LUKA 6
6
Sabbath Thu A Dotna
(Mat 12.1-8; Mar 2.23-28)
1Huan hichi ahong hi a, Sabbath ni khat in buhlei ah apaisuak a, anungzuite'n buhvuite akhiak ua, akhutpek ua nuaisiang in ane uhi. 2Pharisai kuate hiam in, “Bangziak a Sabbath ni a hihsiang lou hih na hi ua?” achi uhi.
3Jesu'n adawng a, “David agilkial lai a alawmte toh athilhih uh huai bangte leng na sim kei ua hia? 4Huchi a Pathian inn a lut a, siampute lou ngal in anek siang louh tanghou koihtuam alak a, alawmte kiang a apiak sam thu,” achi hi. 5Huan akiang uah, “Mihing Tapa zaw Sabbath' Toupa ahi,” achi hi.
Pasal Khutzaw Hihdamna
(Mat 12.9-14; Mar 3.1-6)
6Huan hichi ahong hi a, Sabbath ni dang khat in sinagog ah alut a, thu ahilh a; huai ah mi khat khut taklam zaw ana om hi. 7Laigelhmite leh Pharisaite'n ahekna ding amuhtheihna ding un, Sabbath ni in hihdam ding in akisa hia kisa lou asim et uhi. 8Himahleh ama'n alungsim uh thei a, khutzaw kiang ah, “Thou inla, alai ah dingkhia in,” achi hi. Huan athou a, adingkheta hi. 9Jesu'n akiang uah, “Sabbath ni in hihhoih asiang hia, hihsiat? Hotdam asiang hia, hihlup? K'on dong ahi,” achi hi. 10Huan avek un a-en velvel a, akiang ah, “Na khut zankhia in,” achi hi. Huan azankhia a, akhut adamta hi. 11Huchi in aheh lo mahmah ua, Jesu tung a hihdan ding akihouta uhi.
Sawltak Sawm-le-nih Sehna
(Mat 10.1-4; Mar 3.13-19)
12Huan hichi ahong hi a, huai a kipan in apawt a, thum ding in tang ah akuan a, Pathian kiang ah zankhua in athum hi. 13Khua avaktak in anungzuite asam a; alak uah sawm-le-nih atel a, amin ding un leng Sawltakte asa hi. 14Huaite Simon Peter achih leh a-unaupa Andru, Jakob leh Johan, Philip leh Bartholomai, 15Matthai leh Thomas, Alphai tapa Jakob, Zealot kichi Simon, 16leh Jakob tapa Judas leh amansakpa Judas Iskariot ahi uh.
Jesu Sinsakna leh Hihdamna
(Mat 4.23-25)
17Huan amau toh apaikhia a, mun zang ah adingh a, anungzui mipite toh, Judia gam tengteng a kipan leh Jerusalem a kipan leh Tura leh Sidon kholam a tuipi gei a kipan mipi tampitak athu ngainuam leh adamlouhnate uh hihdam ut in ahong pai uhi. 18Huchi in dawi nin sukbuaite leng damsak in a-omta uhi. 19Huan akiang a kipan thilhihtheihna apawtkhia a, michih ahihdam zel ziak in mipi tengteng in amah khoih atum uhi.
Hamphatna leh Tunggikna
(Mat 5.1-12)
20Huan adakkhia a,
anungzuite mitsuan kawm in agen a:
“Nou gentheite aw, na hampha uh;
Pathian lalgam nou a ahi ngal a.
21Nou tua gilkialte aw,
na hampha uh,
tai ding na hi ngal ua.
Nou tua kapte aw,
na hampha uh,
nui ding na hi ngal ua.”
22“Mihing Tapa ziak a mite'n ahon huat ua, hon pampaih ua, hon tai ua, na min uh ahoih kei chi a ahon paihmang chiang un, na hampha ding uh. 23Huai ni in kipak unla, nuam in tawm un, ngai un, van ah na kipahman uh a-om kihkeih hi; huchibang mah in apipute un zawlneite tung ah ahih uhi.”
24“Himahleh, nou mihaute aw,
na tung uh agik e;
na khamuanna uh na mu khinta ngal ua;
25nou tua vahte aw, na tung uh agik e;
na gil uh ahong kial ding.
Nou tua nuite aw; na tung uh agik e;
lungkham a kap ding na hi ngal ua.”
