LUKA 8

Jesu Nna Sepsak Numeite

1Anung in Jesu thuhilh leh Pathian lalgam tanchinhoih gen kawm in kholian leh khoneute tawn vialvial in apai a; akiang ah sawm-le-nihte a-om uhi. 2Numei kuate hiam dawimat leh china dam nawnte Magdalin kichi Mari sung a dawi sagih pawtna achih uh, 3Joanna, Herod sumkempa Chuza zi, Sussana leh midang tampite toh ahi uh; huaite'n amau neihsa in amah nna asepsak zel uhi.

Buhchithehpa Gentehna

(Mat 13.1-9; Mar 4.1-9)

4Huan mipi tampitak ahong kikhawm ua, kho chih a pan akiang a hong paikhawm mite kiang ah gentehna in thu agen a.

5“Buhchithehpa buhchi theh in akuan a; atheh lai in akhen lamsik ah akia a, mi'n asikden ua, tungleng vasate'n anegai uhi. 6Huan akhen suang tung ah akia a, apoutak in akawt louh ziak in avuai pah hi. 7Huan akhen loulingnei lak ah akia a, lou in apou tonpih a, adepmang hi. 8Huan akhen lei hoih ah akia a, ahong pou a, aleh za in agahta,” achi hi. Huai thu agen lai in akikou a, “Kuapeuh zakna ding bil nei in, za uhen!” achi hi.

Gentehna In Atup

(Mat 13.10-17; Mar 4.10-12)

9Huan anungzuite'n akiang ah, “Hiai gentehna bang chihna ahia?” chi in adong uhi. 10Ama'n, “Pathian lalgam thugukte na theih ding ua piak ahi a, midang kiang ah bel gentehna kia a gen ahi; mu napi a amuh theihlouhna ding uleh za napi a atheihsiamlouhna ding un,” chi in adawng hi.

Buhchithehpa Gentehna Hilhchetna

(Mat 13.18-23; Mar 4.13-41)

11Huai gentehna thu omdan hiai ahi: Buhchi Pathian thu ahi. 12Lampi sik a kiate thu zasate ahi uh; himahleh diabol ahong pai a, agin louh ua, hotdam ahihtheihlouhna ding un alungtang ua kipan thu alakmangsak zel hi. 13Huan suang tung a kiate azaktak ua thu kipaktak a pom pahte ahi ua; himahleh zung himhim anei kei ua, sawt louchik kia agingta ua, khemna hun in atawpsan nak uhi. 14Huan loulingnei lak a kiate thuzate ahi ua; himahleh akhosak zelna uah damsung khosak ngaihtuahnate, hauhsaknate, nopsaknate'n adep a, agah piching kei nak uhi. 15Lei hoih a kiate bel thu za a lungtang kizen leh hoihtak a kem kinken a, thuakzoutak a gahsuahte ahi uhi.

Khawnvak A Pan Sinsakna

(Mar 4.21-25)

16“Kuamah khawnvak de in bel in akhuh kei uh, lupna nuai ah leng akoih kei uh; alut peuhmah in avak amuhtheihna ding un akoihna ah akoih zaw hi. 17Thang lou ding a iim bangmah a-om kei, theih louh ding leh lang lou ding a selguk bangmah a-om sam kei hi. 18Huchi in bangchibang in ahia na zak uh pilvang un; kuapeuh anei piak behlap ahi ding a, kuapeuh anei lou nei akichih sun leng laksak ahi ding,” achi hi.

Jesu Nu Leh Asanggamte

(Mat 12.46-50; Mar 3.31-35)

19Huan anu leh a-unaute'n Jesu kiang ahong naih ua, himahleh mipi ziak in akiang atung thei kei uhi. 20“Na nu leh na unaute nangmah muh tum in inpua ah adingh nilouh uh,” chi in ahilh uhi.

21Ama'n akiang uah, “Pathian thu za a gingtate ka nu leh ka unaute ahi uh,” chi in adawng hi.

Huihpi Jesu'n Adaisak

(Mat 8.23-27; Mar 4.35-41)

22Huan hichi ahong hi a, huai lai in ni khat anungzuite toh long ah atuang a, akiang uah, “Dil gal khat lam ah i kai ding uh,” achi a, huchi in long aphel ua, apaita uhi. 23Long a atuan lai un Jesu a-ihmuta a; tuipi ah huihpi ahong nungsuk a, along uh tui in adim dekdek a, lauhuaipi in a-omta hi. 24Huan akiang ah ava hoh ua, aphawng ua, “Heutupa, heutupa, mangthang ding ka kei uh maw,” achi uhi. Amah akhanglou a huih leh tuikihot ataita a; atawp ua adaita mai uhi. 25Huan akiang uah, “Na ginna uh koi a om ahia?” achi hi. Huan alau ua, lamdang asa mahmah uh. “Hiai mi kua ahia le, huih leh tui nangawn thu apiak a, athu aman uh?” akichi uhi.

