi hi.

18Mari Magdalin ava hoh a, nungzuite kiang ah, “Toupa ka muta,” achi a, akiang ah hiai thute agen chih ahilhta hi.

Nungzuite Kiang A Kilakna

(Mat 28.16-20; Mar 16.14-18; Luk 24.36-49)

19Huan huai ni, nipikal a ni masapen, nitaklam ahong hih in, Judate kihtak ziak a nungzuite omna inn kongkhakte akhak nung un, Jesu ahong pai a, alak uah ahong dingh a, akiang uah, “Na tung uah khamuanna om hen,” achi hi. 20Huai agen khit in akiang uah akhut leh anak alak a, Toupa amuhtak un nungzuite akipak uhi. 21Jesu'n akiang uah, “Na tung uah khamuanna om hen, Pa'n kei hon sawl bang mah in nou ka hon sawl hi,” achi nawn hi. 22Huai thu agen khit in amau ahatkhum a, akiang uah, “Kha Siangthou tang un. 23Kua khelhna leng na ngaihdam uh ngaihdam ahi ding a; kua khelhna leng na ngaihdam louh uh, ngaihdam louh ahi ding,” achi hi.

Thomas Kiang A Kilakna

24Huan Jesu ahong lai in sawm-le-nihte lak a pang sam Thomas, Didum achih uh, akiang uah a-om kei hi. 25Huchi in nungzui dangte'n akiang ah, “Toupa ka muta uh,” achi uhi. Himahleh ama'n akiang uah, “Akhut sikkhetna pawn ka muh a, ka khutzung a ka khoih a, anak a ka khut ka golhlut hial keileh ka gingta kei ding,” achi hi.

26Huan ani giat nung in, insung ah anungzuite a-om nawn ua, Thomas leng akiang uah a-om sam hi. Huan kongkhakte khak hinapi in Jesu ahong pai a, alak uah ahong dinghta a, akiang uah, “Na tung uah khamuanna om hen,” achi hi. 27Huan Thomas kiang ah, “Na khutzung in sawk in, ka khutte en in; na khut in khoih inla, ka nak ah sawk in; ging lou ke'nla, gingta mai in,” achi hi.

28Thomas in, “Ka Toupa leh ka Pathian na hi,” chi in adawng hi.

29Jesu'n akiang ah, “Nang zaw na hon muh ziak in na gingta ahi; mu lou a gingta peuhmahte ahampha uh,” achi hi.

Tanchinhoih In Atup

30Huan Jesu'n nungzuite ma ah chiamtehna dang tamtak ahih a, huaite hiai laibu ah gelh vek ahi kei hi. 31Himahleh Jesu tuh huai Khrist, Pathian Tapa ahi chih na gintakna ding uleh, na gintak ua amin a hinna na neihna ding ua gelh ahi.

Currently Selected:

JOHAN 20: PAITBSI

Highlight

Copy