JOHAN 8
8
Numei Ang kawm Lai Mat
1Himahleh Olive tang ah Jesu ahohtou hi. 2Zingsang phalvak in tempul ah alut nawn a, mi tengteng akiang ah ahong pai ua, amah atu a, amaute thu ahilh hi. 3Laigelhmite leh Pharisaite'n numei khat angkawm lai amat uh ahon pi ua; alai ah adingsak uhi. 4Jesu kiang ah, “Sinsakpa, hiai numei angkawm, a-angkawm laitak a amat uh ahi. 5Mosi Dan laibu in hichibang mi suang a denlup thu ahon pia hi; nang bangchi na sa a?” achi uhi. 6Huai thu amah hekna ding amuhtheihna ding ua, ze-etna dia agen uh ahi. Huchi in Jesu akun a, athugen uh za lou bang in akhutzung in leitual agelh hi.
7Huan adot lailai ziak un amah adaktou a akiang uah, “Na lak ua khelhna nei lou in amah suang in deng masa heh,” achi hi. 8Akun nawn a, akhutzung in leitual agelh nawn hi. 9Amau athugen azak un, upapen a pan atawp pha in, khatkhat in akigelkhia ua; huchi in numei alai a a-omna ngei a om toh Jesu kia a-om uhi. 10Jesu adaktou a, “Numei, koi a om ahi ua? Kuamah in siam louh hon tangsak lou uhia?” achi hi.
11Huan ama'n, “Toupa, kuamah in hon tangsak kei,” achi hi. Jesu'n, “Ke'n leng siam louh ka hon tangsak kei; pai inla, tuban khial nawn ke'n,” achi hi.
Jesu Khovel Vak Ahi
12Jesu'n akiang uah thu agen nawn a, “Kei khovel vak ka hi; kei hon zui kuapeuh mial ah akhosa kei ding a, hinna vak anei zaw ding,” achi hi.
13Huchi in Pharisaite'n akiang ah, “Nangmah thu theisak na hi; na thu theihsak adik kei,” achi uhi.
14Jesu'n akiang uah, “Keimah thu theisak na hi taleng zong ka thu theihsak adik ahi. Ke'n ka hong kipatna leh ka manohna ding ka thei hi; noute'n bel ka hong kipatna leh ka manohna ding na thei kei uh. 15Nou sadan in vai na hawmsak uh; ke'n kuamah vai ka hawmsak kei. 16Ahi, vai hawmsak na hi taleng zong, ka vai hawmsak adik ding; keimah kia ka hi kei a, kei leh Pa hon sawlpa ka hi zaw uhi. 17Ahi, na dan laibu uah leng mi nih theihpihna adik, chih gelh ahi. 18Kei ka hihleh keimah thu theisakpa ka hi a, Pa hon sawlpa'n ka thu atheisak hi,” chi in adawng hi.
19Amau akiang ah, “Koi a na Pa om ahia?” achi uhi. Jesu'n, “Nou kei na hon thei kei uh, ka Pa leng na thei kei uh; kei hon thei hi le uchin, ka Pa leng na thei ding uh,” chi in adawng hi.
20Huai thu tempul a thu ahilh kawm a, sumkoihna mun a agen ahi; ahun a tun nai louh ziak in kuamah in amah aman nai kei uhi.
Pa Kiang A Pai Ding Genkholhna
21Huan ama'n akiang uah, “Ka paimang ding a, nou na hon zong ding ua, na khelhna uah na si ding uh; ka hohna ding ah na hong thei kei ding uh,” achi nawn hi.
22Judate'n, “Ka hohna ding ah na hong thei kei ding uh, achih, akihihlum dia adiam?” achi uhi.
23Ama'n akiang uah, “Nou nuailam a kipan na hi ua; kei tunglam a kipan ka hi; nou khovel a na hi ua, kei zaw hiai khovel a ka hi kei hi. 24Huaiziak in na kiang uah, na khelhna uah na si ding uh ka chih, huai amah ka hi, chih na gintak kei ualeh na khelhna uah na si ngeingei ding uh,” achi hi.
25Huan amau akiang ah, “Kua na hia?” achi uhi. Jesu'n akiang uah, “Atung a kipan in na kiang uah ka genta hi. 26Nou tungtang thu ah thil tampi gen ding leh ngaihtuah ding ka nei; himahleh, hon sawlpa zaw midik ahi; amah kiang a ka thuzakte khovel kiang ah ka hilh ahi,” achi hi.
27Pa thu akiang uah agen chih atheisiam kei uhi. 28Huchi in Jesu mah in, “Nou mihing Tapa na khaikang nung un, amah ka hi chih leh ke'n keimah thu in thil bangmah ka hih kei a, Pa hon hilh bang zel in hiai thu ka gen zaw ahi chih na thei ding uhi. 29Hon sawlpa ka kiang ah a-om a, Pa'n kei kia in hon nuse ngei kei; athil kipah lam peuhmah ka hih zel ziak in,” achi hi.
