LUKA 5

Jesu Nungzui Masate Sapna

(Mat 4.18-22; Mar 1.16-20)

1Huan hichi ahong hi a, mipi'n Pathian thu angaihkhiak ua, amah aboh huthut lai un, amah Gennesaret tuipi gei ah adingh hi. 2Huan tuipi gei a long nih om amu a, himahleh ngaman mite apawtkhia ua, alente uh asawp uhi. 3Huchi in long khat Simon a pen ah atuang a, akiang ah lui gei a kipan neukha tolhlutsak deuh angen hi. Huan atu a, long a kipan mipite thu ahilh hi.

4Huan thugen azoh in, Simon kiang ah, “Lithuk lam naih unla, ngaman ding in, na lente uh pai un,” achi hi.

5Huan Simon in akiang ah, “Heutupa, gimtak in zankhua in ka pang ua, bangmah ka man kei ua, himahleh na thu in lente ka pai nawn ding,” chi in adawng hi. 6Huan apaih ualeh nga tampitak akhuh ua, alente uh akek iak-iak hi. 7Huan long dang a om alawmte uh amau huh ding in akhutvan hial uhi. Ahong pai ua, long nih tum phialphial in asungdim tuaktuak uhi. 8Simon Peter in huai amuh in, Jesu khebul a bokkhup in, “Toupa, hon paisan in, mikhial ka hi,” achi hi.

9Anga mat uh amah leh alawmte'n lamdang asa mahmah uhi; 10Simon pawlte mah Zebedai tapa Jakob leh Johan in leng lamdang asa mahmah sam uhi. Simon kiang ah Jesu'n, “Lau ke'n, tuban siah mihing na manta ding,” achi hi.

11Huan lui gei ah alongte uh atolh galkai ua, bangkim paisan in amah azuita uhi.

Phak Hihdamna

(Mat 8.1-4; Mar 1.40-45)

12Huan hichi ahong hi a, khua khat a a-om lai in ngai dih, mi khat phak a pumdim a-om a, ama'n Jesu amuh in, ama a bokkhup in, “Toupa, na utleh na hon hihsiang thei,” chi in angen ngutngut hi.

13Ama'n sawk in akhoih a, “Ka ut hi, na siangta in,” achi hi. Huan thakhat in aphak ahong bei pah hi. 14Akiang ah, “Kuamah hilh ke'n, himahleh siampu kiang ah va ki-ensak inla, na sianthouna ding Mosi seh bang lan in, mite theihchetna ding in,” achi hi.

15Himahleh atanchin thu athang semsem a; mipi tampitak athu za nuam leh anatnate uh hihdam ut in ahong kikhawm kheukhou uhi. 16Himahleh amah gamdai ah apaituam a, athum hi.

Mizaw Hihdamna

(Mat 9.1-5; Mar 2.1-12)

17Huan hichi ahong hi a, huai lai in ni khat thu ahilh hi. Akiang ah Pharisaite leh dansiamte atu uhi, huaite Galili leh Judia gam kho teng a kipan a hong pai ahi uhi. Mite hihdamna ding in akiang ah Toupa thilhihtheihna a-om hi. 18Huan ngai dih, lupna toh mizaw khat ahon zawng ua; ama a koih ding in zawnlut atum uhi. 19Himahleh mipi ziak in zawnlutdan ding amu thei kei ua, intung a kipan alaitak, Jesu ma ah alupna toh akhaikhesuk uhi. 20Huan aginna uh amuh in akiang ah, “Mihing, na khelhnate ngaihdam ahita,” achi hi. 21Laigelhmite leh Pharisaite'n, “Pathian gensia hiai mi kua ahia? Pathian kia lou in kua'n ahia khelhnate ngaidam thei?” chi in angaihtuah uhi.

22Huchi in Jesu'n angaihtuah uh athei a, akiang uah, “Na lungtang uah bang na ngaihtuah ua? 23Na khelhnate ngaihdam ahita, chih leh thou inla, khe in paita in, chih, akoi pen gen anuam zaw? 24Himahleh, khovel ah Mihing Tapa in khelhnate ngaihdam theihna anei chih na theihna ding un,” damlou mizaw kiang ah, “Thou inla, na lupna la inla, na inn ah pai in, ka hon chi,” achi hi.

25Huchi in amitmuh un athou pah a, alupna ala a, Pathian phat kawmkawm in a-inn ah apaita hi. 26Huan avek un lamdang asa mahmah ua, Pathian aphat uhi. “Tuni in thillamdang pitak i mu hi,” achi ua, alau mahmah uhi.

Levi Sapna

(Mat 9.9-13; Mar 2.13-17)

27Huaite khit in apawt a, siah piakna mun a tu, siahkhonmi khat amin Levi amu a; akiang ah, “Hon zui in,” achi hi. 28Huchi in adingh a bangkim paisan in azuita hi.

29Huan Levi in a-inn ah Jesu a ding in ankuang thupitak alui a; siahkhonmi leh midangte toh mi tampi in amau a-umpih chiat uhi. 30Pharisaite leh laigelhmite anungzuite tung ah aphun uhi, “Bangziak a siahkhon mite leh mikhialte kiang a ne a dawn na hi ua?” achi uhi.

31Jesu'n akiang uah, “Midamtheite'n daktor akiphamoh kei ua, midamtheiloute'n akiphamoh uhi. 32Midiktatte sam ding a hong pai ka hi kei a, mikhialte kisiksak ding a hong pai ka hi zaw,” chi in adawng hi.

An Ngawl Thu A Dotna

(Mat 9.14-17; Mar 2.18-22)

33Huan amau akiang ah, “Johan nungzuite'n an angawl zel ua, athum zel uh; Pharisaite nungzuite'n leng huchibang mah in ahih zel uh; himahleh na nungzuite'n ane un adawn gige uh,” achi uhi.

34Jesu'n akiang uah, “Moupi mite kiang a apasal ding a om lai siah moupi mite an angawlsak thei ua hia? 35Himahleh apasal ding amau a kipan pimang nite ahong tung ding a, huai ni chiang in zaw angawl ding uh,” achi hi.

36Huan akiang uah gentehna thu leng agen a, “Kuamah in puan thak them in puan lui athuap ngei kei, thuap mah le uh, athak in akaikek dia, athak them leh alui akituak kei ding uhi. 37Huan kuamah in uain thak savun uain thawl lui ah athun ngei kei, thun le uh uain thak savun thawlte apuakzak dia, abo dia, savun thawlte leng asegawp ding uhi. 38Uain thak savun uain thawl thak ah athun zaw ding uhi. 39Huan kuapeuh uain lui na dawn khin in leng, athak aduh pah kei hi; alui pen hoihzaw achi ngal a,” achi hi.

Currently Selected:

LUKA 5: PAITBSI

Highlight

Copy