LUKA 20

Thuneihna Thu Ginlelhna

(Mat 21.23-27; Mar 11.27-33)

11 Huan ni khat tempul a mite thu hilh a, tanchinhoih agen lai in, siampu liante, laigelhmite, upate toh akiang ah ahong pai guih uhi. 2Akiang ah, “Kua thu in ahia hiai thilte na hih? Kua'n ahia thu hon pia? hon hilh in,” achi uhi.

3Ama'n akiang uah, “Ke'n leng thu kam khat ka hon dong sam ding; hon dawng un,” achi hi. 4“Johan baptisma van a kipan hia, mihing a kipan?” chi in adong hi.

5Akingaihtuah ua, “Van a kipan chi lehang, bangziak a amah gingta lou? hon chi thepthup ding hi. 6Huan mihing a kipan chi lehang lah, mi tengteng in suang in ahon deng ding ua; Johan zawlnei ahih lam athei ngal ua,” achi uhi. 7Huchi in adawng ua, “Koi a kipan ahia ka thei kei uh,” achi uhi.

8Huan Jesu'n akiang uah, “Ke'n leng kua thu in ahia hiai thil ka hih chih ka hon hilh sam kei ding,” achi hi.

Grephuan Kemte Gentehna

(Mat 21.33-46; Mar 12.1-12)

9Huan mipite kiang ah hiai gentehna agen a, “Mi kuahiam in grephuan abawl a, aloukemte kiang ah khohloh ding in apia a, sawtpi taam ding in gamdang ah ahohta hi. 10Huan agah loh hun in atan ding gah apiak ding un loukemte kiang ah sikha khat asawl hi. Himahleh loukemte'n a na vua uhi. 11Sikha dang asawl nawn a; huai leng na vo nawn in, zumhuaipi in ana bawl ua, khutvuak in apaisak nawnta uhi. 12Huan athumna asawl nawn a; huai leng hihliam in apaikhia uhi. 13Huai zoh in grephuan neipa'n, ‘Bangchi in ka hihta dia? Ka tapa deihtak ka sawlmai ding; amah ana zah khamoh kei ding uh,’ achi hi. 14Himahleh loukemte'n amah ana muhtak un, ‘Hiai gouluah dingpa ahi, that ni, huchi in agou ei a ahi ding,’ chi in akihou uhi. 15Huchi in grephuan a pan apaikhia ua, ahihlumta uhi. Huan grephuan neipa'n amaute bang alohta dia le? 16Loukemte ahong hihmang dia, huan grephuan midangte ape ding,” achi hi. Huan huai azak un, “Huai tel zaw tung keileh,” achi uhi.

17Himahleh amaute a-en a, ahihleh hiai thu agelh uh bang ahia? “Inn lam mite suang deih louhpen, huai mahmah aning a suang phatuampen ahong hita, chih. 18Kuapeuh huai suang tung a puk akitatgawp ding; adelhkhakte houh adelhzan lai ding,” achi hi.

Siah Piak Thu A Dotna

(Mat 22.15-22; Mar 12.13-17)

19Huai laitak in laigelhmite leh siampu liante'n mat atum ua; himahleh huai gentehna amau dem a agen ahi chih atheih ziak un, mipi alau uhi. 20Gam-ukpa vaihawmna leh thuneihna nuai a apiaktheihna ding un, athu genkhelh tang in a-enkhia ua, mihoih a kibawl enkhetu aguk sawl uhi. 21Amau akiang ah, “Sinsakpa, diktak in thu gen in na sinsak zel a, kuamah khentuam nei lou in chihtaktak in Pathian thu na hilh zel chih ka thei uh. 22Kaisar kiang a siah ka piak uh asiang hia, siang lou?” chi in adong uhi.

23Himahleh ama'n adoha lungput uh athei a, akiang uah, “Bang achia hon ze-et na hi ua?” achi hi. 24“Na sumtang uh hon lak un, kua lim leh kua min ahia tuang?” achi a, amau, “Kaisar lim,” achi uhi.

25Ama'n akiang uah, “Huchi ahih nung, Kaisar thilte Kaisar kiang ah pia unla, Pathian thilte Pathian kiang ah pia un,” achi hi.

26Huchi in mipi ma a paukhelh lak ding amu kei ua; adawnna lamdang asa mahmah ua, adai dide uhi.

Thohnawnna Thu A Dotna

(Mat 22.23-33; Mar 12.18-27)

27Huan Saddukai, thohnawnna a-om kei chite lak a mi kuate hiam akiang ah ahong ua; thu adong uhi. 28“Sinsakpa, Mosi in, mi'n zi nei in, ta nei lou in sihsan taleh a-unaupa'n azi luah in, a-unaupa a ding in chi asuahsak ding chih, agelh hi. 29Ahi a, unau pasal sagih a-om ua; upapen in zi anei a, ta nei lou in asi hi. 30Anihna in aluah a; ta nei lou in asi nawn hi. 31Athumna in aluah nawn a, huchibang in unau sagihte'n anei chiat ua, ta nei lou in asi uhi. 32Atawpna ah numei leng asita hi. 33Huchi ahihleh thohnawn hun ah akua pen zi ahi dia? Amau sagihte'n zi in anei chiat ngal ua,” achi uhi.

34Huan Jesu'n akiang uah, “Tulai mite zi leh ta in akinei zel ua, 35himahleh huai hun chiang a tel tak ding leh misi lak a pan thohnawnna tang tak a seh peuhmahte, zi leh ta in akinei nawn kei ding uh. 36Sih leng asi thei nawn kei ding uh, angelte bang a om ding ahi ngal ua; thohnawnna tate ahih ziak un, Pathian tate ahi ding uh,” achi hi. 37“Misi kaihthoh in a-om ding uh chih Mosi in leng loubuk ah, Toupa, Abraham' Pathian, Isak' Pathian, Jakob' Pathian, achih lai in, atheisak hi. 38Amah misi Pathian ahi kei a, mihing Pathian ahi zaw; amah ngaih in mi tengteng ahing vek ngal ua,” achi hi.

39Laigelhmite lak a kuate hiam in, “Sinsakpa, na gen dik e,” chi in adawng uhi. 40Huchi in thudang adong ngam nawn kei uhi.

Messia Thu A Dotna

(Mat 22.41-46; Mar 12.35-37)

41Huan ama'n akiang uah Khrist, David tapa ahi chih bangchidan a chi thei uh ahia? 42Sam laibu ah David mahmah in,

“Toupa'n, ka Toupa kiang ah,

ka taklam a tu in,

43Na khepek ngakna ding a na melmate ka bawl masiah,”

ana chi hi.

44Huchi in David in amah, “Toupa achi ngal a, bangchi in ahia atapa ahihtheih?” achi hi.

Laigelhmite Vauhilhna

(Mat 23.1-36; Mar 12.38-40)

45Huan mi tengteng theih in anungzuite kiang ah, laigelhmite lak ah pilvang un. 46“Amau puanaktual silh a vak a-ut ua, dawr mun ah chibai buk leh sinagog a tutphah hoihpen a tut, ankuangluina ah mun hoihpen adeihtuam nak uhi. 47Meithaite innte anegai ua, mi khemna ding in sawt pipi athum uhi. Huaite'n siam louh anak tan sem ding uhi,” achi hi.

Currently Selected:

LUKA 20: PAITBSI

Highlight

Copy