26“Mi tengteng in ahon phat chiang un na tung uh agik ding hi; huchi mah bang in apipute un zawlnei takloute tung ah ahih uhi.
Melmate Itna
(Mat 5.38-48; 7.12a)
27“Ka thu ngaikhete aw, ka hon hilh ahi, na melmate uh it unla, hon hote hoihna ding hih un, 28Hon hamsiatte vualzawl unla, hon simmohte thumsak un. 29Biang langkhat a hon bengpa alehlam leng doh in; na puan hon laksakpa kiang ah na puanak leng it ke'n. 30Ahon ngen peuh kiang ah pia in; huan na van hon laksakpa kiang ah ngen nawn ke'n. 31Huan mi'n na tung ua ahih ding uh na deih bang zel un mi tung ah leng hih sam un.
32“Huan ahon itte kia na it un, pahtak bang na loh ding ua? Mikhialte'n leng amau itte a-it sam ve ua oi! 33Na tung ua hoihte tung kia a na hoih un, pahtak bang na loh ding ua? Mikhialte'n leng huchibang mah in ahih zel ve ua oi. 34Muh nawn lametnate kiang kia a thil na leitawisak un, pahtak bang na loh ding ua? Mikhialte'n leng angeingei mu nawn ding in mikhialte kiang ah aleitawisak sam uhi. 35Himahleh na melmate uh it unla, ahoihna ding un hih unla, lunglel het lou in leitawisak un; huchi in na kipahman uh atam dia, Tungnungpen tate na hi ding uh; ama'n mi kipahna dan theiloute leh migiloute ahehpih hi. 36Na Pa azahngaih theih bang in zahngai thei in om un.
Midangte Dem Thu
(Mat 7.1-5)
37“Hawmsak kei un, huchi in hawmsak in na om kei ding uh; kuamah siam lou in sep kei un, huchi in siam louh in na om kei ding uh; ngaidam un, huchi in ngaihdam in na om ding uh; 38pia un, huchi in piak in na om ding uh, hoihtak a teh a, hen gak a, sin gak in, let nawinawi in na angsung uah piak in na om ding uh. Noumau tehna ngei mah a tehsak a piak in na om ding uh ahi ngal a,” achi hi.
39Huan akiang uah, gentehna agen a: “Mittaw in mittaw mah api thei diam? Anih un kokhuk ah akekhawm kei ding ua hia? 40Asinsakpa tung ah nungzui a-om kei; himahleh mi kuapeuh kisinsiamtate asinsakpa bang in a-om ding uh.
41“Huan bangziak a na mit a singtum om limsak lou a, na unau mit a ninneng neuchik om mu na hia? 42Nangmah mit a singtum om mu lou in, na unau kiang a, ‘Unau, na mit a ninneng neuchik om hon lakhesak ve,’ bangchi a chi thei na hia? Milepchiah na mit a pan singtum lakhe masa in, huchi in na unau mit a ninneng neuchik lakkhiak ding chiantak in na mu thei ding hi.
Sing leh Agah
(Mat 7.16-20; 12.33-35)
43“Sing hoih gahsia a gah a-om ngei kei; sing sia lah gah hoih a gah a-om ngei sam kei hi. 44Sing chih amau gah chiat ah akithei hi. Mi'n khaulingnei kung ah theipi alou ngei kei uh, loubukh lingnok lak ah grep gah alou ngei sam kei uh. 45Mihoih in alungtang goubawm hoih a kipan thil hoihte alakhia a; migilou in alungtang goubawm sia a kipan thil hoihloute alakhe zel hi; alungtang a dim val kam in agen zel ngal a.
Inn Lamdan Nihte
(Mat 7.24-27)
46“Huan nou bang ding a, ka gente hihloupi a, Toupa, Toupa, hon chi na hi ua? 47Michih ka kiang a hong a, ka thu za a zui peuhmah kua bang ahi ua, ka hon ensak ding: 48Amah zaw inn lammi in lei thukpi a tou a, suangpi tung a suangphum lem mi bang ahi; huan tui ahong khan in, tui khauh in huai inn akhoh a, ahihling thei kei; hoihtak a lam ahih ziak in. 49Himahleh thu za a mang lou suangphum louh a leitung maimah a inn lammi ahi; tui khauh in huai inn akhoh a, achim pah a; huai inn siatna thupitak ahi,” achi hi.
Currently Selected:
LUKA 6: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
