LUKE 2
2
Jesu Pianna
(Matt. 1.18-25)
1Huai lai in hichi ahi a, Kaisar Augusta in khovel tengteng min khum ding thu a pia hi. 2Huai tuh Suria gam a Kurini gamukpa a hihlai a min khumna masapen ahi. 3Huchi in mi tengteng a min uh khum ding in amau khua chiat uah a hoh uhi.
4Huan Joseph leng, David inkuante leh a suan a hihman in Galili gam a Nazaret khua a kipan in, Judia gam a David khua Bethlehem ah a hoh hi. 5Mari a zikham gaisanlai toh, min khum ding in. 6Huan hichi ahi a, huai a a omlai un, a nauneih a hong hun hi. 7Huan a tamasa in pasal a nei khia a; puan in a tuam a, khualbuk a a taklouh ziak un gan anpiakna ah a sial hi.
Belamchingmite Vehna
8Huan huai gam mah ah belamchingte a om ua, gamlak ah zan in a belam uh a ching uhi. 9Toupa angel khat a kiang uah a hong ding a, Toupa thupina in a kim uh a tanvak a; huchi in a lauta mahmah uhi. 10Angel in a kiang uah, “Lau kei unla, ngai un, mi chih ading in Tanchinhoih kipahhuai mahmah k’on tut ahi. 11Tuni in nou ading in David khua ah Hondampa a piangta, amah Khrist Toupa ahi. 12Hiai nou ading in chiamtehna ding ahi; naungek puan a tuam, gan anpiakna kuang a lum na mu ding uh” a chi hi.
13Huan angel kiang ah van mipi hon a hong omkhawm guih ua, Pathian a phat ua:
14“Tungnungpen ah Pathian thupi henla, leitung a a kipahpih mahmah mihingte lak ah lemthu leng hen,” a chi uhi.
15Huan hichi ahi a, angelte’n van a a paisan tak un, belamchingte’n, “Tun ah Bethlehem khopha in pai lehang, Toupa’n thu a honhilh hongtung i en ding uh” a kichi uhi.
16Huchi in a pai mengmeng ua, Mari toh, Joseph toh, gan anpiakna kuang a naungek lum a vamu uhi. 17A vamuh un a naungek tanchin angel in a hilh a genthangta uhi. 18A za peuhmah in belamchingte thugen lamdang a sa mahmah uhi. 19Mari in thugen tengteng a lungtang in a ngaihtuah a, a vom gige hi. 20Belamchingte’n angel hilh bang ngei a bangkim a muh ua a zak ziak un, Pathian pahtawi leh phatkawm zel in a kiknawnta uhi.
Jesu Min Phuahna Leh Latna
21Huan a zeksumni ding ni giat a hong chin in, a min din, sul a a om ma a angel in a gensa, Jesu a sa uhi. 22Mosi dan bang a a kisiansakna ni uh a hongtun in, Jerusalem khua ah amah a va tonpihtou ua, Toupa kiang a amah lan ding in. 23Toupa thu a, “Ta pasal sul hong peuhmah Toupa ading a sehtuam a chi ding uh” chi a gelh bang in. 24Toupa Dan gen bang a vakhu kop khat hiam vapal nou nih hiam kithoihna lan ding in.
Simeon Kipahthugenna La
25Huan ngai in, Jerusalem khua ah mi khat a min Simeon a om a; huai mi midiktat leh Pathian limsak ahi a, Israelte khamuanpa ding a ngak gige a, a tung ah Kha Siangthou a om hi. 26Toupa Khrist a muh masiah zaw a si kei ding chih Kha Siangthou in a na theisak him ahi. 27Kha theihsak in Pathian biakin ah a valut a; naungek Jesu a nu leh apan Dan ngeina bang a a tung a hihsak ding a a hon pilut lai un, 28Aman a na angpom a, Pathian a phat hi,
29“Toupa, tun ah zaw na thu bangzel in,
na sikha khamuangtak in na paisak ding a:
30Na hotdamna ka mit in a muhtak ziak in,
31Huai michih muh a na bawltak;
32Jentelte kiang a kilakna vak leh na mi Israelte thupina ding” a chi hi.
33Huan naungek thu a gen a nu leh apan lamdang a sa mahmah uhi. 34Simeon in amau a vualzawl a, a nu Mari kiang ah, “Ngai in, hiai naupang Israel lak a mi tampi pukna ding leh dinkhiakna ding a seh ahi, gensiat a om chiamtehna hi ding in leng. 35Ahi, nang lungtang leng namsau in a dawt pailet ding a; huchi a mi tampi in a lungtang ua a ngaihtuahte uh a latna ding in” a chi hi.
Anna Phatna
36Huan mi khat, a min, Anna, zawlnei, Phanuel Tanu, Asher nam a mi a om a; amah tektak ahi a, a nungak tawp nung siah a pasal kiang ah kum sagih a om hi, 37Kum sawmgiat leh kum li hial a meithai a, aman Pathian biakin paisanlou in a sun a zan in anngawl a thum in Pathian a be zel hi. 38Huchih laitak in amah a hongpai a, Pathian kiang ah kipahthu a gen a, Jerusalem tatna lamen peuhmahte kiang ah Jesu tanchin a gen hi.
Nazaret Khua A Kikna
39Huan Toupa dan bangzel a thil tengteng a hihzoh un, Galili gam a, amau khua Nazaret ah a kik nawnta uhi. 40Naungek a hong khanglian deuhdeuh a, a honghat hiaihiai a, pilna in a dimta a, Pathian deihsakna a tung ah a om hi.
Tempul Ah Naupang Jesu
41Huan kumteng in, Paikan Ankuanglui hun in, a nu leh a pa Jerusalem khua ah a hohzel uhi. 42Amah kum sawmlehnih a hih in dan ngeina in a hohtou uhi. 43Ankuanglui zoh a a kiknawn lai un, Jerusalem khua ah naupang Jesu’n a omsan a, a nu leh pa’n a theikei uhi, 44Huchi in a pawllak ua om hi nanteh a chi ua, ni khatlam a paikhin ua, a sanggamte uh leh a meltheihte uh lak ah a zong uhi. 45A muhlouh ziak un zong kawmkawm in Jerusalem khua ah a kik nawnta uhi. 46Huan hichi ahi a, ni thum nung in, Pathian biakin ah, sinsakmite lak a tu a, a thu uh na ngaikhia a, amau thudong in, a vamu uhi. 47A thu zate’n a theihdan leh a dawn dan lamdang a sa mahmah uh. 48A nu leh apan amah a muh un, lamdang a sa mahmah ua: a nun, a kiang ah, “Tapa aw, bangdia hichibang a honhih na hia? Ngai in, na pa leh ken lungkhamtak in k’on zong uh” a chi hi.
49Aman a kiang uah, “Bangdia honzong na hi ua? Ka Pa inn a ka om ding na theikei ua hia?” a chi hi. 50Huan a kiang ua a thugen a theisiam kei uhi.
51Huan amau a zuisuk a, Nazaret khua a hongtung ua, a thu uh mang in a om hi. A nun huai thil tengteng a lungtang ah a vom gige hi. 52Jesu a pil deuhdeuh a, a honglian hiaihiai a, Pathian leh mihing deihsak in a om deuhdeuhta hi.
Currently Selected:
LUKE 2: PAITBSI
Highlight
Share
Copy
Want to have your highlights saved across all your devices? Sign up or sign in
Paite OV (Re-edited) Bible - Pathian Laisiangthou
Copyright © 2013 by The Bible Society of India
Used by permission. All rights reserved worldwide.
