JOHAN 9
9
Mittawsa A Piang Hihdamna
1Huan Jesu'n apai kawm in pian tung a kipan mittaw khat amu hi. 2Anungzuite'n akiang ah, “Rabbi, mittawsa a apian kua'n ahia thil hihkhial, hiai mi hia, anu leh apa?” chi in adong uhi.
3Jesu'n, “Hiai mi'n ahihkhial kei, anu leh apa'n leng ahihkhial kei uh; Pathian nasepte atung a alatna ding ahi zaw,” chi in adawng hi. 4“Sun ahih lai in hon sawlpa nna i sep ngeingei ding uh ahi; zan hi dekdekta ahi, huai hun chiang in kuamah in nna asem thei kei ding uh. 5Khovel a ka om sung in khovel vak ka hi,” chi in adawng hi.
6Huchibang a agen khit in, lei ah chil asia a, tungman abawl a, huan amit ah tungman anuh hi. 7Akiang ah, “Siloam dil ah va sil in,” achi a, (huai tuh Sawl chihna ahi). Va pai in asil a, mitvak in ahong kik nawn hi.
8Huchi in avengte leh tuma a khutdoh a mute'n, “Hiai mi tu kawm a khutdohpa ahi kei a hia?” achi uhi.
9Midang in, “Ahi mah vo oi,” achi ua, midang in, “Hi kei e, akibatpih ahi zaw,” achi uhi. Ama'n bel “Huai mi mah ka hi,” achi hi.
10Huan amau akiang ah, “Na mit bangchi in ahia ahong vak?” achi uhi.
11Ama'n, “Mi khat, Jesu achih un tungman abawl a, ka mit anuh a, ‘Siloam dil ah va hoh inla va sil in’ ahon chi a, huchi in ka va hoh a, ka sil a, mitvakna ka muta,” achi hi.
12Huan amau akiang ah, “Amah koi a om ahia?” achi uhi. Ama'n, “Ka thei kei,” achi hi.
Pharisaite Leh Hihdam A Ompa
13Amaute'n Pharisaite kiang ah huai mittawpa ahon pi uhi. 14Jesu'n tungman bawl a, amit ahihvak ni Sabbath ni ahi. 15Huchi in Pharisaite'n amit ahong vak takdan adong nawn uhi. Ama'n akiang uah, “Ka mit ah tungman akoih a, ka sil a, ka mutheita hi,” achi hi.
16Huan Pharisai khenkhat in, “Huai mi'n Sabbath ni atan louh ziak in, Pathian a kipan ahi kei,” achi uhi. Khenkhat in bel, “Mikhial in bangchi in hichibang thillamdang ahihthei dia?” achi uhi. Huchi in akikhen ua, akilangta uhi.
17Mittawpa kiang ah, “Na mit ahihvaksak, nang bangchibang in amah na ngaihtuah a?” achi nawn ua. Ama'n, “Zawlnei ahi,” achi hi.
18Himahleh Judate'n amit hong vakta nu leh pa asap masiah uh, mittaw ana hi him a, amit ahong vakta chih atungtang thu ataksang kei uhi. 19Anu leh apa kiang ah, “Hiai mi na tapa uh mittawsa a piang ahi na chih uh ahi hia? Bangchi in ahia tua amuh theih tak?” chi in adong uhi.
20Anu leh apa'n, “Hiai ka tapa uh ahi chih ka thei uh, mittawsa in apiang chih leng ka thei uh. 21Himahleh bangchi in ahia tua hon muh theih chih ka thei kei uh, amit hihvakpa leng ka thei sam kei uh; amah dong un; piching ahi a; amah thu kigen thei ahita,” achi ua, adawng uhi. 22Judate akihtak ziak ua anu leh apa'n huai thute agen uh ahi; Judate'n, huai ma him in leng, amah Khrist ahi chi a gum a-omleh sinagog a pan nohsuah ding chih lem ana sa chiat ngal ua. 23Huaiziak in anu leh pa'n, “Piching ahi, amah dong un,” achi uhi.
24Huchi in mittawpa asam nawn ua akiang ah, “Pathian phat in hiai mi zaw mikhial ahi chih ka thei uh,” achi uhi.
25Ama'n bel, “Mikhial ahi hia hilou ka thei kei, thil khat ka thei, tuma in ka mit ataw a, tu in ka mutheita,” chi in adawng hi.
26Amau akiang ah, “Na tung ah bangchi in ahia ahih? Na mit bangchi in ahia ahihvak?” achi uhi.
27Ama'n akiang uah, “Den in ka hon hilhta vele, na thei nuam ngal kei ua; bang achia thei nuam nawn na hi ua? Nou leng anungzui hih sam ut na hi uh maw?” chi in adawng hi.
28Huan amau amah atai ua, “Nang amah nungzui na hi, kou zaw Mosi nungzuite ka hi uh, chi in. 29Pathian in Mosi ahoupih chih ka thei uh, hiai mi koi a hong kipan ahia ka theihsak kei uh,” achi uhi.
30Huai mi'n akiang uah, “Huai pentak ahi alamdanna, koi a hong kipan ahia na theih louh uh, ka mit lah ahihvak ngei ngal a,” achi hi. 31“Pathian in mikhial thu angaikhe kei chih i thei uhi. Himahleh kuapeuh in Pathian alimsak a, adeihlam ahihleh, Pathian in amah angaikhia hi. 32Khovel om tung a kipan kuamah mittawsa a piang mit ahihvak nawn chih akithei ngei kei hi. 33Hiai mi Pathian a kipan a pawt ahihkeileh bangmah ahihthei kei ding,” chi in adawng hi.
34Amau akiang ah, “Nang khial lumlet a piang in hiai bang na hon hilh vial maw?” chi in adawng uhi. Huchi in amah ahawlkhia uhi.
Khalam Mittawte
35Huan anohkhia uh chih Jesu'n aza a; amah amuh in, “Pathian Tapa na gingta hia?” achi hi.
36Ama'n, “Pu aw, ka gintak theihna ding in amah kua ahia?” chi in adawng hi.
37Jesu'n, “Amah na mu khinta, tua nang hon houpihpa ahi,” achi hi.
38Ama'n, “Toupa, ka gingta hi,” chi in amah abia hi.
39Jesu'n, “Thukhen ding in hiai khovel a hong ka hi, mittawte' mit ahong vakna ding uleh mitvakte' mit ahong tawtna ding un,” achi hi.
40Akiang a Pharisai omte'n huai thu azak un, akiang ah, “Kou leng mittaw ka hi sam uh maw?” achi uhi.
41Jesu'n akiang uah, “Mittaw hi le uchin khelhna nei lou ding hi uchin a, himahleh ka mu thei uh na chih ziak un khelhna ah na om gige uhi,” achi hi.
Currently Selected:
JOHAN 9: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