Pasal Naupang Dawimat Hihdamna

(Mat 8.28-34; Mar 5.1-20)

26Galili gam zawn Gerasinte gam atung uhi. 27Huan gam a apaikhiak lai in, khua a mi dawimat kuahiam in ana mu a; huai mi sawtpi puan silh lou in a-om hi, inn ah leng a-om kei a, han ngen ah a-om zaw hi. 28Jesu amuhtak in akikou a, ama ah abokkhup a, aw ngaihtak in, “Jesu, Pathian Tungnungpen Tapa, kei leh nang bang i kizolhna om ahia? Hon hihgim lou ding in ka hon ngen ahi,” achi hi. 29Jesu'n huai mi sung a kipan a dawi nin pawt ding in thu ape khinta hi. Huai mi dawi in tamveipi amat ahi a; khainiang leh kol abunsak ua, aveng zel ua; himahleh agakna uh ahihtat a, dawi in gamkeu ah adelhkhia hi.

30Jesu'n, “Na min bang ahia?” chi in adong a, ama'n, “Nuai ka hi,” achi, asung a dawi tampi alut ziak in. 31Huan kokhuk taw nei lou a paih ding thu pe lou ding in Jesu kiang ah angen uhi.

32Huai tang ah vokhon tampi agamta ua; vok sung a luttheihna thu akiang ah angen uhi. Ama'n phalna apia hi. 33Dawite huai mi sung a kipan apawt ua, vok sung ah alut uhi; huan tuipi gei, ken ah vokhonte ataisuk ua, tuipi ah atailut ua, tui hak in asita uhi.

34Huan vok vulte'n huai thil omdan amu ua, atai ua, khua ah leh gam ah agen uhi. 35Huan bang ahita a? chi a en ding in apawt chiat uhi. Jesu kiang ahong tun un, dawi pawtsan nung puansilh a, lungsim ngeina pu in, Jesu khebul a tu ahong mu ua, huchi in alauta uhi. 36Huan atheite'n dawimat ahihdamdan thu amaute ana hilh uhi. 37Huan akim Gerasinte gam a mi tengteng in, alau mahmah ziak un, amah akiang ua kipan paimang ding in angen ua; huan, long ah atuang a, apaikik nawnta hi. 38Dawi pawtsan mi in Jesu kiang a omdet angen hi. 39Himahleh Jesu'n, “Na inn ah pai inla, Pathian in nang a dia thil ahon hihsak thupidan va hilh in,” chi in asawlkhia hi. Huchi in apai a, khopi sung tengteng ah Jesu'n amah a dia thil ahihsak thupidan atangkoupihta hi.

Jaira Tanu Kaihthohna Leh Numei Sipawt Damna

(Mat 9.18-26; Mar 5.21-43)

40Huan Jesu ahong kik nawn in mipi in amah akipahpih ua; amah ana ngak nilouh uhi. 41Huan ngai dih, sinagog vaihawmpa mi khat amin Jaira ahong pai a, Jesu khebul ah abokkhup a, a-inn a hoh ding in angen ngutngut hi. 42Tanu tang khat, kum sawm-le-nih hiam ding anei a, amah laitat ding in alum hi. Huan Jesu apai lai in mipihon in aboh lutlut uhi. 43Numei khat kum sawm-le-nih sipawt a china asum neih tengteng daktorte lak a zang khinta, kuamah in ahihdam theih tuan louh uh; 44anung ah ahong pai a, apuan mong akhoih a; thakhat in asipawt akam guih hi. 45Jesu'n, “Kua ahia hon khoih?” achi hi. “Kei zaw ka hi kei,” ana chi chiat uhi. Peter leh alawmte'n, “Heutupa, mipi'n hon boh lutlut in, ahon vel vengvung ve ua,” achi uhi. 46Himahleh Jesu'n, “Kuahiam in hon khoih ahi, ka sung a kipan thilhihtheihna apawt chih ka theih ziak in,” achi hi. 47Huan numei in akisel theih louh atheih in, ling kawm in ahong pai a, ama ah bokkhup in akhoihsan leh thakhat a adam takdan mi tengteng ma ah agenkheta hi. 48Huan akiang ah, “Tanu, na ginna na dampih hi, khamuangtak in paita in,” achi hi.

49Apau laitak in sinagog vaihawmpa inn a kipan mi khat ahong pai a, “Na tanu asita, heutupa hihgim nuam dah in,” achi hi.

50Jesu'n huai thu azak in, “Lau ke'n, gingta mai in, huchi in adam nawn ding,” chi in adawng hi. 51Huan inn ava tun in, Peter, Johan, Jakob leh naupang nu leh pate kia chih louh ngal kuamah lut ding aphal kei hi. 52Avek un ana kap kheukhou ua, akap vengvung ua, himahleh, ama'n, “Kap kei un, asi kei, ihmu ahi zaw,” achi hi.

53Huan si khin a atheih ziak un anuihsan maimah uhi. 54Jesu'n akhut alen a, “Nungaknou, thou in,” achi a, asam hi. 55Huan akha ahong kik nawn a, athou pah hi. 56Banghiam nek ding piak ding thu apia hi. Anu leh apa'n lamdang asa mahmah uhi. Himahleh ama'n athilhih kuamah hilh lou ding in achi bikbek hi.

Currently Selected:

LUKA 8: PAITBSI

Highlight

Copy