JOHAN 21

Tiberias Tuipi Ah Jesu Akilak

1Huai thilte nung in, Tiberias tuipi ah anungzuite kiang ah Jesu akilak nawn a; hichibang in amah mah akilak hi. 2Simon Peter leh Thomas, Didum achih uh, Galili gam a Kana a Nathanael, Zebedai tapa nihte, anungzui dang nihte toh a-omkhawm uhi. 3Simon Peter in akiang uah, “Ngasa man ding in ka kuan dek,” achi a, amau akiang ah, “Kou leng na kiang ah ka hong sam ding uh,” achi uhi. Apawtkhia ua, long ah atuang ua, huai zan in bangmah aman kei uhi. 4Phalvak in piautak ah Jesu ava dingh a; himahleh anungzuite'n Jesu ahi chih athei kei uhi. 5Jesu'n akiang uah, “Naute aw, nek ding banghiam na nei uhia?” achi hi. Amau akiang ah, “Nei lou,” chi in adawng uhi.

6Huan akiang uah, “Long sik taklam ah len pai le uchin na man ding uh,” achi hi. Apai ua, ngasa atam ziak in akaikhe zou kei uhi.

7Huchi in nungzui Jesu itpa'n Peter kiang ah, “Toupa ei ve,” achi hi. Huchi in Toupa ahi chih Simon Peter in atheih in, apuanak tungsilh ateng a, amah vuaktang a om ahi a, tuipi ah atawmkheta hi. 8Himahleh nungzuite'n long neuchik in, len ngasa a dim toh kai kawm in ahon zuan ua, gam a kipan in agamla ngal kei ua, tong zanih hiam phet ahi. 9Huan gam a ahong suahtak un, meihol a mei tohsa atung a ngasa leh tanghou emsa amu uhi. 10Huan Jesu'n akiang uah, “Tu in na ngasa mat uh akhen hon latou un,” achi hi.

11Huchi in Simon Peter ava tuang a, ngasa lian pipi a dim tui gei ah ahon kaikhia a, zakhat sawmnga-le-thum apha hi; huchi lawmlawm in tam mahleh len akek kei hi. 12Huan Jesu'n akiang uah, “Zing an hong ne un,” achi hi. Nungzuite lak ah kuamah in akiang ah, “Kua na hia?” chi in adong ngam kei uh. Toupa ahi chih athei uhi. 13Huan Jesu ahong pai a, tanghou ala a, akiang uah apia a, ngasate leng huchibang mah in ape sam hi.

14Huai tuh Jesu misi lak a kipan athohnawn nung a, anungzuite kiang a akilak thumveina ahi.

Peter Kiang A Jesu Thu Nanungte

15Huan zing an anek khit un, Simon Peter kiang ah Jesu'n, “Simon, Johan tapa, nang hiaite sang in kei na hon itzaw hia?” achi hi.

Ama'n akiang ah, “Hi, Toupa, ka hon it chih na thei hi,” achi hi.

Ama'n akiang ah, “Ka belamnoute vak in,” achi hi. 16Huan anihveina ding in akiang ah, “Simon, Johan tapa, nang kei na hon it hia?” achi nawn hi.

Ama'n akiang ah, “Hi, Toupa, ka hon it chih na thei hi,” achi nawn hi.

Ama'n akiang ah, “Ka belamte ching in,” achi hi. 17Huan athumveina ding in akiang ah, “Simon, Johan tapa, nang kei na hon it hia?” achi hi. Huan thumveina a nang kei na hon it hia? chi a akiang a agen ziak in Peter alungkham a, akiang ah, “Toupa, bangkim na thei a, ka hon it chih na thei hi,” achi hi. Jesu'n akiang ah, “Ka belamte vak in.”

18“Chihtaktak in, chihtaktak in ka hon hilh ahi, na naupan lai in na tai ah na kigak a, na utna peuh ah na hoh a; himahleh na upat hun chiang in na khut na zak ding a, midang in ahon gaksak ding ua, na utlouhna lam ah ahon kai ding uh,” achi hi. 19Huai thu bangchidan a si in ahia Pathian apahtawi ding, chih theihsakna ding a agen ahi. Huai agen khit in akiang ah, “Hon zui in,” achi hi.

Jesu Leh Nungzui Dang

20Huai khit in Peter akihei a, Jesu nungzui itpa, nitak an nek lai a a-awm ngai a hong awnphei a, “Amansak dingpa kua pen ahia?” chipa'n, amau hon zui amu hi. 21Peter in amah amuhtak in, Jesu kiang ah, “Toupa, hiai mi'n bang ahih dia?” achi hi.

22Jesu'n akiang ah, “Ka hong pai nawn tan a om nilouh ding in deih leng, huai nang bang lunghimoh zenzen? Nang hon zui in,” achi hi.

23Huchi in huai nungzuipa si lou ding in athu unaute lak ah athangta a; himahleh Jesu'n asi kei ding chih akiang ah agen kei a, “K'ong pai nawn tan a om nilouh ding in deih leng, huai nang bang lunghimoh zenzen?” chi lel ahi zaw hi. 24Huai nungzuipa, “Hiai thu theisakpa leh gelhpa ahi; huan athu theihsak adik chih i thei uhi.”

Thukhitna

25Huan hiaite lou leng Jesu thilhih dang tampi a-om lai a; huaite gelh vek ding hileh, laibu gelh ding tengteng khovel ah leng tazou in ka gingta kei hi. Amen.

Currently Selected:

JOHAN 21: PAITBSI

Highlight

Copy