LUKA 4

Jesu Khemna

(Mat 4.1-11; Mar 1.12-13)

1Jesu, Kha Siangthou in adim a, Jordan lui a kipan akik nawn a, diabol khem kawm in gamdai ah ni sawmli Kha pi in a-om hi. 2Huai nite in bangmah ane kei hi. 3Atawp in agil ahong kialta a, diabol in akiang ah, “Pathian Tapa na hihleh hiai suang tanghou suak ding in thu pia in,” achi hi. 4Jesu'n akiang ah, “Tanghou kia in mihing ahing kei ding, Pathian kam a thupawt in ahing zaw ding,” chih gelh ahi, chi in adawng hi. 5Huan tang sangtak ah apitou a, mitphiat kal lou in khovel gam tengteng a-ensak hi. 6Akiang ah, “Hiai tengteng tung a thuneihna leh athupina ka hon pe ding; ka kiang a piak ahita hi, ka ut peuh kiang ah leng ka pe zel hi. 7Huchi in hon bia inla, avek in nang a ahi ding,” achi hi.

8Jesu'n akiang ah, “Toupa na Pathian na biak ding a, amah nna kia na sep ding ahi,” chih gelh ahi, chi in adawng hi.

9Huan Jerusalem ah api a, tempul tungzum ah akoih a, akiang ah, “Pathian Tapa na hihleh hiai a kipan kikesak in; 10nangmah humbit ding in na tungthu ah zaw a-angelte thu ape ding a, 11amau akhut un ahon dom ding uh, huchi lou in zaw na khe in suang na sui kha ding, chih gelh ahi ngal a,” achi hi.

12Jesu'n akiang ah, “Toupa na Pathian ze-et ke'n,” chih gelh ahi, chi in adawng hi.

13Huan diabol in akhemna ding teng a akhem khit in alemtan hun chiang a ding in apaisanta hi.

Galili Gam Ah Jesu'n Nasep Pan

(Mat 4.12-17; Mar 1.14-15)

14Kha thilhihtheihna in Galili gam ah Jesu apai nawnta a; atanchin huai kim gam teng ah athangta hi. 15Huan sinagogte ah thu ahilh zel a, mi tengteng phat in a-om hi.

Nazaret Ah Jesu Deih Louh In A-om

(Mat 13.53-58; Mar 6.1-6)

16Huan akhanletna khua Nazaret ahong tung a; Sabbath ni a ahihdan ngeina bang in sinagog ah alut a, sim ding in adingh hi. 17Akiang ah zawlnei Isai laibu apia ua, ama'n laibuzial aphel a, hiai thu kigelhna laitak asim hi:

18“Liangvaite kiang a

Tanchinhoih gen ding a na hon seh ziak in ka tung ah

Toupa Kha a-om;

ama'n ahon sawl, salte kiang ah pawtna thu leh,

mittawte kiang a mitvak neih nawnna thu gen ding,

simmoh thuakte pawtsakna ding.

19Toupa lungkim kum thu gen ding in,” chih.

20Huan laibu azial a, nasepsakpa ape nawn a, atuta hi. Huan sinagog a mi tengteng mit atung ah atuta hi. 21Akiang uah, “Hiai Laisiangthou thu tuni in na zak un atangtungta,” chi in agen pan hi.

22Avek un amah aphat ua, akamsuak hehpihna thute lamdang asa mahmah uh, “Hiai mi Joseph tapa ahi kei a hia?” achi uhi.

23Ama'n akiang uah, “Nou hiai thupil thu, Daktor, nang leh nang kihihdam in, Kapernaum a na thilhih ka na zak peuh uh, hiai ah nangmah kholam ah leng hih in chi in hon chi khong ding zaw na hi ve ua,” achi hi. 24Amah mah in, “Chihtaktak in, ka hon hilh ahi, zawlnei kuamah ama kholam ah pahtawi in a-om ngei kei hi. 25Huchi in diktak in ka hon chi ahi, Elijah dam lai a, kum thum leh kha guk van abin a, khovel a kial nakpitak a ahong tun in, Israel gam ah meithai tampi a-om uhi. 26Himahleh alak ua kuamah kiang ah Elijah sawl ahi kei, Sidon gam lam a Zarephath a numei, meithai kiang kia a sawl ahi zaw hi. 27Huan zawlnei Elishah dam lai in leng Israel gam ah phak tampi a-om ua; himahleh alak uah kuamah hihsiangthou in a-om kei, Siria mi Naaman kia hihsiangthou in a-om zaw hi,” achi hi.

28Huan sinagog a mi tengteng in huai thute azaktak un, aheh mahmah uhi. 29Adingh suausuau ua, khua a kipan in asawnkhia ua, paihkhiak ding in akho omna mual pang ah api uhi. 30Himahleh amah alak uah apaisuak a, apaimangta hi.

Pasal Dawi Nin Pai Hihdamna

(Mar 1.21-28)

31Huan Galili gam a khua khat, Kapernaum ah ava hohsuk hi. Sabbath ni in mite thu ahilh hi. 32Thuneitak a agen ziak in athuhilh lamdang asa mahmah uhi. 33Huan sinagog ah dawi nin paimi khat ana om hi. 34Amah aw ngaihtak in akikou a, “Eh! Nazaret Jesu, kou leh nang bang ahia i kizolhna om? Hon hihmangthang ding in na hong maw? Nang ka hon thei, Pathian Mi Siangthou na hi,” achi hi. 35Jesu'n atai a, “Dai inla, asung a kipan pawt in,” achi hi. Huan dawi in alai ah ahihpuk a, hihna lou in asung a kipan apawtta hi. 36Huan avek un lamdang asa mahmah ua, “Bang thu ahia le? Thuneitak leh thilhihtheitak in dawi ninte thu apia a, apawt uh,” chi in akihou uhi. 37Huan huai kim gam khua teng ah atanchin athangta hi.

Simon Zi Nu leh Mi Tampi Hihdamna

(Mat 8.14-17; Mar 1.29-34)

38Huan athou a, sinagog a kipan apawt a, Simon inn ah alut hi. Simon zi nu nakpitak in akhosik a, huchi in amah a ding in ana ngetsak uhi. 39Akiang ah adingh a, khosik atai a, adaita hi; athou pah a, a-nna uh asepsakta hi.

40Huan nitum kuan in natna tuamtuam a na, damlou nei peuhmah in akiang ah ahon pi ua; avek un atung uah akhut akoih chiat a, ana hihdam zel hi. 41Huan dawite'n leng, “Pathian Tapa na hi,” chi a kikou in, mi tampi sung a kipan in hong pawt uhi. Huan amau atai a, Khrist ahi chih atheih ziak un apau uh aphal kei hi.

Sinagog Ah Jesu'n Thu Gen

(Mar 1.35-39)

42Huan khovak tak in apawt a, kuamah omlouhna mun ah ahoh a; mipite'n azong ua, akiang ah ahong ua, amau apaisanlouhna ding in let atum uhi. 43Himahleh akiang uah, “Kho dang ah leng Pathian lalgam tanchinhoih ka hilh ding ahi, huai ding a sawl ka hi ngal a,” achi hi. 44Huchi in Galili gam a sinagogte ah thu ahilhta hi.

Currently Selected:

LUKA 4: PAITBSI

Highlight

Copy