LUKA 7
7
Sepaih Zaheutu Sikha Hihdamna
(Mat 8.5-13)
1Huan mipite zak a athugen teng azohtak in Kapernaum ah alut a, 2sepaih zaheutu kuahiam sikha deihtak a china in, asi dekdek hi. 3Huchi in Jesu tanchin azaktak in asikha hong hihdam ding a ngen ding in akiang ah Juda upate asawl hi. 4Amau Jesu kiang ava tung ua, limtak in angen uhi, 5“Amah zaw na hihsak tak ahi; ka nam uh a-it a, ka sinagog uh leng ama hon lamsak ahi,” achi uhi.
6Huchi in Jesu amau toh ahong pai hi. A-inn atun dek kuan in sepaih zaheutu'n alawmte asawl a, “Ka insung na lutna tak ahi kei, 7huaiziak in na kiang a hong tak in leng ka kisim kei, thu leltak gen lechin, ka naupang adam mai ding. 8Kei leng mi thunuai a om ka hi a, ka nuai ah sepaihte a-om ua; huai mipa, hiai mipa, ‘Pai in,’ ka chihleh apai a, midang kiang ah leng, ‘Hong pai in,’ ka chihleh ahong pai a; ka sikha kiang ah leng, hiai hih in, ka chih leh ahih zel,” achi hi.
9Jesu'n huai thu azak in lamdang asa mahmah a, akihei a, mipi amah zuite kiang ah, “K'on hilh ahi, Israelte lak ah leng hichi tel a ginna thupi ka mu kha kei,” achi hi.
10Huan inn ah amisawlte apai nawn ua, damtak in sikha amuta uhi.
Meithai Tapa Hihdamna
11Huan sawt louchik in khua khat Nain kichi ah ahoh a; akiang ah anungzuite leh mipi tampitak ahoh sam uhi. 12Khopi kongkhak kiang atun in, ngai in, misi ahon zawngkhia ua, anu tapa neihsun ahi a, amah lah meithai ahi ngal a; akhua mite tampi akiang ah a-om uhi. 13Toupa'n meithainu amuh in, alainat mahmah a, “Kap ke'n,” achi hi. 14Huan ava naih a, lang ava len hi; huchi in lang zawngte akhawl uhi. “Tangval thou in, ka hon chi,” achi hi. 15Huan misi atukhia a, ahong pauta hi. Huchi in Jesu'n anu kiang ah apeta hi. 16Huan mi tengteng in alau ua, Pathian aphat ua, “I lak ah zawlnei thupi ahong suakta, achi ua, Pathian in amite hong vehta,” achi uhi. 17Huan huai mi tungtang thu Judia gam tengteng leh akiang vel gam teng ah athangkheta hi.
Baptispa Johan Misawlte
(Mat 11.2-19)
18Huan Johan nungzuite'n huai thu tengteng Johan ahilh uhi. 19Huchi in Johan in anungzuite nih asam a, Toupa kiang ah asawl a, “Hong pai dingpa na hi hia, midang hungaih lailai ding ka hi uhia?” chi in.
20Huan amisawlte akiang ahong tun un, “Baptispa Johan in, ‘Hong pai dingpa na hi hia, midang hungaih lai ding ka hi uhia?’ chi in na kiang ah kou a hon sawl,” achi uhi.
21Huaitak in Jesu'n, damloute, hipi veite, dawimatte tampi ahihdam a, mittaw tampite leng amit uh ahihvak hi. 22Akiang uah, “Pai nawnta unla, thil na muh uleh na zak uh Johan va hilh un; mittawte mit ahong vakta, khebaite khe in apaita ua, phakte hihsiang in om ua, nangongte bil ahong vakta, misite kaihthoh in a-omta uh, azawngte'n tanchinhoih hilh atangta uh. 23Huan kuapeuh ka tung a lung hihlouhna mu lou ahampha hi,” chi in adawng hi.
