LUKA 3

Baptispa Johan Leh Athupuak

(Mat 3.1-12; Mar 1.1-8; Joh 1.19-28)

1Tiberias Kaisar vaihawm akum sawm-le-nga kum in, Judia gam-ukpa Pontias Pilat ahi a, Galili gam kumpipa Herod ahi a, a-unau Philip, Ituria leh Trakoniti gam kumpipa ahi a, Abilin gam kumpipa Lusania ahi. 2Annas leh Kaiapha siampu lianpen ahi ua, huai lai in gamdai ah Zakariah tapa Johan kiang ah Pathian thu ahong tung hi. 3Amah bel Jordan lui gei kim gam tengteng ah ahoh a, thil hihkhial ngaihdamna ding in kisikna baptisma thu agen zel hi. 4Zawlnei Isai laibu a:

“Gamdai a kikou aw in,

Toupa lampi sial unla,

alampite tangsak un.

5Guam chih sundim ahi ding a,

tang leh mual chih, hihniam ahi ding; lampi kawite tansak ahi ding a, lampi phokte mamsak ahi ding.

6Huan mi tengteng in Pathian hotdamna amu ding uh,”

achi, chih gelh bang in.

7Ama'n baptisma tang ding akiang a mipi hong sukte kiang ah, “Nou gul suante aw, thangpaihna hong tung ding taisan ding a kua'n hon vauhilh ahia? 8Huchi in kisik minputak in gah un, ei hon suangpa Abraham ahi na lungsim un chi kei un; Pathian in hiai suangte Abraham suante in adingsak thei chih ka hon hilh ahi. 9Tu mahmah in singbul teng ah heipi koih ahita; huchi in sing chih gah hoih a gah lou peuhmah phuk in a-om a, mei ah paih in a-om,” achi hi.

10Huan mipite'n akiang ah, “Bang ka hihta ding ua?” chi in adong uhi.

11Ama'n akiang uah, “Kuapeuh puanak nih nei in anei lou kiang ah hawm hen; kuapeuh an nei in huchibang mah in hih hen,” chi in adawng hi.

12Huan siahkhon mite leng baptisma tang ding in ahong ua, akiang ah, “Sinsakpa, bang ka hih ding ua?” achi uhi. 13Ama'n akiang uah, “Hon sehsak val uh khon kei un,” achi hi.

14Sepaihte'n leng akiang ah, “Kou leng bang ka hih ding ua?” chi in adong uhi. Ama'n akiang uah, “Kuamah hiamgam in hih kei unla, dikloupi in kuamah hek kei unla, na loh uah lungkim un,” achi hi.

15Huan mite'n alamet ua, mi tengteng in Johan tungthu alungtang ua, Khrist ahi kha zenzen diam aw? chi a angaihtuah lai un, 16Johan in adawng a, avek ua kiang ah, “Ke'n tui in ka hon baptis a, himahleh kei sang a mithupizaw ahong pai ding, akhedap khau phel tak leng ka hi kei; ama'n Kha Siangthou leh mei in nou ahon baptis ding. 17Akhut in aphazah atawi a, aphual zapsianna ding leh buhpang a buhte sunlutna ding in; asite mei mit ngei lou ah ahalmang ding,” achi hi.

18Huan hanthawnna tampi in mite kiang ah tanchinhoih ahilh zel hi. 19Himahleh kumpipa Herod in anaupa zi, Herodias tungthu ah leh athilhihkhelh tung a Johan in ataihilh ziak in, 20athilhihkhelh tengteng behlap in amah suangkul ah akhum hi.

Jesu Baptisna

(Mat 3.13-17; Mar 1.9-11)

21Huan mi tengteng abaptis zoh in, hichi ahong hi a, Jesu leng baptis zoh a a-om in, athum a, van ahong kihong a, 22Kha Siangthou sa pu in vakhu bang in ahong suk a, atung ah atuta a; van a kipan in aw ahong pawt a, “Nang ka Tapa deihtak na hi; na tung ah ka kipak mahmah,” achi hi.

Jesu Khangsutna

(Mat 1.1-17)

23Huan Jesu'n thu ahilh pat tung lai in amah kum sawmthum vel ahita, mi ngaih in zaw Joseph tapa ahi a, huai Heli tapa ahi a, 24huai Matthat tapa ahi a, huai Levi tapa ahi a, huai Melki tapa ahi a, huai Janna tapa ahi a, huai Joseph tapa ahi a, 25huai Matthathias tapa ahi a, huai Amos tapa ahi a, huai Nahum tapa ahi a, huai Esli tapa ahi a, huai Naggai tapa ahi a, 26huai Maathi tapa ahi a, huai Matthathias tapa ahi a, huai Semmei tapa ahi a, huai Josek tapa ahi a, huai Joda tapa ahi a, 27huai Joanan tapa ahi a, huai Rhesa tapa ahi a, huai Zerubbabel tapa ahi a, huai Salathiel tapa ahi a, huai Neri tapa ahi, 28huai Melki tapa ahi, huai Addi tapa ahi, huai Kosam tapa ahi, huai Elmadam tapa ahi, huai Er tapa ahi, 29huai Joses tapa ahi a, huai Eliezer tapa ahi a, huai Jorim tapa ahi a, huai Matthat tapa ahi, 30huai Levi tapa ahi a; huai Simeon tapa ahi, huai Judah tapa ahi, huai Joseph tapa ahi, huai Jonam tapa ahi, huai Eliakim tapa ahi a, 31huai Melia tapa ahi, huai Menna tapa ahi, huai Mattatha tapa ahi a, huai Nathan tapa ahi, huai David tapa ahi, 32huai Jesse tapa ahi, huai Obed tapa ahi a, huai Boaz tapa ahi a, huai Salmon tapa ahi a, huai Nahshon tapa ahi, 33huai Amminadab tapa ahi a, huai Admin tapa ahi, huai Arni tapa ahi a, huai Hezron tapa ahi, huai Perez tapa ahi a, huai Judah tapa ahi, 34huai Jakob tapa ahi a, huai Isak tapa ahi, huai Abraham tapa ahi a, huai Tera tapa ahi a, huai Nahor tapa ahi. 35Huai Serug tapa ahi, huai Reu tapa ahi, huai Peleg tapa ahi, huai Eber tapa ahi, huai Selah tapa ahi, 36huai Kainan tapa ahi, huai Arpakshad tapa ahi, huai Sem tapa ahi, huai Noah tapa ahi, huai Lamekh tapa ahi, 37huai Methuselah tapa ahi, huai Enok tapa ahi, huai Jared tapa ahi, huai Mahalalel tapa ahi, huai Kainan tapa ahi, 38huai Enos tapa ahi, huai Seth tapa ahi, huai Adam tapa ahi, huai Pathian tapa ahi.

Currently Selected:

LUKA 3: PAITBSI

Highlight

Copy