Thutak Suahtakna Ahi
30Huan huai thute agen lai in mi tampi'n amah agingta uhi. 31Huchi in Jesu'n amah gingta Judate kiang ah, “Ka thu a na om gige uleh, ka nungzuite na hi taktak ding uhi. 32Huan thutak na thei ding ua, thutak in ahon suaktasak ding,” achi hi.
33Huan amau akiang ah, “Abraham suante ka hi ua, tutan in kuamah sal ah ka om ngei kei uh, suahtaksak in na om ding uh bangchi chih a chi na hia?” achi ua, adawng uhi.
34Huan Jesu'n akiang uah, “Chihtaktak in, chihtaktak in ka hon hilh ahi, kuapeuh thil hihkhial khelhna sal ahi. 35Sal kichi peuhmah inn ah a-om gige kei a; Tapa bel a-om gige hi. 36Tapa in sal a pan ahon suahtaksakleh na suakta taktak ding uhi. 37Abraham suante na hi uh chih ka thei hi, himahleh hon thah na tum ngal ua, ka thu in noute a mun aneih louh ziak in. 38Ke'n ka Pa kiang a thil ka muh ka gen a; nou leng na pa uh kiang a thil na muh uh na hih uh,” achi hi.
39Huan amau akiang ah, “Ka pa uh Abraham ahi,” achi ua, adawng uhi. Jesu'n akiang uah, “Abraham tate hi le uchin, Abraham thilhih na hihta ding uhi,” achi hi. 40“Himahleh Pathian kiang a thutak ka zak, kei ahon hilhpa ngei, tu'n ah hon thah na tum ngal ua; Abraham in zaw hichibang in ahih kei. Nou zaw na pa uh thil na hih nak uhi,” achi hi. 41Amau akiang ah, “Ang kikawm a piang ka hi kei uh, Pa khat kia ka nei uh, Pathian,” achi uhi.
42Jesu'n akiang uah, “Pathian na Pa uh hitaleh nou kei na hon it ding uh; Pathian a pan hong pawt leh akiang a kipan hong pai ka hi; keimah thu a hong leng ka hi sam kei, ama'n ahon sawl zaw hi. 43Bangziak a ka thugen theisiam lou? Ka thu na zak theih louh ziak uh ahi. 44Nou zaw na pa uh diabol a pawt na hi ua, na pa uh utna na hih ding uh. Amah zaw atung a kipan tualthat ahi, thutak ah a-om kei; asung a thutak himhim a-om louh ziak in. Zuauthu agen in amah a ngei agen ahi; zuauthei ahi ngal a, zuaupa leng ahi. 45Thutak ka gen ziak in nou hon gingta lou na hi uhi. 46Na lak uah kua'n ahia khelhna a siam louh hon tan thei om? Thutak ka gen in leng nou bang achia hon gingta lou? 47Pathian a pan pawt in Pathian thu apakta a; Pathian a pan pawt na hih louh ziak un na pakta kei uhi,” achi hi.
Jesu Leh Abraham
48Huan Judate'n akiang ah, “Samari mi dawi zawl na hi ka chih uh, ka chi dik ngel uh ahi kei maw?” achi ua, adawng uhi.
49Jesu'n, “Dawi zawl ka hi kei. Ka Pa ka zahtak ahi zaw, nou kei na hon zahtak kei uhi. 50Himahleh keimah kilawmna zong ka hi kei; azongmi leh angaihtuahmi khat a-om hi. 51Chihtaktak in, chihtaktak in ka hon hilh ahi, mi'n ka thu azuihleh tangtawn in sihna amu kei ding,” achi hi.
52Huan Judate'n akiang ah, “Dawi zawl na hi chih tu in ka theita uhi. Abraham asita, zawlneite toh, nang mi'n ka thu azuihleh tangtawn in sihna achiam kei ding, na chi maw. 53Ka pu uh Abraham sang in na thupizaw a hia? Amah leng asita a, zawlneite leng asita uh; kua a kibawl na hia?” achi uhi.
54Jesu'n, “Keimah kipahtawi hi taleng ka kipahtawina bangmah ahi kei; na Pathian uh, na chih uh ka Pa, hon pahtawipa ahi; nou amah na thei kei uhi. 55Ke'n zaw amah ka thei; amah ka thei kei chi leng noumau bang a zuauthei ka hi ding; huchi in amah ka thei a, athu leng ka zui zel. 56Na pu uh Abraham in ka ni mu ding ahih ziak in akithalawp a, huan amu petmah a, akipak hi,” chi in adawng hi.
57Huan Judate'n akiang ah, “Nang kum sawmnga leng hi nailoupi in, Abraham na mu a hia?” achi uhi.
58Jesu'n akiang uah, “Chihtaktak in, chihtaktak in ka hon hilh ahi, Abraham om ma a Ompa ka hi,” achi hi.
59Huchi in adenna ding un suangte atawm ua; himahleh Jesu akibu a, tempul a kipan apawtta hi.
Currently Selected:
JOHAN 8: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
