LUKA 21
21
Meithainu Thilpiak
(Mar 12.41-44)
1Huan adakkhia a, mihaute'n sumkholna a sum akhiak lai uh amu hi. 2Meithai zawngtak kuahiam in dal dangka muza nih hong khia leng amu hi. 3Huchi in “Chihtaktak in ka hon hilh ahi, hiai tengteng sang in tua meithai zawngtak in akhe tamzaw. 4Hiai tengteng in aneihlet uh akhia ua; ama'n bel akitunhingna ding a aneih sunsun akhe vek hi,” achi hi.
Hun Tawp Chiamtehnate
(Mat 24.1-2; Mar 13.1-4)
5Huan kuate hiam in tempul thu, suang hoihtak leh thil piakkhawm a azep kilawmdan uh, agen lai un, ama'n, 6“Hiai na thil muh uh, hihchip louh a suang kichiang himhim hiai a a-om louh ding nite ahong tung ding hi,” achi hi.
Khrist Hong Paina Ding Chiamtehna
(Mat 24.3-14; Mar 13.3-13)
7Huan amau akiang ah, “Sinsakpa, huaite chikchiang in ahong om ding ua? Huaite ahong tun ding chiamtehna bang a-om dia?” chi in adong uhi.
8Huan ama'n, “Pimang a na omlouhna ding un pilvang un. Mi tampi'n, ‘Khrist ka hi!’ huan, ‘Ahun tung ding ahita, chi in keimah min sial in ahong pai ding uh, huaite zui kei un.’ 9Kidou thu leh buai thu na zak hun chiang un lau kei un; huaite atung masa ding a, tawpna bel hi pah lou ding ahi,” achi hi.
10Akiang uah, “Nam tuam leh nam tuam akidou ding ua, gam tuam leh gam tuam akidou ding uh. 11‘Nakpitak in ziin aling dia, mun tuamtuam ah kial ake ding a, hipi aleng lai ding; van a kipan thil lauhuai leh chiamtehna thupitak ahong om ding hi.’ 12Himahleh huai thil tengteng atun ma in, nou ahon man ding ua, sinagog leh suangkul ah pi in ahon hihgim ding uh, keimah min ziak in kumpipate leh gamukte ma ah ahon pi ding uhi. 13Hiai noute a ding a theihpihna hun lemtang ahi ding hi. 14Huchi in dawnna ding ngaihtuah khawl lou ding in na lungtang uah kihihkip un. 15Na melma tengteng un hon dou ua hon sel theihlouhna ding un kam leh pilna ka hon pe ding hi. 16Huan na nu leh na pate, na unaute, na tanaute, na lawmte un leng hon mansak ding ua; akhen ahon that ding uhi. 17Keimah min ziak in mi tengteng huat na hi ding uh. 18Himahleh, na samzang uh khat leng amangthang kei ding. 19Na kuhkalna uah na hinna uh na humbit ding uhi.
Jerusalem Siatna Ding Genkholhna
(Mat 24.15-21; Mar 13.14-19)
20“Himahleh sepaihte'n Jerusalem khua a-um uh na muh chiang un, amangthang dek chih thei un. 21Huai hun chiang in Judia gam a omte'n tang ah taimangsan uhen; asung a omte'n pawtsan uhen, gam a omte asung ah lut kei uhen. 22Huai nite phulakna ahi; thu agelh tengteng uh ahong tuntheihna ding in. 23Huai nite in gaite leh naunou pomte tung agik ding, khovel ah haksatna thupitak atun ding ziak in leh hiai chite tung a thangpaihna atun ding ziak in. 24Huan namsau in asi ding ua, nam chih kiang ah sal a pi in a-om ding uh; huan Jerusalem tuh Zentelte ni atawp mateng Zentelte sikden in a-om ding hi.
Toupa Hong Pai Nihveina
(Mat 24.29-31; Mar 13.24-27)
25“Huan ni leh kha leh aksite ah, chiamtehna a-om ding a; tuipi mau leh akihoh ziak in leitung ah leng namte haksatna leh mangbatna atung ding; 26mite launa ziak leh khovel a thil hong tung ding ngaihtuah ziak in, asibup ding ua; van thilhihtheihnate aling ding hi. 27Huai hun chiang in Mihing Tapa thilhihtheihna leh thupina thupi toh meipi lak a hong pai amu ding uhi. 28Huan huai thilte ahong tun pat hun chiang in entou unla, dakkhia un; na tatna uh ahong nai tak ziak in,” achi hi.
Theipi Kung Gentehna
(Mat 24.32-35; Mar 13.28-31)
29Huan akiang uah gentehna thu agen a, “Theipi kung leh sing tengteng en un; 30ahong selnoutak in huai na mu ua, nipi hong tung ding ahita, chih noumau in na thei uhi. 31Huchi mah bang in nou leng huaite hong tung na muh chiang un, Pathian lalgam ahong naita chih thei un. 32Chihtaktak in ka hon hilh ahi, thil tengteng atunkim masiah hiai khangte amang kei ding hi. 33Lei leh van amang dia, ka thu bel amang kei ding hi.
Kiveng Gige A Om Akulna
(Mat 24.36-44; Mar 13.32-37)
34“Himahleh pilvang un, huchi lou in zaw nekvah luat toh, zukham toh damsung khosak ngaihtuah in, na lungtang uh adim lo kha ding a, huai ni in thang-awk bang in thakhat in na tung uah ahong tung guih kha ding hi. 35Huchi bangtak a leitung maikaih a omte tengteng tung a tung chiat ding ahi ngal a. 36Huai thil hong tung ding tengteng pel ding leh Mihing Tapa ma a dingh tak ding a seh na hihtheihna ding uleh thahatna na neihna ding un chik lai peuh in thum kawm in limsak gige un,” achi hi. 37Huan niteng in tempul ah thu ahilh zel a; zan teng in apawt a, Olive tang achih uah agiak zel hi.
38Huan zing in athu ngaikhe ding in mi tengteng tempul ah akiang ah ahong zel uhi.
Currently Selected:
LUKA 21: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