24Johan sawltakte apai nung un Jesu'n mipite kiang ah Johan thu agen a, “Bang en ding a gamdai a paikhia na hi ua? Sialluang huih mut ling maw? 25Ahihkeileh, bang en ding pen a paikhia na hi ua? Puannem silh mi maw? Ngai un, puan thupi silh leh minuamsate kumpipate inn ah ei ve a-om uh. 26Ahihkeileh, bang en ding pen in ahia na paikhiak uh? Zawlnei maw? Ahi tawk vo oi, ka hon chi ahi, amah zaw zawlnei sang a leng thupizaw ahi. 27‘En dih, ka thangkou na ma ah ka sawl ahi, ama'n na ma ah na lampi abawlkhol ding, chi a, atanchin kigelh, hiai mipa ahi.’ 28Numei suan lak ah Johan sang a thupizaw a-om kei; himahleh Pathian lalgam a mineupen leng amah sang in athupizaw, ka hon chi ahi,” achi hi.
29Huan mi tengteng leh siahkhonte'n huai azak un, Johan khut a baptisma tangsa ahih ziak un, Pathian siam atangsak uhi. 30Pharisaite leh dan thei mite'n bel akiang a baptisma ana tang kei ua, amau a ding a Pathian in hoih dia asehsak adeih kei uhi.
31Huchi in Jesu mah in, “Hiai khang bang toh ka teh diam aw? Bang toh kibang ahi ua? 32Naupang dawr mun a tu a, ‘Tamngai hon tumsak ung a, lam lou uchin a;’ ‘Suun ung a, nou lah kap tuan lou uchin a,’ chi a kichituahte bang ahi uh. 33Baptispa Johan ahong pai a, tanghou ane kei, uain leng adawn kei a nou, ‘Dawi zawl ei ve,’ na chi uhi. 34Mihing Tapa ahong pai a, ane in adawn a, ‘En dih uh, an haipa, uain haipa, siahkhon mite leh mikhialte lawm,’ na chi zel uhi. 35Himahleh pilna tuh atate tengteng in siam atan uhi,” achi hi.
Pharisai Simon Inn A Jesu Thaunilhna
36Pharisaite lak a mi khat in akiang a an ne ding in adeih hi. Huai Pharisai inn ah alut a, an a-um hi. 37Ngai dih, huai khua a numei khat om in Pharisai inn ah an um in atu chih a theihtak in alabaster bawm in thaunamtui ahon tawi hi. 38Anung ah akhepek bul ah kap kawm in adingh a, akhitui in akhepek asukawt a, asam in anul a, akhepek atawp a, thaunamtui anuh hi. 39Huan asampa Pharisai in huai amuh in, alungsim in, “Hiai mi zawlnei ahihleh akhoihnu numei kua ahia, mi bangchi ahia, theihtuaktak hi a, mikhial ahi ngal a,” achi hi.
40Jesu'n akiang ah, “Simon, na kiang ah thu kam khat gen ding ka nei,” chi in adawng hi. Ama'n, “Bang ahia, Sinsakpa?” achi hi.
41Jesu'n, “Dangka leitawisak kuahiam in leibami nih anei a; khat in makhai zanga, khat in sawmnga aba uhi. 42Huan aditna ding anei kei ua, angaidam tuaktuak hi. Huai mite akua in amah a-itzaw dia?” achi hi.
43Simon in, “Angaihdam tampen in hi in ka gingta,” chi in adawng hi. Ama'n akiang ah, “Na chi dik,” achi hi. 44Huan numei lam anga a, Simon kiang ah, “Hiai numei na mu hia? Na inn ah ka hong lut a, nang ka khepek silna ding tui na hon pe kei a, ama'n akhitui in ka khepek asukawt a, asam in anul hi. 45Nang tawp himhim na hon tawp kei; ama'n ka hong lut nungsiah ka khepek tawp atawlnga kei hi. 46Nang ka lutang ah thau na hon nilh kei a; ama'n ka khepek thaunamtui anilh hi. 47Huaiziak in ka hon chi ahi, akhelhna tampi ngaihdam in a-omta; ama'n nakpi in a-it hi. Himahleh, ngaidam tawm in, neuchik in a-it,” achi hi.
48Huai zoh in numei kiang ah, “Na khelhnate ngaihdam ahita,” achi hi.
49Huchi in an umpihte'n, “Mikhialte nangawn ngaidam kua ahia eita?” akichi uhi. 50Numei kiang ah, “Na ginna in ahon hondam hi, khamuangtak in paita in,” achi hi.
Currently Selected:
LUKA 7: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
